Mbaajiriv 18 - ICIGHAN BIBILO

¹ Sha ayange la tor lu ken Iserael ga; man sha ayange la kwe u Mbadan lu keren tar u vea tema ker yô; gadia ken ikwe i Iserael yô, ka ve ve lu a zua a dyako ga zan zan iyange la ye.

² Nahan ônov mba Dan tindi ior utaan mba ken tsombor ve, mbavianasema, ken Sora man Esetaol, sha u ve̱ za nenge tar la mker, ve̱ nenge u dedoo; ve kaa a ve er: Za za yenge nen tar; tsô ve va sha tar u iwoogh u Eferaim hen ya u Mika, ve tsa her.

³ Zum u ve lu hen ya u Mika yô, ve kav imo i wanyekwaor, Orlevi, la; tsô ve kaha ve va her a na, ve va pine un er: Ka an nan ve a we heen, man ka nyi u eren heen ne, man ka nyi u lu a mi heene?

⁴ Tsô a kaa a ve er: Mika er a mo nahan nahan, man a nam tom sha tôndo, m hingir pristi na.

⁵ Nahan ve kaa a na er: Yô, shi pine Aôndo se̱ fa shin zende u se lu zan ne ua doo yô.

⁶ Pristi la kaa a ve er: Za nen doo doo; gbenda wen u ne ze, ka sha ishigh ki TER u lu ye.

⁷ Tsô ior mba utaan mbala mough va hen Laishi, ve va nenge er ior mba ve lu ker la, ve tem gbar gbar yô, sha aeren a Mbashidon, ve tema bem bem ve hunde ishima kera je; gadia ma or u nzughul a ve lu ken tar la ga, ve lu ica a Mbashidon kpaa, kwagh zua ve a ma or kpaa ga.

⁸ Nahan ve hide hen anngôôv vev hen Sora man Esetaol; anngôôv vev pine ve er: Ne za nenge nana?

⁹ Ve kaa er: Mough nen, sé za nôngo nen ityav a ve; gadia se nenge tar la, u doo kpishi; man ne gba teman gbidaa tsô? De ngôôr nen u moughon za ngohol tar la ga.

¹⁰ Zum u né za yô, né za nenge a ior mba ve tem ve hundu ishima kera la, tar la kpaa gbangese; gadia Aôndo na ne u sha ikev; ka ijiir i banen a ma kwagh sha won je ga.

¹¹ Nahan ior mbagenev ken kwe u Dan, ior deri ataratar, ve mough hen Sora man hen Esetaol, ve kange ikav mbi utyav.

¹² Ve kôndo ve za haa afo sha Kiriati-yearim ken Yuda, nahan ve ii ijiir la iti er Mahanedan, zan zan nyian; ngi ken ijime i Kiriati-yearim.

¹³ Ve kar haala, ve za sha tar u iwoogh u Eferaim, ve za ar hen ya u Mika.

¹⁴ Tsô ior mba utaan mbala mba ve za sha u za nengen tar u Laishi mker la, ve kaa a anmgbianev vev er: Ne fa er efodi man terafim kua eev mbu gban a gba man eev mbu keren a ker ve lu ken ya ne kpa? Hegen yô, hen nen ase kwagh u né er yô.

¹⁵ Tsô ve kaha heera, ve za ar hen ya u wanyekwaor, Orlevi la, ka ya u Mika je la, ve pine un er a lu yô.

¹⁶ Ior mba Dan, deri ataratar, ve tile sha hunda a ikav mbi utyav vev.

¹⁷ Tsô ve ior mbautaan mbala, mba ve za sha u za nengen tar mker la, ve kôndo ve nyôr hen ijiir la, ve tôô eev mbu gban a gba man efodi man terafim kua eev mbu keren a ker la; pristi gema tile sha hunda, a ior mba deri ataratar mba ve kange ikav mbi utyav iyol la.

¹⁸ Tsô er ve nyôr ken ya u Mika ve tôô eev mbu gban man efodi man terafim man eev mbu keren la yô, pristi la gema pine ve er: Ka nyi ne eren ne?

¹⁹ Ve kaa a na er: Huan, cir uwegh sha zwa, yem a vese imôngo, za lu ter man pristi wase. Ka nyi i hembe u doono, u lun pristi hen ya u or môm, shin ka u lun pristi hen kwe man hen tsombor u Iseraele?

²⁰ Tsô pristi la gba ember ken ishima, nahan a tôô efodi man terafim kua eev mbu gban, a nyôr ken atô u ior mbala.

²¹ Tsô ve mough ve gba yemen; ve ver mbayev vev man ilev vev kua inyarev vev sha hemen.

²² Mba gbe ica a ya u Mika yô, ior mba ve lu ken uya mba ve dondo a ya u Mika la, ve kohol ve zenda ônov mba Dan ityô ve za kohol.

²³ Tsô ve yila ônov mba Dan. Mbala gema ashe, ve kaa a Mika er: Ka nyi i er u man u ve a ikpelaior nahana?

²⁴ A kaa er: Ne kuram mbaaôndo mba m er, man shi pristi, ne yem a mi; ka nyi m mase shin a mini? Man er nan ne pinim ner: Ka nyi i er uwe?

²⁵ Nahan ônov mba Dan gema kaa a na er: De kera shi bughun zwa a vese ga, sha er ior mba vihin asema ve̱ de te num sha a we ve̱ woo u kua ior ou ga.

²⁶ Tsô ônov mba Dan gba yemen a ne vev. Er Mika nenge ve hemba un agee yô, a gema a hide hen ya na.

²⁷ Tsô ve tôô akaa a Mika er la, man pristi u a lu a mi la, ve va hen Laishi hen ior mba ve tema bem bem ve hunde ishima kera la, ve va hemba ve sha zwa u sanker; ve nande gar la sha usu.

²⁸ Ma or u yiman ve lu ga, gadia a gba ica a Shidon, man kwagh zua ve a or ga; a lu shin pev u a lu hen Bete-rehobi la. Ve shi ve maa gar la, ve tema her.

²⁹ Ve ii gar la iti er Dan, sha iti i ter ve, Dan, u Iserael mar un la; kpa tsuaa la yô, i yilan gar la iti er Laishi.

³⁰ Tsô ônov mba Dan ver eev mbu gban mbula sha ci ve ayol a ve; Yonatan, wan u Gershon, wan u Mose, un kua ônov nav, ka ve, ve lu upristi hen kwe u Dan ye, zan zan sha iyange i i va kura ve ken tar la kera la.

³¹ Nahan ve ver eev mbu gban mbu Mika la sha ci ve, sha ayange a iyou i Aôndo lu ken Shilo la cii.