Mbaefese 6 - ICIGHAN BIBILO

¹ Ne ônov, ungwan nen imo i mbamaren enev [ken Ter]. Gadia ka nahan je i lu vough ye.

² Civir teru man ngôu, ka tindi u hiihii u ityendezwa i lu sha mi je la,

³ ka nahan man á kpe u iyol man ú tsa sha won ye.

⁴ Ne uter kpaa, de eren nen a ônov enev er vea yuwe ga kpa yese nen ve sha mkôôm man kwaghwan u Ter.

⁵ Ne mbashirentom kpaa, ungwan nen imo i mba ve lu uter enev ken iyol la sha mcie man ikarikase iyol kpaa, i̱ lu sha mimi u ken asema a en er ka Kristu nahan.

⁶ I̱ de lu tom u sha ashe a ior tsô er ka mbadoon ityough a ior nahan ga, kpa i̱ lu er mbashiren Kristu tom mba ve eren ishima i Ter a ishima i môm yô.

⁷ Eren nen tom sha gbashima er ka Ter ne eren Un tom nahan i̱ de lu er ka ior ga,

⁸ gadia ne fa hanma kwagh u doon u or nan eren la, nana shi nana ngohol un hen Ter, shin nan lu kpan, shin nan lu kpan ga kpaa.

⁹ Man ne uter kpaa, eren nen a ve nahan, de kera te nen kume a ve ga, gadia ne fa Ter ve man u wen ngu Sha man u sangen sha dooshima yô, ngu ker a Na ga.

¹⁰ Kwagh ugen yô, taver nen ken Ter sha tahav mbu agee a Na.

¹¹ Huwa nen ikav mbi utyav mbi Aôndo cii iyol sha u né fatyô u tilen dông hendan a ayom a diabolo yô.

¹² Gadia kera ka awambe man inyam se lu nôngon ityav a ve ga, kpa ka mbatarev man mbautahav man mba ve lu utor sha tar cii mba ime ngin ne, man ujijingi mba aferev mba sha ajiir a Sha.

¹³ Sha ci u nahan yô, tôô nen ikav mbi utyav mbi Aôndo cii sha u né fatyô u tilen dông sha iyange i ifer yô, man zum u né kure akaa cii né tile her yô.

¹⁴ Nahan yô, tile nen, tsule nen kwange hen uya, ka mimi je la, har nen perutya iyol, ka perapera je la,

¹⁵ man wa nen akôv shin angahar, ka mkoholyol u sha ivangeli i bem je la.

¹⁶ Er ne lu a akaa ne cii yô, shi tôô nen akuvautya, ka jighjigh u nan je la, u né fatyô u pirin avaan a usu a orbo la a mi cii yô.

¹⁷ Shi tôô nen agunduutya u iyôô, ka myom je la; kua sanker u Jijingi, ka mkaanem ma Aôndo je la.

¹⁸ Eren nen msen hanma shighe ken Jijingi sha hanma msen man mzamber cii. Luun nen per sha mi sha ishima i taver man sha mzamber sha ci u uicighanmbaiorov cii,

¹⁹ man sha ci wam kpaa sha er ma i nem kwaghôron zum u me bugh zwa sha u me pase kwagh u myer u Loho u Dedoo vangertiôr,

²⁰ u m lu ortom u u ken mshirim man ne, sha u me yôô u gbar gbar er i doo u me ôr yô.

²¹ Tikiku, anmgbian u doon ishima man ortom u jighjigh ken Ter una pase ne akaa cii sha u ne kpaa né fa mlu wam man kwagh u m lu eren yô.

²² M tindi un her a ven ka sha ci u kwagh ne jim sha u né fa kwagh wam man a̱ sur ne asema kpaa yô.

²³ Bem a̱ lu sha anmgbianev, man dooshima u a lu a jighjigh u nan sha mi, mba ve dugh her Aôndo Ter man Ter Yesu Kristu.

²⁴ Mrumun u sha mhôôn a̱ lu sha a ve mba Ter wase Yesu a doo ve ishima sha dooshima u been ga la, cii.