Mbaajiriv 12 - ICIGHAN BIBILO

¹ I kohol ior mba Eferaim ve per ve za hen Safon, ve za kaa a Yefeta er: Inja na nan u per u za nenge ityav a Mbaamon, man u lehe se wer, se̱ za a we imôngo ga? Yô, se̱ nande ya wou sha usu, ú lu kimi je.

² Tsô Yefeta kaa a ve er: Mo kua ior av se lu iyongo a Mbaamon tsung man er m yila ne yô, ne va yimam sha ikev ve ga.

³ Er m nenge ne yimam ga yô, m ta uma wam kera, m per m za nôngo ityav a Mbaamon, TER kpaa na ve sha ikev yam; nahan ka nyi ne ve her a mo nyian ner né va nôngo ityav a mo?

⁴ Tsô Yefeta kohol ior mba Gileadi cii, a nôngo ityav a Eferaim; ior mba Gileadi hemba Eferaim, sha ci u ve kaa er: Ne Mbagileadi, ne mba Mbaeferaim mba ne yevese a yevese, Gileadi ngu hen atô u Eferaim man Manase.

⁵ Mbagileadi ngohol ahongo a Yordan yisa Eferaim; nahan aluer hanma Oreferaim u nan yevese nan kaa er: Dem nen m̱ per yô; ior mba Gileadi ve pine nan er: U ngu or u Eferaime? Aluer nana kaa er: Ei;

⁶ yô, ve kaa a nan er: Kaa wer, Shiboleti; aluer nana gema á kaa er, Siboleti, sha er nan fatyô u yilan vough ga yô, nahan ve kôr nan, ve wua hen ahongo a Yordan; Mbaeferaim kpe hen shighe la kuma ior dubu akunduahar kar uhar.

⁷ Yefeta lu orjir u Iserael anyom ataratar. Tsô Yefeta Orgileadi la kpe, i ii un ken gar u Gileadi ugen.

⁸ Ken ijime na yô, Ibesan u Betelehem tema orjir u Iserael.

⁹ A lu a ônov mba nomso ikundugber man mba kasev ikundugber mba a na ve ken unoo yô; shi a er kasev ikundugber sha ci u ônov nav mba nomso. A lu orjir u Iserael anyom ataankarahar.

¹⁰ Tsô Ibesan kpe, i ii un ken Betelehem.

¹¹ Ken ijime na yô, Elon or u Sebulon tema orjir u Iserael; lu orjir u Iserael anyom pue.

¹² Elon or u Sebulon la kpe, i ii un ken Aiyalon ken tar u Sebulon.

¹³ Ken ijime na yô, Abedon wan u Hilel, Orpiraton, tema orjir u Iserael.

¹⁴ A lu a ônov akunduahar mba nomso, man shi ônov mba ônov nav mba nomso ikundugber, mba ve hendan agumajaki akunduatargber; a lu orjir u Iserael anyom anigheni.

¹⁵ Abedon, wan u Hilel, Orpiraton la kpe, nahan i ii un ken Piraton ken tar u Eferaim, sha tar u iwoogh u Mbaamaleki.