Mbafilipi 2 - ICIGHAN BIBILO

¹ Aluer ma msurshima una lu ken Kristu, man aluer ma ishima i taver i sha dooshima ia lu, shin ma mzough u ken Jijingi una lu shin ma mhôônom ma kôron man mhôônom ma zungwen maa lu yô,

² iv nen iember yam, lu nen a ishima i veren môm, lu nen ken dooshima môm, lu nen ishima i môm, lu nen a mhen môm kpaa.

³ De eren nen kwagh sha u wan ayol a en iko tseegh shin sha u keren icivir i gbilinigh kpaa ga, kpa hide nen ayol a en ijime; hanma or nana̱ nengen er orgen hemba nan yô.

⁴ Hanma or nana̱ de kera waan akaa a nan iyol i nan iko tseegh ga, kpa nana̱ wa akaa a mbagenev iko kpaa.

⁵ Lu nen a mhen ne ken a ven u a lu ken Kristu Yesu la kpaa.

⁶ Un u A lu ken mlu u Aôndo la A nenge er mlu u lun kwagh môm a Aôndo la lu kwagh u yan ishar sha mi ga yô,

⁷ kpa A gema iyol Na hingir gbilin er A tôô mlu u ortom, A hingir kwagh môm a ior la.

⁸ Man er i va zua a Na a mluyol er or nahan yô, A hide a iyol Na ijime, hingir u ungwan kwagh zan zan ar ken ku, man lu ku u terankon je.

⁹ Ka sha ci u nahan man Aôndo A kende Un sha kpishi je ye, A ii Un iti i i hembe hanma iti igen cii,

¹⁰ sha er hanma inyu cii i mba ve lu Sha man mba ve lu shin tar man mba ve lu shin atô u taregh kpaa, ia gure inya ken iti i Yesu yô,

¹¹ man hanma nombor kpaa ua pase er Yesu Kristu ka Ter je sha ci u iengem i Aôndo Ter.

¹² Nahan yô, ne mbadoon mo ishima, er ne vande lun a iko i wan gbem nahan, i̱ de lu sha shighe u mo m lu a ven la tseegh ga kpa i̱ hemba a hemba hegen er m lu a ven ga ne; eren nen tom sha myom wen a mciem man ikarikase iyol

¹³ gadia ka Aôndo je A lu eren tom ken a ven ye, sha u kwagh u a doo Un la a̱ sar ne, shi ne̱ eren sha mi kpaa.

¹⁴ Eren nen akaa cii, ahon a̱ de lu sha mi ga, anyiman kpaa ga,

¹⁵ sha er né lu a acôghol a wan iyol ga, né lu wang, né lu ônov mba Aôndo mba ve lu a ahuar iyol ga yô, ker atô u kov u lun kpe u geseghee ne,

¹⁶ né taan iwanger ken ve er asan a wanger nahan; kusu nen kwaghôron u uma la gbang gbang, i̱ lum kwagh u tan ihagh a mi sha iyange i Kristu, sha u zende wam u̱ de lu u gbilinigh ga, tom wam u sha gbashima la kpaa, u̱ de lu u gbilinigh ga.

¹⁷ Kpa aluer a va urum kera er nagh ku urun nahan sha nagh ku i ne kua icighantom u i er u sha jighjigh wen u nan la kpaa, m ember man m ngu ember a ven imôngo cii.

¹⁸ Ne kpaa, kape ember nen la, shi ember nen a mo imôngo kpaa.

¹⁹ M ngu veren ishima ken Ter mer, me tindi Timoteu her a ven fefa sha u ma m ongo kwagh wen, mo kpaa, ma i doom iyol yô.

²⁰ Gadia m kera ngu a orgen u nan lu ishima i môm a ven u nana ver ishima sha kwagh wen sha mimi nahan ga.

²¹ Gadia mbagenev cii mba keren akaa a ve ayol a ve, kera ka kwagh u Kristu Yesu ga.

²² Kpa un yô, ne fa inja na, a er tom a mo imôngo sha Loho u Dedoo er wan vea ter nahan.

²³ Gadia m ngu veren ishima mer, zum u me fa er kwagh wam una za kure yô, ka un je me tindi un her a ven fese ye.

²⁴ Kpa m ver ishima ken Ter mer, mo kpaa ma m ve fefa.

²⁵ Kpa m nenge doo u tindin Epafroditu her a ven, un yô, ka anmgbian u eren tom a mo imôngo shi ka orutya a mo imôngo u ne tindi un, a va wasem sha gbayol wam yô.

²⁶ Hange un u nengen a ven cii, ishima nyian un er ne za ongo er un lu dedoo ga yô.

²⁷ Man a lu dedoo ga mimi, mgbôghom a ku je, kpa Aôndo zungwe un mhôônom, man ka un tseegh ga, mo kpaa A zungwem sha u i̱ de seer mo ijungwen sha ijungwen ga.

²⁸ Me nôngo tsung u tindin un sha u né zua ishigh a na, né shi né ember, mo kpaa, ishima i nyian i̱ pandem.

²⁹ Nahan rumun nen un doo doo ken Ter sha iember tsung, waan nen ambaaior la iko;

³⁰ gadia shi côhin ma a kpe sha ci u tom u Kristu, a gbihi uma na sha u ivin kwagh u a shi sha iwasen yen i ne wasem la.