Mbaajiriv 19 - ICIGHAN BIBILO

¹ Tsô sha ayange a tor lu ken Iserael ga la, Orlevi ugen lu shir sha tar u iwoogh u Eferaim, a tema ken zuer je, a er kpankwase ken Betelehem-yuda.

² Kpankwase na la er idya hen na, nahan a yevese a yem hen ya uter na, hen Betelehem u ken Yuda, tsa ker iwer inyiin.

³ Tsô nom na la mough zenda un ijime, sha u una za ôr kwagh a na tegh tegh a̱ shi a̱ hide yô; wanakiriki na lu a na, a ujaki uhar. Tsô a nyôr hen ya u ter na; zum u ter u wankwase la nenge a na yô, doo un.

⁴ Ter na kem, ter u wankwase la, timbir un, nahan a tsa hen ya na ayange atar; ve yan kwagh ve man kwagh, ve lu her.

⁵ Tsô sha iyange i sha unyiin la, ve nder pepe, nahan a mough sha u una yem; kpa ter u wankwase la kaa a wan na kem er: Vande yan ankwagh, ta ishima kor man ne kôr gbenda ave ye.

⁶ Tsô ve tema ve uhar cii ve ya kwagh, ve ma kwagh, ter u wankwase la kaa a or la er: Ma u shi tse heen tugh mbun kpaa a ishima i saan saan.

⁷ Or la mough sha u una yem; kpa ter na kem kighir un, nahan a shi a tsa.

⁸ Iyange i sha utaan la, a mough pepe sha u una yem, kpa ter u wankwase la shi kaa er: Shi ta ishima kor, tema heen zan zan iyange i ndôhôr; nahan ve uhar cii ve ya kwagh.

⁹ Zum u or la mough sha u una yem, un vea kpankwase na man wanakiriki na yô, ter na kem, ter u wankwase la kaa a na er: Nenge, hegen iyange sôôn u been, nahan shi tsa nen, gayô, tugh sôôn ilen, tsa heen lu a ishima saan saan, tsô kper né mough pepe, né yem hen ya wou.

¹⁰ Kpa or la venda u tsan hen tugh mbula, a mough a gba yemen, a za ar ijiir i i lu teran môm a Yebushi, ka Yerusalem je la, lu a ujaki uhar a ushidi vev; kpankwase na kpaa lu a na imôngo.

¹¹ Zum u ve ar hen Yebushi yô, iyange sôôn u miren; nahan wanakiriki la kaa a ter na er: Ma se kaha ma se nyer ken gar u Mbayebushi ne, ma se shi tse ker.

¹² Kpa ter na kaa a na er: Sé kaha, sé nyôr ken gar u orityôtyev u a lu or u ken Mbaiserael ga ne ga, kpa sé kar sé za ken Gibea.

¹³ Shi a kaa a wanakiriki na er: Va sé kporom hen ijiir igen ken hemen; sé za haa hen Gibea, gayô ken Rama.

¹⁴ Tsô ve kar, ve gba yemen; iyange za mire ve ikua ikua a Gibea u Benyamin.

¹⁵ Ve kaha her er vea nyôr vea tsa ken Gibea; nahan a nyôr a tema hen tembe u gar la, gadia ma or kua a ve sha u ve̱ tsa ken iyou i nan ga.

¹⁶ Yô, tamenor ugen yar tom ken ityev lu kurun aikighe; or la lu u sha tar u iwoogh u Eferaim man a gema a lu shir ken Gibea; kpa ior mba hen ijiir la yô, lu Mbabenyamin.

¹⁷ Tsô a ta ashe a za nenge a or u zende la, sha tembegar; ortamen la pine un er: Ka han u ze, man ka han u za ve nahana?

¹⁸ A kaa a na er: Se mough hen Betelehem u ken Yuda se mba karen yemen sha tar u iwoogh u Eferaim ken zuer je; ka ken pe m lu la, man m za ken Betelehem u ken Yuda. Hegen yô, m ngu zan hen ya wam; man ma or nyôr a mo ken iyou i nan ga.

¹⁹ Nenge, adenga a alakema nga, kwaghyan kpaa ngu sha ci u ujaki asev; bredi kua wain kpaa ngu sha ci wam kua kpankwase wou man wanakiriki u a lu a mbayev ou ne; ma kwagh ban ga.

²⁰ Tsô tamenor la kaa er: Bem a̱ lu sha a we! Hanma kwagh u a ban u cii me na u; de tse hen tembe ga.

²¹ Nahan a va a na ken iyou na, a na ujaki kwaghyan; ve ôô angahar a ve, ve ya kwagh, ve ma kwagh.

²² Er ve lu her saan saan la yô, udangmbaiorov mba hen gar la va kase iyou la, gba tan ave sha hunda; ve ôr kwagh a orya, tamenor la, ve kaa er: Due a or u a nyer hen ya wou ne, se̱ nzughul a na.

²³ Tsô orya la due za her a ve, za kaa a ve er: Ei, anmgbianev av nea rumun yô shi de eren nen iferkwagh nahan ga, sha er or ne a ve hen ya wam yô, de eren nen ibumekwagh ne ga.

²⁴ Nenge, wan wam u kwase u iniunugh, man kpankwase na; ka ve me due a ve, me na ne ye, nzughul nen a ve, er nen a ve sha ishima yen cii; kpa or ne yô, de eren nen ibume kwagh a na ga.

²⁵ Kpa ior mbala venda u ungwan imo na; nahan or la kôr kpankwase na due a mi na ve; ve nzughul a na, ve tsa nzughul a na tugh mbula cii zan zan sev av; sev mbu sôôn u aven yô, ve pase un ve tuhwa.

²⁶ Tsô sev mbu hiin u aven yô, kwase la va gba hen hundaya u tamenor, u orvesen na lu her la; a lu her zan zan sev wanger.

²⁷ Orvesen na mough pepe, bugh ihinda i ya, dugh er una yem yô, a kav kwase, gba hen hunda u iyoughough ave na lu sha kpandehunda, lu kpankwase na la je.

²⁸ A kaa a na er: Mough, sé yem; kpa a bugh zwa ga; tsô a tôô un a penda sha jaki; nahan or la mough yem hen ya na.

²⁹ Va ar hen ya na yô, a tôô ihô, a tôô kpankwase na la, a tôndo un sha alegh alegh aci pue kar ahar, a tindi a mi ken ityar i Iserael cii.

³⁰ Tsô, hanmô u nan nenge a mi yô, nan kaa er: Mayange mba a er inja kwagh ne nahan ga, mnenge tsô kpaa, mba a nenge a mi ga, hii sha iyange i Mbaiserael due ken Igipiti la je zan zan nyian ne; wa nen iko sha kwagh ne, hen nen sha mi doo doo, ôr nen asema a en sha mi.