Mbaefese 3 - ICIGHAN BIBILO

¹ Ka nahan je man mo, Paulu, m lu orkwar u Kristu sha ci wen ne atôatyev ye,

² gayô ne ungwa kwagh u tom u i wem sha ikev sha ci wen la sha mrumun u sha mhôôn u Aôndo,

³ ka sha mpase je i pasem, m fe kwaghmyer la ye er m nger ne sha nahan, m tôndo a tôndo.

⁴ Aluer ne ôr ngula yô, ne fatyô u fan mkav wam u m kav kwagh u myer u Kristu la.

⁵ Ken ikov igen yô, i lu a pase ônov mba iorov kwagh ne er hegen i pase uicighanmbaapostoli Nav kua uprofeti ken Jijingi nahan ga,

⁶ er atôatyev kpaa a lu mbayandyako imôngo man iyol i môm man nongo môm a vese sha ityendezwa i ken Kristu Yesu sha Loho u Dedoo.

⁷ M hingir ortom u u sha mne u i nam sha mrumun u sha mhôôn u Aôndo, ka sha m-ertom u agee a Na la.

⁸ Mo u m hembe gban ijime ken uicighanmbaiorov cii yô, i nam mrumun u sha mhôôn ne u ôron atôatyev Loho u Dedoo u mngee u Kristu A ngee a akaa i gande u tôvon la,

⁹ man shi u pasen wanger wanger er tom u sha kwaghmyer la u lu yô; kwaghmyer ne lu myer ken Aôndo u A gbe akaa cii, hii je er shighe lu a lu ga la.

¹⁰ Ka sha u hegen nongo u Kristu u̱ pase mbatarev man mbautahav mba sha ajiir a Sha la ve̱ fa kwaghfan u Aôndo u a dumbur la,

¹¹ ka sha awashima Na u tsôron u A kure ken Kristu Yesu Ter wase la.

¹² Ken a Na yô, se mba a vangertiôr man ian i nyôron gbar gbar sha jighjigh u se ne Un la.

¹³ Nahan m ngu zamber a ven mer, asema a̱ de yen ne sha atsan a am a m lu yan sha ci wen la ga. Ka icivir yen je la.

¹⁴ Sha ci u nahan yô, m ngu guren anu sha ishigh ki Ter

¹⁵ u hanma nongo u Sha kua u shin tar cii u lu zuan a iti her a Na la.

¹⁶ M ngu sônon mer, A̱ na ne sha iengem Na i ngeen yum la, i̱ taver ne ne̱ lu a agee sha Jijingi Na ken uma u ken semayolough,

¹⁷ Kristu A̱ tema ya ken asema a en sha jighjigh u nan er ne we amise ken dooshima, i tim ne ker dông yô,

¹⁸ i̱ na ne agee a uicighanmbaiorov imôngo cii u kaven er igbanger man iniembe man mtav man mze

¹⁹ u dooshima u Kristu u a gande u fan la a lu yô man shi u kaven un, sha u né iv zan zan m-iv u Aôndo cii.

²⁰ Un yô, A fatyô u eren kwagh sha agee a a lu eren tom ken vese la je á hemba kwagh u se sen shi se lu henen la ica je kpaa.

²¹ Icivir i̱ lu i Na ken nongo u Kristu man ken Kristu Yesu sha ikov ikov gbem sha won.