Mbaefese 2 - ICIGHAN BIBILO

¹ Man ne kpaa, A na ne uma, ne mba ne lu kpenegh ken gbev mbu nôngon kua asorabo a en

² a ne vande zenden sha mi sha inja i mlu u tar u ainge ne, sha inja i tor u tahav mbu ahumbev, ka jijingi u a lu eren tom hegen ken ônov mba ihembeato.

³ Ngise se cii kpaa se lu ken ve ken asaren a ayol a ase, se lu eren sha mbamhange mba ken iyol man mba ken mhen wase, man se lu ônov mba iyughuv sha marami vough er mbagenev di nahan.

⁴ Kpa Aôndo ngee a mhôônom ma zungwen, ka sha dooshima Na u vesen u se doo Un ishima la man A na se uma a Kristu imôngo je

⁵ er se lu kpenegh ken gbev mbu nôngon la ye, ka sha mrumun u sha mhôôn i yima ne ye,

⁶ man A nder se a Na imôngo, A ver se se tema a Na imôngo sha ajiir a Sha ken Kristu Yesu.

⁷ Ka sha u ken ayange a a lu van ken hemen la Una pase mrumun Na u sha mhôôn u a ngee yum, a hemba sha won la, sha a vese ken Kristu Yesu.

⁸ Gadia ka sha mrumun u sha mhôôn i yima ne ye, sha jighjigh u nan. Man kwagh ne yô, ka her a ven a dugh ga, ka iwua i Aôndo.

⁹ Ka sha tom u eren ga, sha er ma or nana̱ de te ihagh ga.

¹⁰ Gadia se mba tomaveegh Na, i gba se ken Kristu Yesu sha ci u aeren a dedoo a Aôndo vande sôron sha u se̱ zenden sha mi yô.

¹¹ Nahan yô, umbur nen er ngise ne lu atôatyev ken iyol; mba i yer ve iti sha icôngo i ka i er ken iyol sha ave la yô, ve gema ve yilan ne er mbaipusuv.

¹² Shi umbur nen er ken shighe la ne lu paleghaa a Kristu je, ne lu a kwar ken nongo u Iserael ga, ne lu mba ken inya sha kwagh u uikurmbayan mba sha ityendezwa, ne lu a ishimaverenkeghen ga, ne lu a Aôndo shin tar kpaa ga.

¹³ Kpa hegen ken Kristu Yesu yô, ne mba ngise ne lu ica, ne hingir ikua ikua sha awambe a Kristu.

¹⁴ Gadia ka Un A lu bem wase ye, A gema ve uhar cii hingir kwagh môm, A hembe kpekpe u ihom u ker atô la kera; ka ken iyol Na

¹⁵ man A bunde tindi u akaawan a a lu sha gbaaôndo la kera ye, sha u Una gema ve uhar cii Una gba or u he môm, ken iyol Na, Una va haa bem,

¹⁶ Una hime ve uhar cii ken iyol môm a Aôndo sha terankon, ka sha u man A wua ihom kera ye.

¹⁷ Man A va a Loho u Dedoo A yôô bem sha ci wen mba ne lu ica man bem sha ci u mba ve lu ikua ikua kpaa.

¹⁸ Gadia ka sha a Na man se uhar cii se lu a ian i nyôron hen Ter ken Jijingi môm ye.

¹⁹ Nahan yô, ne kera mba mbavannya kua ushirmbaiorov ga, ne mba nongo môm a uicighanmbaiorov ne mba mba ken ya u Aôndo je,

²⁰ i maa ne sha imagh ki mbaapostoli kua uprofeti, Kristu Yesu iyol Na ka iwen i sha zongo.

²¹ Ka ken a Na man kwaghmaan la a zough a lu taven sha, hingir icighantempel u Ter ye.

²² Ka ken a Na man ne kpaa i lu maan ne ne hingir iyou i tsan i Aôndo ken Jijingi ye.