Mbagalatia 3 - ICIGHAN BIBILO

¹ Kpa! ne Mbagalatia mbalanenkwagh, ka anti nan bum ne, ne mba i tese ne Yesu Kristu u i mande Un sha terankon la sha ashe a en bong ne.

² Ka kwagh ne tseegh i sarem pe fan hen a ven ye: Lu sha aeren a sha tindi man ne ngohol Jijingi yee, shin lu sha mpase u i pase ne kwagh u jighjigh u nan laa?

³ Kape ne lan kwagh je nee? Ne hii ken Jijingi kpa hegen ne mba geman kuren ken iyolo?

⁴ Akaa a ne ye ican sha mi yum ne nahan ka gbilin tsô? Shin lu di gbilin mimi jeo?

⁵ Un u A ne ne Jijingi shi A eren akaa a ageegh ken a ven kpaa ne, ka sha aeren a sha tindi shin ka sha mpase u i pase ne kwagh u jighjigh u nan laa?

⁶ Kape Aberaham kpaa, a na Aôndo jighjigh man i gema kwagh la hingir perapera na je.

⁷ Nahan yô, ne nenge mba ve lu ken jighjigh u nan la, ka ve je ve lu ônov mba Aberaham ye.

⁸ Er icighanruamabera tsenganengen er ka sha jighjigh u nan man Aôndo Una na atôatyev ishô ye, a ôr Aberaham ivangeli tsuaa er: Ka ken we man akuraior a sha won cii aa zua a iveren ye.

⁹ Kape mba ve lu ken jighjigh u nan la, i lu veren ve doo doo a Aberaham u a ne jighjigh la imôngo ne.

¹⁰ Mba ve suur sha aeren a sha tindi cii, mba a ifan iyol. Gadia i nger er: Hanma or u nan we akaa a i nger a ken ruamabera u atindigh la cii iko sha u eren a ga yô, nan ngu a ifan iyol.

¹¹ Nahan wanger er ma or môm nana zua a ishô sha ishigh ki Aôndo sha tindi ga, gadia or u perapera nana lu uma sha jighjigh u nan.

¹² Tindi yô, suur sha jighjigh u nan ga, kpa or u nana eren akaa ne yô, nana lu uma sha mi.

¹³ Kristu paa se, due a vese ken ifan i tindi la kera, A gema A hingir ifan sha ci wase; gadia i nger er: Hanma or u i mande nan nan lu sha kon yô, nan ngu a ifan iyol je:

¹⁴ sha u iveren i dedoo i Aberaham i̱ haa sha atôatyev ken Yesu Kristu, man se̱ ngohol ityendezwa i Jijingi sha jighjigh u nan yô.

¹⁵ Anmgbianev, m gbe ôron kwagh sha inja i or tsô. Iceghzwa i or i sha dyako u karen i i rumun i dedoo la kpaa ma or nana fatyô u bunden i shin u geman i kposo kpaa ga.

¹⁶ Ka Aberaham man i tende zwa a na ye kua vor na. I kaa er “vor imôngo” ga, inja na yô, ka kpishi ga, kpa ngu môm tseegh er, “man shi vor wou”, inja na yô, ka Kristu je la.

¹⁷ Kpa m ngu kaan mer: Ikuryan i Aôndo vande yan la, atindi a a mase van er anyom kar deri unyiin man ikundugber la, a bunde i ga, a kar a ityendezwa la kera ga.

¹⁸ Aluer dyako una dugh ken tindi yô, ma a kera lu sha ityendezwa ga, kpa Aberaham yô, ka sha ityendezwa je man Aôndo rumun un sha mhôôn ye.

¹⁹ Nahan atindi nga a inja sha nyi? Ka sha ci u mbamper mba i per tindi la man i seer a ye, zan zan vor u i tende zwa sha mi la ua kar van. I na a sha mkaa u mbatyomov mba Shaav sha ikev i orhimen.

²⁰ Orhimen yô, nan ngu sha ci u or môm tseegh ga, kpa Aôndo yô, ngu môm tsô.

²¹ Nahan yô, tindi ngu hendan a uityendezwa mba Aôndo shinii? Mayange ga. Gadia aluer a ne tindi u una fatyô u nan uma yô, perapera ma a dugh ken tindi je.

²² Kpa icighanruamabera wuhe akaa cii sha ikev i isholibo sha u ma i ne mbananjighjigh ityendezwa i i lu sha jighjigh u nan ken Yesu Kristu la.

²³ Er jighjigh u nan a lu a va ga yô, i hira kuran se sha ikev i tindi, i wuhe se zan zan á va pase jighjigh u nan u a lu van la ken igbar.

²⁴ Kape tindi a lu orkuran wase u zan a vese ken Kristu sha u i̱ na se ishô sha jighjigh u nan yô.

²⁵ Kpa jighjigh u nan a za ve yô, se kera mba sha ikev i orkuran ga.

²⁶ Gadia ne cii, ne mba ônov mba Aôndo sha jighjigh u nan ken Kristu Yesu.

²⁷ Gadia mba i er ve batisema ken Kristu cii, ve haa Kristu iyol je ve.

²⁸ Or u Yuda kua or u Grika kera ngu ga, kpan kua wan kpaa kera mba ga, nomsoor kua kwase kpaa kera mba ga, gadia ne cii ne mba môm ken Kristu.

²⁹ Aluer ne mba kwagh u Kristu yô, ne mba tsombor u Aberaham je, man ne mba mbayan dyako sha ityendezwa kpaa.