Mbaajiriv 6 - ICIGHAN BIBILO

¹ Mbaiserael shi er kwaghbo sha ishigh ki TER; nahan TER na ve sha ikev i Midian anyom ataankarahar.

² Midian hemba Iserael agee; ka sha ci u Midian Mbaiserael er ajiir a yeren, a a lu sha iwo la ye, kua ubar man agar a sha iwo la kpaa.

³ Zum u Iserael a lôô iyiav yô, Mbamidian ve va kua Mbaamaleki a ior mba sha vegher u sha ityoughkitaregh la, ve va nôngo ityav a ve;

⁴ ve haa afoautya hen ve, ve vihi ve iyiav zan zan za nyôr hen Gasa; ve undu ma kwaghyan ken Iserael ga, shin iyôngo, shin bua, shin jaki kpaa ga.

⁵ Gadia ve va a uzendenya vev man utenti vev, ve va kpishi er ikomon nahan, ve kua urakumi vev, iyenge ve gande u ôron; kape ve va, ve va vihi tar la.

⁶ Mbaiserael kungu ican sha kwagh u Midian la; nahan Mbaiserael vaa a TER.

⁷ Tsô zum u Mbaiserael vaa a TER sha kwagh u Midian la yô,

⁸ TER tindi Mbaiserael a profeti ugen, a va kaa a ve er: TER, Aôndo u Iserael, ngu kaan nahan er: Mo M due a ven ken Igipiti, M due a ven ken ya u ikpan kpaa;

⁹ M yima ne sha ikev i Mbaigipiti kua sha ikev i mba ve eren ne ican cii, shi M zenda ve sha ishigh yenegh kera kpaa, M na ne tar ve;

¹⁰ man M kaa a ven Mer: Ka Mo TER, Aôndo wen; de cie nen mbaaôndo mba Amor mba ne tem ken tar ve ne ga; kpa ne ver ato sha imo Yam ga.

¹¹ Tsô Ortyom u TER va, va tema hen itinekon i terebin i i lu hen Ofera, i Yoashi, Orabieser la, hen shighe la wan na Gidion gema lu gbidyen alakema ken ihungwa i shoghol wain, sha u yeren Mbamidian a mi.

¹² Tsô Ortyom u TER va ande her a na, kaa a na er: TER ngu a we, we orageegh u tseen ishima sha kwagh.

¹³ Tsô Gidion gema kaa a na er: Ku! Terem, aluer TER Una lu a vese yô, er nan man akaa ne cii a tser se nahana? Man aeren a Na a kpilighyol cii nga hana, a uter asev lu ôr se la, er: Ka TER iyange due a vese ken Igipiti ye ga? Kpa ahegen yô, TER gbihi se, A gema se, A na sha ikev i Mbamidian.

¹⁴ TER gema her a na, A kaa er: Yô, za a agee ou ne, za yima Iserael sha ikev i Midian; ka Mo M tindi u ye gaa?

¹⁵ Tsô, a kaa a Na er: Tere, ka sha nyi je me yima Iseraele? Nenge, ken Manase cii nongo wam hemba ndahar, man mo kpa hen ya u terem m hemba gban ijime.

¹⁶ Tsô TER kaa a na er: Mimi je, Me lu a we, ú hemba Mbamidian er ka or môm nahan.

¹⁷ Nahan a kaa a Na er: Aluer a doo U a mo yô, tesem ikav, m̱ fa er i lu We U er kwagh a mo yô.

¹⁸ Shi de moughon heen ve ga, saa me hide sha ishigh You. A rumun er: Me tema zan zan ú hide.

¹⁹ Tsô Gidion nyôr, za sôngo wanivo, shi a er akpekpa u lun a kwa sha min ga, sha mwem ma ma kom efa môm yô; inyam la, a wa shin ikese, man iue yô, a haa shin tsua, a due a mi a va na Un hen itinekon i terebin la.

²⁰ Tsô Ortyom u Aôndo kaa a na er: Tôô inyam la kua akpekpa u lun a kwa sha mi ga la, penda sha iwen ne, gema iue la, haa sha mi; tsô a er nahan.

²¹ Nahan Ortyom u TER naregh ityô i gbough ku ku lu Un sha uwe la, bende sha inyam kua akpekpa u lun a kwa sha mi ga la; tsô usu due ken iwen la, hia inyam kua akpekpa u i we kwa sha mi ga la; tsô Ortyom u TER ndiir un ashe.

