Mbaajiriv 14 - ICIGHAN BIBILO

¹ Tsô Semson sen hen Timna, a nenge a kwase hen Timna lu wan u Mbafiliti.

² Nahan a kôndo a za ôr ter na kua ngô na, a kaa er: M nenge a kwase, ka wan u Mbafiliti ken Timna; nahan yô, erem nen un.

³ Tsô ter na kua ngô na ve kaa a na er: Kwase ban ken anmgbianev ou shin ken ior av cii man u gem u za er kwase ken Mbafiliti mba ve lu ipusu ne yee? Semson kaa a ter na er: Kpa erem nen un keng, gadia a doom ishima yum.

⁴ Kpa ter na kua ngô na ve fa er i lu hen TER je, kwagh ne a dugh ga; gadia lu keren ityôikaa a Mbafiliti. Shighe la, Mbafiliti tema tor sha Iserael.

⁵ Tsô Semson kua ter na man ngô na ve gba senen zan shin Timna; mba za ar hen ishule i ikon i wain i Timna yô, gumbegha mough gba tan kume a na.

⁶ Tsô Jijingi u TER kende un sha agee, nahan a ande un er ka wanivo nahan, a lu a ma kwagh sha uwegh nagh ga; kpa a ôr ter na shin ngô na kwagh u un er la ga.

⁷ Tsô a sen, a za sôôr kwase la; kwase la doo Semson ishima tsung.

⁸ Ayange nga kar yô, a hide sha u una va er un, nahan a kaha a za nenge gundu u begha la; tsô a nenge a iyough ken gundu u begha la; i wa akpa.

⁹ A dugh i, a kôr sha ave, a gba yan yemen; a za kohol ter na man ngô na, a na ve, ve ya; kpa a kaa ve er un dugh iyough la ken gundu u begha ga.

¹⁰ Tsô ter na za hen kwase la; Semson maa er iniongo her; gadia ka ape ikaior eren gbem la.

¹¹ Tsô zum u ve nenge a na yô, ve va un a ahuraior ikundugber er ve̱ lu a na imôngo.

¹² Tsô Semson kaa a ve er: De, m̱ ta ne kikya; aluer nea fatyô u kaan mo inja na sha ayange a ataankarahar a iniongo ne, man nea fa mpase na kpaa yô, me na ne uriga mba pupuu ikundugber kua akondo a cirin iyol kpaa ikundugber;

¹³ kpa aluer nea fatyô u kaan mo inja na ga yô, ne né nam uriga mba pupuu ikundugber kua akondo a cirin iyol kpaa ikundugber. Tsô ve kaa a na er: Yô, ta ase kikya wou la, se̱ ungwa.

¹⁴ A kaa a ve er: Kwaghyan due ken kwagh u yan kwagh; kwaghnyohon due ken kwagh u ageegh. Ayange atar je, ve fatyô u pasen kikya la ga.

¹⁵ Nahan sha iyange i sha unyiin la, ve kaa a kwase u Semson la er: Mee nomu a̱ pase se inja i kikya ne, gayô, sé nande u kua ya u teru sha usu; shin ne lôhô se ner né kura se inyaregh ase?

¹⁶ Tsô kwase u Semson va vaa a na, kaa er: U ngu vendan mo, m doo u ishima ga; u ta ior av kikya, man u pasem inja na ga. Tsô a kaa a na er: Nenge, m kaa terem ga, ngôm kpaa, m kaa un ga, nahan m̱ gema m̱ kaa wee?

¹⁷ A vaa a na ayange ataankarahar a iniongo la; nahan sha iyange i sha utaankaruhar la, a kaa un, gadia a za un iyol yum; nahan a va pase ior nav kikya la.

¹⁸ Tsô ior mba hen gar la, ve ôr un sha iyange i sha utaankaruhar, er iyange lu a mire ga la, ve kaa er: Ka nyi i hembe nyohon a iyougho? Ka nyi i hembe begha agee? Nahan a kaa a ve er: Aluer nea kaha sule sha tulebua wam ga yô, ma ne fe kikya wam ne ga.

¹⁹ Tsô Jijingi u TER kende un sha agee, a sen a va hen Ashekelon, a va wua ior ikundugber shin ve, a ngohol ve akondo, a va na mba ve pase kikya na la; tsô ishima vihi un, a yem sha ya u ter na.

²⁰ Nahan i gema kwase u Semson la, i na huror na u a lu vea na la.