Mbafilipi 1 - ICIGHAN BIBILO

¹ Paulu man Timoteu ikpan i Kristu Yesu mba sughun uicighanmbaiorov ken Kristu Yesu, mba ve lu ken Filipi vea mbakuran kua udiakon kpaa.

² Mrumun u sha mhôôn a̱ lu sha a ven man bem mba ve dugh hen Aôndo Ter wase man Ter Yesu Kristu.

³ M sughun Aôndo wam hanma shighe u ka mea umbur ne yô.

⁴ Gbem je, ken hanma msen wam cii, m ngu sônon sha ci wen cii a iember je,

⁵ ka sha ci u ne lu ave a mo imôngo sha u pasen Loho u Dedoo hii sha iyange i hiihii la je, zan zan ar hegen.

⁶ M fa dedoo mer Un u A hii tom u dedoo ken a ven la Una za hemen u eren u zan zan iyange i Kristu Yesu.

⁷ U me hen sha kwagh wen cii nahan yô, kam kwagh u dedoo, gadia ne mbam ken ishima, gadia ken mshirim am man shi ken mpaleghyol u Loho u Dedoo man shi mtim u i tim u la kpaa ne cii ne nyôr nongo a mo ken mrumun u sha mhôôn.

⁸ Gadia Aôndo ka shiada wam er i hangem a ven cii tsung sha mhôônom ma kôron ma Kristu Yesu.

⁹ Man m ngu eren msen mer, dooshima wen a̱ seer a seer ngeen sha kwaghfan man sha hanma mkav cii,

¹⁰ sha er né kar né fa akaa a a hembe lun a inja yô, nahan né lu wang né lu a acôghol a wan iyol ga sha iyange i Kristu,

¹¹ né iv a atam a perapera a a lu sha Yesu Kristu la sha ci u icivir man iwuese i Aôndo.

¹² Sarem pe fa nen anmgbianev, kwagh u a erem ne gema hingir mzehemen u Loho u Dedoo,

¹³ je hingir ken igbar ken ya u mbakuran mba Shisar cii man mbagenev cii kpaa er ikangenev mbi i kangem ne ka sha ci u Kristu je,

¹⁴ man anmgbianev mba ken Ter mba ve zough a ishima i taver sha ikangenev yav, mba ve hembe cihin u ôron kwaghôron u Aôndo, ve kera cie ga yô, ve hemba ngeen.

¹⁵ Mbagenev mba pasen kwagh u Kristu kpa ka sha iwuhe man ahendan, mbagenev di yô, ka sha mimi ve lu pasen ye.

¹⁶ Mban yô, ka sha dooshima gadia ve fa er i verem sha ci u mpaleghyol u Loho u Dedoo yô.

¹⁷ Kpa mbagenev mbala yô, ka sha u wan ayol a ve iko tseegh ve lu pasen kwagh u Kristu ye, ka sha mimi ga, mba veren ishima u seer mo ican ken ikangenev yav.

¹⁸ Tsô á er nana? A lu nan nan kpaa mba pasen kwagh u Kristu je, a lu sha ayom, shin a lu sha mimi kpaa, man ka sha kwagh la je m lu ember ye man shi me va ember kpaa.

¹⁹ Gadia m fa, kwagh ne una va hingir mwar wam sha mbamsen enev man sha iwasen i Jijingi u Yesu Kristu,

²⁰ er m keghen tsung shi m veren ishima kpaa mer, ma m ye kunya sha kwagh môm môm ga, kpa i̱ civir Kristu ken iyol yam vangertiôr je hegen kpaa er i vande lun keke ne nahan, shin a lu sha uma, shin a lu sha ku kpaa.

²¹ Mo yô, u lun uma, kam Kristu man u kpen gema kam a ka mtsera.

²² Mea lu uma ken iyol her yô, á lum tom u umen atam, yô, m kera fa kwagh u me tsuwa ga.

²³ Asema hingir mo ahar. Sarem ka yemen za lun vea Kristu, gadia nahan hemba doon yum.

²⁴ Kpa u shi lun ken iyol her yô, á hemba lun ne a inja.

²⁵ Er i wanger mo nahan yô, m fa, me lu her man me lu a ven cii her kpaa, sha ci u né za hemen man né lu a msaanyol u sha jighjigh u nan kpaa.

²⁶ Ka sha u nea lu a ityôikaa i tan ihagh ken Kristu Yesu sha ci wam yô aluer me shi me hide her a ven yô.

²⁷ Kpa kwagh môm yô, mlu wen a̱ kuma sha Loho u Dedoo u Kristu, sha u shin mea va mea va zua ishigh a ven shin mea va ga kpaa, ma m ongo kwagh wen mer, ne tile dông, ne mba ken jijingi môm ne mba ishima i môm, ne mba nôngon imôngo sha ci u jighjigh u nan u sha Loho u Dedoo la.

²⁸ Mbahendan a ven mbala, kwagh ve môm a̱ de te ne mciem iyol ga. Kwagh ne yô ngu tesen ikav sha mtim ve, kpa ne yô, gema tese sha myom wen; man myom ne yô, ka her Aôndo a dugh ye.

²⁹ Ne yô, i rumun ne sha mhôôn er sha kwagh u Kristu yô, ka jighjigh tseegh né na Un ga, kpa né ya ican sha ci Na kpaa,

³⁰ er ne lu nôngon ityav sha ican tsung imba i ne nenge a mi ken a mo shi ne lu ungwan sha a mo hegen kpaa la.