Mbagalatia 1 - ICIGHAN BIBILO

¹ Paulu apostoli u i lu ior ve tindi un ga, i lu or kpaa nan ver un ga, kpa i lu Yesu Kristu A ver un yô, man shi Aôndo Ter u A nder un shin ku la,

² kua anmgbianev mba ve lu a mo cii, se mba sughun iniongo i Kristu i ken Galatia.

³ Mrumun u sha mhôôn a̱ lu sha a ven kua bem mba ve dugh her Aôndo Ter wase man Ter Kristu,

⁴ u A ne iyol Na sha ci u asorabo ase, sha u Una dugh se ken tar u ainge u ifer ne kera, sha ishima i Aôndo Ter wase.

⁵ Iengem i̱ lu i Na gbem sha won, Amen.

⁶ Ka kpiligh mo iyol er ne gbe undun Un u A yila ne sha mrumun u sha mhôôn u Kristu la fefa ne gem ne lu zan sha ivangeli igen kposo nahan;

⁷ man igen ngi ga, ka di asema tsô mbagenev ve lu va kenden ne asema sha ye, sar ve ka goom ivangeli i Kristu.

⁸ Shin a lu se je sea va ôr ne, shin a lu ortyom u a dugh Sha je kpaa una va ôr ne ivangeli igen kposo a i se vande ôron ne la yô, ifan i̱ kôr nan.

⁹ M shi m ngu ôron ne er m vande kaan nahan la mer, aluer ma or nana ôr ne ivangeli igen kposo a i ne vande ngohol la yô, ifan i̱ kôr nan.

¹⁰ Nahan ka ior m lu sendegh a ve hegen shin ka Aôndo? Shin ka ior m lu nôngon u doon ityough a ve ase? Aluer mea lu nôngon u doon ityough a ior heregh yô, ma m kera lu kpan u Kristu je ga.

¹¹ Anmgbianev, m ngu pasen ne sha u fa nen er ivangeli i mo m lu ôron la yô, ka i hen or ga.

¹² Gadia ka hen or man mo m ngohol i ga, ka or nan tesem i kpaa ga, kpa lu sha mpase u Yesu Kristu je.

¹³ Gadia ne ungwa kwagh u zende wam u tsuaa u sha kwagh u Mbayuda la, er m lu tôvon nongo u Kristu u Aôndo a ican ngegh, m nôngo u timin u kera je.

¹⁴ Man m za hemen ken kwagh u Mbayuda je m hemba mbakwav wam mbagenev kpishi ken ityô yam, gadia m nôngo sha ishima i tseen tsung sha akaa a uter av la.

¹⁵ Kpa Aôndo u A tsegham er m lu ngôm ken uya je yô, shi A yilam sha mrumun u sha mhôôn,

¹⁶ zum u i doo Un u pasen Wan Na hen a mo sha u m̱ za pase Un ken atôatyev la yô, fese je m kera ker mhen hen or ga,

¹⁷ m za hen Yerusalem hen mba ve vande lun mbaapostoli a mo la kpaa ga, kpa m gema m za ken Arabia shi m hide ken Damaseku.

¹⁸ Ken masejime, anyom nga kar atar yô, m za sha Yerusalem m za sôr Kefa, m tsa hen na ayange pue kar ataan.

¹⁹ Mbaapostoli mbagenev kpaa m nenge a mô ga, saa di Yakobu, anngô u Ter.

²⁰ Akaa a m lu ngeren ne ne yô, ka sha ishigh ki Aôndo je, ka aie m eren ga.

²¹ Ken masejime yô, m za ken atôôn a Shiria kua Shilishia.

²² Iniongo i Kristu i ken Yudia lu a fam sha ishi ga.

²³ Ve ungwa a ungwa tsô, i kaa er: un u a lu tôvon se a ican la yô, hegen gema ngu pasen jighjigh u nan u a vande nôngon u vihin un kera la.

²⁴ Tsô ve civir Aôndo sha ci wam.