Mbaheberu 1 - ICIGHAN BIBILO

¹ Ngise yô, Aôndo ôr kwagh a uter sha uprofeti acin imôngo man sha igbenda kposo kposo kpaa,

² kpa ken ayange a masetyô ne yô, A ôr kwagh a vese sha Wan Na u A ver Un dyako sha akaa cii, ka sha a Na kpaa A er tar cii ye.

³ Un yô, ka mmondo u iengem Na man shi eev mbu mlu Na vough kpaa. Ngu a akaa cii sha ave Na sha kwaghôron u sha agee a Na la. Er A wanger asorabo kera yô, A za tema sha uwegh ku yanegh ku Icivirigh.

⁴ A hemba mbatyomov mba Shaav ica je, vough er iti i A ye dyako a mi la kpaa i hembe i ve la nahan.

⁵ Gadia ka hanma ortyom u Sha je man mayange A kaa a nan er: We, U ngu Wan Wam je Mo M mar U nyiana? Man shi: Mo, Me lu Ter Na je, Wen di kpaa Una lu Wan Wama?

⁶ Man zum u A lu ôron u shi nyôron a Wan Na u iunda shin tar la yô, A kaa er: Mbatyomov mba Aôndo cii, ve̱ gure inya, ve̱ civir Un.

⁷ Sha kwagh u mbatyomov mba Shaav yô, A kaa er: Un u A gema mbatyomov Nav mba Shaav ve hingir ahumbe, man shi mba ve eren Un tom kpaa ve hingir iniomborusu.

⁸ Kpa sha kwagh u Wan la yô, A kaa er: Aôndo, ikônough You ki torough yô, ka ki tsôron gbem sha won; ka tôgh ku perapera je, ku lu tôgh ku tartor Wou ye.

⁹ Perapera doo U ishima, U gema U nyagh mvende u vendan atindi la. We Aôndo, ka nahan man Aôndo Wou haa U mkurem ma iemberegh hemba mbakwav Wou ye.

¹⁰ Man shi: We Ter, ka We U tim imagh ki taregh hiihii ye, Sha kpaa, ka tom u sha ave Ou je.

¹¹ Ve, vea saa ishe kpa We yô, U tsôr her gbem. Ve cii vea bee iyol er riga ka a bee nahan.

¹² Ú va hure ve er ikondo i cirin iyol nahan, á musan ve er ka riga nahan, kpa We yô, U ngu di her nahan gbem; anyom a Ou kpaa aa bee je ga.

¹³ Kpa ka hanma ortyom u Sha je man mayange A kaa a nan er: Temam ken uwegh ku yanegh zan zan Me gema mbaihomov Ou vea hingir We kwagh u pendan angahar sha mi.

¹⁴ Ve cii, kera ka ujijingi mba eren tom mba ka i tindin ve u za wasen mba vea ya dyako u myom la gaa?