Mbaheberu 3 - ICIGHAN BIBILO

¹ Nahan yô, ne uicighananmgbianev mba ne lu a kwar sha myer u a dugh Sha, u i yila ne la, ver nen ishima sha Apostoli man Zegepristi u se pase kwagh Na sha mpase u jighjigh wase u nan la cii, ka Yesu je la,

² Un u a lu u jighjigh hen Aôndo u A ver Un sha tom la di er Mose kpaa a lu jighjigh ken ya na cii nahan.

³ Gadia i nenge Un er A kom icivir i hembe i Mose yô, di er ormaanya ka nan lu a icivir, i hemba i ya nahan.

⁴ Gadia hanma ya yô, or maa un a maa, kpa u A maa akaa cii yô, ka Aôndo.

⁵ Mose yô, lu jighjigh ken ya Na cii, lu ortom sha u una er shiada sha akaa a á va ôr a ken hemen la.

⁶ Kpa Kristu yô lu jighjigh sha ya Na, lu Wan je. Man ka se se lu ya Na ye, aluer se kôr ave gbang gbang sha vangertiôr wase man ihagh i sha ishimaverenkeghen yase la zan zan mkur yô.

⁷ Nahan yô ka vough er Icighan Jijingi A lu kaa nahan er: Nyian je aluer nea ungwa imo Na yô,

⁸ de kera cighir nen asema a en er sha shighe u vihin ishima la nahan ga, shin er sha iyange i imeen i ken taaikôngo la nahan kpaa ga,

⁹ henpe uter enev meem sha u karen Mo shin er ve lu nengen ityom Yam, anyom akunduahar je nahan kpaa.

¹⁰ Sha ci u nahan yô, ishima i vihim a kov ne M kaa Mer: Gbem je, mba tsumen ken asema a ve, ve fa igbenda Yam ga.

¹¹ Nahan M bum sha ishimanyoon Yam Mer: Vea kera nyôr ken mmem Wam mayange ga.

¹² Ver nen ishima, anmgbianev, sha u boshima u nan jighjigh ga a̱ de luun ken hanmô wen sha u né undu Aôndo u uma ga.

¹³ Kpa taver nen ayol a en asema use use er i lu teren “nyian” la her yô, sha er i̱ de cighir hanmô wen ishima sha icugh i isholibo ga yô.

¹⁴ Gadia se hingir mbalun a kwar ken Kristu aluer se kôr ave gbang gbang sha imagh ki hiihii ki ishimaveren yase zan zan mkur yô.

¹⁵ Er i lu kaan er: Nyian je aluer nea ungwa imo Na yô, de kera cighir nen asema a en er sha shighe u nyoon ishima la nahan ga.

¹⁶ Tsô ka unô je man ve ungwa kpa ve lu vihin Aôndo ishima? Kera ka ve mba ve due ken Igipiti cii sha ikev i Mose la gaa?

¹⁷ Ka unô je man ishima vihi Un a ve je kuma anyom akunduahara? Kera ka ve mba ve er isholibo, akom a ve saa ken taaikôngo la gaa?

¹⁸ Shi ka unô je man A bum a ve er, vea kera nyôr ken mmem Na mayange ga saa di mba ve hembe ato mbala tsô gaa?

¹⁹ Nahan se nenge ve kera fatyô u nyôron ga, sha ci u jighjigh ve u nan ga la.