Mbaajiriv 21 - ICIGHAN BIBILO

¹ Yô, ior mba Iserael vande bumun hen Misepa, kaa er: Mô wase môm nana̱ de ne wan u nan u kwase er Benyamin a̱ er ga.

² Tsô ior va hen Betel ve tema her sha ishigh ki Aôndo zan zan iyange kar been, ve ger mliam ve vaa tsung.

³ Ve kaa er: TERE, Aôndo u Iserael, er nan man kwagh ne a er ken Iserael nahana? Er kwe u ken Iserael môm, u kera lu ga nee?

⁴ Tsô kper nan pepe yô, ior mough faa, ve ta atse a nanden nagh sha mi, hen ijiir la, ve na iniav mbi nanden kua iniav mbi bem.

⁵ Nahan Mbaiserael pine er: Ka hanma kwe u Iserael u ve hen mkohol u TER ga? Gadia ve bum mimi mimi er, or u nan ve hen Misepa hen TER ga yô, á wua nan kpee.

⁶ Mhôônom kôr Mbaiserael a anngô ve Benyamin, ve kaa er: I dugh kwe môm ken Iserael kera nyian.

⁷ Tsô se er nan man mba ve shi mban vea zua a kaseva? Gadia se bum a TER, ser: Sé na ve ônov asev mba kasev, ve̱ er, ga.

⁸ Nahan ve pine er: Ka hanma kwe u Iserael u ve hen TER hen Misepa ga? Yô, lu Yabeshi-gileadi, ma or ve môm mough va hen afo hen mkohol ga.

⁹ Gadia zum u i ôr iyenge i ior yô, i zua a ma or u ken mba ve tem ken Yabeshi-gileadi la her ga.

¹⁰ Tsô mkohol la tindi ior dubu pue kar uhar mba fan ityav, ve kaa a ve er: Za, za wua nen mba ve tem ken Yabeshi-gileadi sha zwa u sanker, kasev kua mbayev kpaa.

¹¹ Ka kwagh u er nen je ne: Wua nen hanma nomsoor man hanma kwase u nan vande yaven a or.

¹² Tsô ve zua a anuunaukase deri unyiin hen mba ve tem ken Yabeshi-gileadi la, mba ve lu a yav a or mayange ga yô; ve va a ve hen afo hen Shilo u ken tar u Kanaan.

¹³ Nahan mkohol u ior cii tindi, i za ôr kwagh a Mbabenyamin mba ve lu hen vande u Rimon la, er i hime a ve ve.

¹⁴ Hen shighe la Mbabenyamin hide, ve na ve kasev mba i de ve uma ken kasev mba Yabeshi-gileadi la; nahan kpaa ve lu a kuma sha a ve ga.

¹⁵ Tsô mhôônom kôr ior a Benyamin, gadia TER vihi kwe ken Iserael kera.

¹⁶ Tsô mbatamen mba mkohol u ior kaa er: Sé er nan man sé zua a kasev sha ci u mba ve shi mbala, gadia i wua kasev ken Benyamin kera.

¹⁷ Ve kaa er: Dyako a̱ lu sha ci u mba ve wer ken Benyamin ne kpee je, sha er i̱ de koughon kwe môm ken Iserael kera ga yô.

¹⁸ Nahan kpaa, se fatyô u nan ve ônov asev mba kasev, ve̱ er ga; gadia Mbaiserael vande bumun, er: Ifan i̱ kôr or u nana na Benyamin kwase la.

¹⁹ Tsô ve kaa er: Nenge, iniongo i TER ngi sha anyom anyom ken Shilo u a lu Betel vegher u ken imbusutarimese la, man a lu hen gbenda u u dugh ken Betel u zan Shekem la, vegher u sha ityoughkitaregh la, shi a lu Lebona vegher u ken imbusutariyan la.

²⁰ Nahan ve kaa a Mbabenyamin er: Yem za nen ken ishule i ikon i wain;

²¹ nenge nen, aluer ônkasev mba Shilo vea due sha u vinen amar yô, due nen ken ishule i ikon i wain la, hanma nomsoor nana̱ kôr kwase u nan ken ônkasev mba Shilo la, nana̱ yem ken tar u Benyamin.

²² Tsô aluer uter vev shin anngôôv vev vea va sha u va yilan ijir her a vese yô, sé kaa a ve ser: Gema nen ve, na nen se, gadia se zua a kasev ken utya sha ci ve ser ser ga; man ka ne, ne ne ve ga; á lu nahan yô, ma ne lu a ibo hegen.

²³ Tsô Mbabenyamin er nahan, ve kôr kasev sha iyenge ve vough ken mbavinenamar mbala, ve yem a mi; maa ve mough, ve hide hen dyako ve, ve za maa agar, ve tema ker.

²⁴ Tsô Mbaiserael mough hen ijiir la, sha ayange la, hanma or yem hen kwe u nan, man ior mba nan; ve mough heela hanma or yem ken dyako u nan.

²⁵ Sha ayange la tor lu ken Iserael ga; nahan hanma or gbaa eren kwagh sha ishima i nan tsô.