Mbaajiriv 20 - ICIGHAN BIBILO

¹ Tsô Mbaiserael cii mough, mkohol u ior cii zua er ka or môm yô, hii hen Dan je za ar hen Bersheba, man mba ken tar u Gileadi kpaa; ve va hen TER hen Misepa.

² Tsô mbavesen mba ior cii, ka mba sha ikwe i Iserael la cii, va tile ken mkohol u ior mba Aôndo; ior mba zan angahar lu dubu deri unyiin mba tsuwan sanker.

³ Tsô ônov mba Benyamin ungwa er Mbaiserael kôndo za sha Misepa. Nahan Mbaiserael kaa er: Ôr nen ase, er i hii man iferkwagh ne i er yô.

⁴ Tsô Orlevi, nom u kwase u i wua la, gema kaa er: M va ken Gibea u Benyamin, mo vea kpankwase wam, se va tsa her.

⁵ Tsô ior mba Gibea mough num a mo, ve kase ya u m lu ker la tugh; ka mo je ve lu nôngon u wuan ye, man ve nzughul a kpankwase wam zan zan maa a kpe.

⁶ Tsô m tôô kpankwase wam, m bur un aci, m tindi a mi ken tar u dyako u Iserael cii; gadia ve er daangkwagh man kwaghbo u vihin ken Iserael yum.

⁷ Nenge, ne Mbaiserael, ne cii, ôr nen mnenge wen kua mhen wen kpaa.

⁸ Nahan ior cii mough er ka or môm yô, ve kaa er: Or môm môm nana hide ken tenti u nan ga, man or wase môm môm kpaa nana hide ken ya u nan ga.

⁹ Kpa hegen yô, kwagh u sé er Gibea yô, sé za nôngo ityav a na sha ishor i eren;

¹⁰ sé tsuwa ior pue ken hanma deri, ken ikwe i Iserael cii, man deri ken dubu, man dubu ken dubu pue, ve̱ za ve̱ za tôô kwaghyan sha ci u ior; shighe u vea hide yô, sé za or iyev sha Gibea u Benyamin sha ci u kwaghbo u vihin u ve er ken Iserael la cii.

¹¹ Nahan ior mba Iserael cii kohol hen gar la, ve kange ishima ishima i môm.

¹² Tsô ikwe i Iserael tindi ior za ken kwe u Benyamin cii, ve kaa er: Ka nyi imbaiferkwagh ne i er ken a ven nahana?

¹³ Hegen yô, dugh nen udangmbaiorov mba ken Gibea la, se̱ wua ve, se̱ dugh iferkwagh ne ken Iserael kera. Kpa Mbabenyamin rumun u ungwan imo i anmgbianev vev, Mbaiserael, ga.

¹⁴ Nahan Mbabenyamin due sha agar cii, ve kohol imôngo hen Gibea sha u vea nôngo ityav a Mbaiserael.

¹⁵ I ôr iyenge i Mbabenyamin ken agar sha iyange la, ve lu ior dubu ikundu kar ataratar mba ve kuma u tsuwan sanker yô, i seer iyenge i mba ken Gibea sha min ga, iyenge ve lu deri utaankaruhar, ve lu uicuwanmbaiorov.

¹⁶ Ken ior ne cii, uicuwanmbaiorov lu deri utaankaruhar mba eren imese; hanmô ve nan fatyô u keren iwen tan gwarce, á kar ga.

¹⁷ I ôr iyenge i Mbaiserael, kpa i dugh Benyamin kera, ve lu ior dubu deri unyiin mba ve kuma u tsuwan sanker, ve cii ve lu mbautyav.

¹⁸ Tsô Mbaiserael mough kôndo sha Betel, za pine ishima i Aôndo; ve kaa er: Ka unô ken vese vea vande zan sha u za nôngon ityav a Mbabenyamin? TER kaa er: Yuda a̱ vande.

¹⁹ Nahan Mbaiserael mough pepe, za haa afoautya hen Gibea.

²⁰ Tsô ior mba Iserael due sha u za nôngon ityav a Benyamin, ior mba Iserael samber ityav a ve hen Gibea.

²¹ Mbabenyamin due ken Gibea wua ior haa inya dubu ikundu kar uhar ken Mbaiserael sha iyange la.

²² Tsô mbautyav, ior mba Iserael, taver asema ayol a ve, ve shi ve samber ityav henpe ve vande samber ityav sha iyange i hiihii la.

²³ Tsô Mbaiserael kôndo za vaa sha ishigh ki TER zan zan iyange kar been, ve pine TER er: M̱ shi m̱ kporom, m̱ za nôngo ityav a Mbabenyamin anngôm la shinii? TER kaa er: Za, za nôngo ityav a na.

²⁴ Tsô Mbaiserael kporom sha u nôngon ityav a Benyamin sha iyange i sha uhar la.

²⁵ Benyamin kpaa due ken Gibea sha iyange i sha uhar la, sha u nôngon ityav a ve, a shi a wua ior a haa inya dubu pue kar anigheni ken Mbaiserael; ve cii ve lu mbatsuwan sanker je.