²² Nahan Gidion kav er A lu Ortyom u TER yô; Gidion kaa er: M saa ve Tere, AÔNDO! gadia m nenge a Ortyom u TER ishigh a ishigh.

²³ Tsô TER kaa a na er: Ishima i̱ de nyian we ga, de cie ga; ú kpe ga.

²⁴ Tsô Gidion ta TER atse a nanden nagh sha mi her, a ii a iti er: Yehova-shalom (TER ka bem); nga her ken Ofera u Mbaabieser zan zan nyian.

²⁵ Tsô hen tugh mbula je TER kaa a na er: Kôr nombua u teru, nombua u sha uhar u a kom anyom ataankarahar la, hembe atse a Baal a nanden nagh sha mi a teru la kera, shi gber Ashera u a lu hen a la kera;

²⁶ yô, ta TER, Aôndo wou, atse a nanden nagh sha mi sha inja dedoo, sha ityough ki igungu u i maa garutya sha mi ne; tôô nombua u sha uhar la, na nagh ku nanden sha kon u Ashera u u gber la.

²⁷ Tsô Gidion pande mbatomov nav ior pue, a er er TER kaa un nahan; kpa er a lu cian anngôôv nav man ior mba ken gar yô, a er tom la atetan ga, a er u tugh.

²⁸ Zum u ior mba hen gar nder pepe pepe yô, ve kav i hembe atse a Baal, shi i gber Ashera u a lu hen a la kpaa, man i na nagh sha nombua u sha uhar la, sha atse a nanden nagh sha mi a i ta la kera ve.

²⁹ Tsô ve gba kaan ayol a ve er: Ka an nan er kwagh nee? Mba tim sha mi, shi mba pin yô, ve kaa er: Kwagh ne ka Gidion wan u Yoashi, a er ye.

³⁰ Tsô ior mba hen gar la kaa a Yoashi er: Due a wan wou, i̱ wua un, gadia a hembe atse a Baal, a gber Ashera u a lu hen a la kera kpaa.

³¹ Tsô Yoashi kaa a mba ve mough num a na mbala er: Ne, né nôngo sha ci u Baala? Né yima unu? Or u nan nenge sha ci na yô, á wua nan pepe ne je; aluer una lu aôndo je yô, a̱ nôngo iyol na, sha er i hembe un atse a nanden nagh sha mi yô.

³² Sha iyange la je maa a yila un iti er Yerubaal, a kaa er: De Baal a̱ nôngo num a na; sha ci u a hembe un atse a nanden nagh sha mi yô.

³³ Zum la, Mbamidian cii man Mbaamaleki kua ior mba sha vegher u sha ityoughkitaregh la, ve kohol ijiir i môm; ve per ve va haa afo shin pev u Yesereel.

³⁴ Tsô Jijingi u TER va iv Gidion, nahan a tôngo korough; tsô Mbaabieser kange iyol i utya dondo sha a na.

³⁵ A tindi mbatyomov hen Manase cii; ve kpaa ve kange iyol i utya ve dondo sha a na; shi a tindi mbatyomov hen Asher man hen Sebulon kua Nafetali kpaa; ve kpaa ve va, ve va kohol ve.

³⁶ Tsô Gidion kaa a Aôndo er: Aluer Wea yiman Iserael sha ikev yam mimi, er U kaa nahan yô,

³⁷ nenge, me ver aive a iyôngo sha vande u gbidyen alakema la, aluer avure aa gba sha aive la tseegh, man inya cii ia lu tseghe tseghe yô, nahan me fa, yiman You Iserael sha ikev yam er U kaa nahan.

³⁸ Kape lu di je la; gadia kper nan a mough pepe, a kam aive a iyôngo la, avure haa iv tasa poo.

³⁹ Tsô Gidion kaa a Aôndo er: Ishima i̱ de vihin We a mo ga, me mase ôron kwagh môm ne tsô; shi de m̱ mase karen sha aive a iyôngo ne kwa môm ne tsô; aive ne tseegh a̱ lu tseghe tseghe ye, kpa inya yô, i̱ gba avure.

⁴⁰ Aôndo er nahan hen tugh mbula; gadia aive a iyôngo la tseegh lu tseghe tseghe ye, kpa inya cii, gba avure.