²⁶ Tsô Mbaiserael cii, kua ior cii, ve kôndo sha Betel, ve za vaa, ve lu sha ishigh ki TER hen ijiir la, ve hôr kwaghyan sha iyange la zan zan iyange kar been; ve na iniav mbi nanden man iniav mbi bem sha ishigh ki TER.

²⁷ Nahan Mbaiserael pine TER (gadia areki u ikuryan i Aôndo lu heregh, hen ayange la,

²⁸ man Pinehashi wan u Eleasar wan u Aron lu tilen sha ishigh ki areki hen ayange la), ve kaa er: M̱ shi m̱ due m̱ za nôngo ityav a anngôm Benyamin, shin m̱ de? TER kaa a ve er: Kôndo nen, gadia kper Me na un sha ikev you.

²⁹ Tsô Iserael ver ior yer, kase Gibea tser.

³⁰ Tsô sha iyange i sha utar la Mbaiserael za sha u za nôngon ityav a Mbabenyamin, ve samber ityav hen Gibea er lu ve er acin a tsuaa la nahan.

³¹ Mbabenyamin due sha u nôngon ityav a ior, i mee ve, ve undu gar; tsô ve hii u wuan ior sha uigbudu er acin a tsuaa la nahan; igbudu ugen yem hen Betel man ugen nyôr ikôngough yem hen Gibea, ve wua ior er ikundugber nahan ken Iserael.

³² Tsô Mbabenyamin kaa er: I hemba ve sha ishigh yasegh er tsuaa la nahan. Kpaa Mbaiserael kaa er: Sé yevese nen, sé mee nen ve, ve̱ undu gar, ve̱ va sha uigbudu.

³³ Tsô ior mba Iserael cii mough henpe ve lu la, ve samber ityav hen Baal-tamar; man ior i Iserael i i yer la kpaa hembe henpe ve yer hen ijiir i kpuun kpuun i hen Gibea la.

³⁴ Tsô uicuwanmbaiorov dubu pue mba i sange ve ken Iserael cii mough gba nôngon ityav a Gibea; ityav mbila taver tsung; kpa ve fa er kwagh u bo una tser ve je ga.

³⁵ TER hemba Benyamin sha ishigh ki Iserael; Mbaiserael tim Mbabenyamin sha iyange la, ior dubu ikundu kar utaan man deri môm; ve cii ve lu mbatsuwan sanker je.

³⁶ Tsô Mbabenyamin kav er kwagh a hembe ve yô, gadia ior mba Iserael na Mbabenyamin ian, sha er ve lu suur sha mbayeren mba ve ver ve hen Gibea la yô.

³⁷ Tsô mbayeren mbala hembe ta sha Gibea; man shi ve kar ve yem hemen ve hemba gar la cii sha zwa u sanker.

³⁸ Man ikav i ior mba Iserael ver mbayeren mbala yô, er, ve̱ er zegemnyi ken gar, a̱ kôndo sha er ibeenegh nahan.

³⁹ Tsô ior mba Iserael gema ishigh ken utya, nahan Benyamin gba wuan ior mba Iserael er ior ikundugber nahan; gadia ve kaa er: Mimi je, i hemba ve sha ishigh yasegh er ityav mbi hiihii la nahan.

⁴⁰ Tsô mnyim hii u duen ken gar, er ityôgh ki ibeenegh nahan. Mbabenyamin mba gem ashe yô, gar cii gba usu hia, mnyim kôndo sha.

⁴¹ Tsô ior mba Iserael gema ishigh, nahan mciem gba ior mba Benyamin iyol; gadia ve kav er kwagh u bo a tser ve yô.

⁴² Tsô ve na ijime hen ior mba Iserael, ve nyôr gbenda u desereti, kpa ityav kohol ve; mba ve due ken agar kpaa wua ve ken atô u a.

⁴³ Ve kase Mbabenyamin ve yisa, ve zenda ve ityô, ve hemba ve legh legh je, ve ndyar ve shin angahar hen ijiir i memen zan zan za ar sha ishigh ki Gibea vegher u sha ityoughkitaregh la.

⁴⁴ Ken Mbabenyamin ior kpe dubu pue kar anigheni; ve cii ve lu mbafantyav.

⁴⁵ Ve gema ijime, ve yevese, ve yem ken desereti hen vande u Rimon; ve yar twar, ve wua ior dubu utaan sha uigbudu; ve zenda ve ityô zan zan za ar hen Gidom, shi ve wua ve ior dubu uhar.

⁴⁶ Mba ve kpe ken utya ken Benyamin sha iyange la cii kuma ior dubu ikundu kar utaan mba tsuwan sanker; ve cii ve lu mbafantyav.

⁴⁷ Kpa ior deri ataratar gema yevese yem ken ikôngo hen vande u Rimon, ve za tema hen vande u Rimon iwer inyiin.

⁴⁸ Tsô ior mba Iserael hide va ta num sha Mbabenyamin, ve wua ve sha zwa u sanker, ior mba ken gar cii kua uzendenya man hanma kwagh u ve zua a mi cii; agar a ve kohol la cii, ve nande sha usu.