Mbaajiriv 11 - ICIGHAN BIBILO

¹ Yô, Yefeta Orgileadi lu or u ageegh u tseen ishima sha kwagh, kpa a lu wan u idyakwase; ka Gileadi lu ter u Yefeta ye.

² Kwase u Gileadi mar un ônov mba nomso; zum u ônov mba nomso mba kwase na la vese yô, ve zenda Yefeta, ve kaa a na er: We ú ya dyako hen ya u ter wase ga, gadia we u ngu wan u kwase ugen.

³ Tsô Yefeta yevese anngôôv nav za tema ken tar u Tobi; agbilinaior za kohol Yefeta keregh, ve zenden a na imôngo.

⁴ Tsô, ka tse dôghôô yô, Mbaamon va nôngo ityav a Iserael.

⁵ Man zum u Mbaamon va nôngo ityav a Iserael yô, mbavesen mba Gileadi za sha u za hiden a Yefeta ken tar u Tobi la;

⁶ ve kaa a Yefeta er: Va, va lu orhemen wase, sé nôngo ityav a Mbaamon.

⁷ Tsô Yefeta kaa a mbavesen mba Gileadi er: Ka ne, iyange ne vendam, ne zendam hen ya u terem kpaa ye gaa? Man ka nyi shi ne ve hen mo hegen er ican i tser ne nee?

⁸ Tsô mbavesen mba Gileadi kaa a Yefeta er: Kwagh u a er man shi se gem her a we hegen yô, ka sha u ma u ze a vese imôngo ma u za nenge ityav a Mbaamon; nahan ú hingir orhemen wase, se mba se tem ken Gileadi cii.

⁹ Nahan Yefeta kaa a mbavesen mba Gileadi la er: Aluer né hide a mo ken ya sha u m̱ za nôngo ityav a Mbaamon, man TER kpaa Una na ve sha ikev yam yô, mo me hingir orhemen wen zee?

¹⁰ Mbavesen mba Gileadi mbala kaa a Yefeta er: TER ngu shiada her atô wase a we; mimi je, kwagh u ú kaa yô, ka un sé er ye.

¹¹ Tsô Yefeta yem a mbavesen mba Gileadi mbala imôngo, ior maa gema un, hingir orhemen ve man orvesen ve. Yefeta ôr kwagh na cii sha ishigh ki TER ken Misepa.

¹² Tsô Yefeta tindi mbatyomov hen tor u Mbaamon a kaa er: Ka nyi i zough u a mo, u ve her a mo sha u va nôngon ityav a tar wama?

¹³ Nahan tor u Mbaamon gema kaa a mbatyomov mba Yefeta mbala er: Ka sha ci u Iserael ngohol mo tar shighe u yan ve due ken Igipiti la, hii hen Arnon zan zan ar hen Yaboki kua hen Yordan kpaa; nahan yô, hidem a mi sha bem.

¹⁴ Tsô Yefeta shi tindi mbatyomov hen tor u Mbaamon;

¹⁵ a kaa a na er: Yefeta ngu kaan nahan er: Iserael iyange ngohol tar u Moabi ga, shin tar u Mbaamon kpaa ga;

¹⁶ kpa zum u ve due ken tar u Igipiti yô, Iserael kar ken desereti zan zan hen Zegemnger u Nyian, tsô ve va ar hen Kadeshi;

¹⁷ nahan Iserael tindi mbatyomov hen tor u Edom, kaa er: De m̱ shi kar ken tar wou; kpa tor u Edom rumun ga. Kape shi a tindi hen tor u Moabi kpaa la; un kpaa venda; nahan Iserael tema hen Kadeshi.

¹⁸ Tsô a kar ken desereti, a ningir tar u Edom, man tar u Moabi; ve kar Moabi vegher u sha ityoughkitaregh, ve haa afo yande Arnon, kpa ve nyôr ken tar u Moabi ga, gadia Arnon lu ikighir i Moabi je.

¹⁹ Tsô Iserael tindi mbatyomov hen Shihon tor u Mbaamor, ka tor u Heshebon je la; Iserael kaa a na er: De, se̱ shi kar ken tar wou, se̱ za hen ijiir yam.

²⁰ Kpa Shihon rumun Iserael er a̱ kar ken tar na ga; nahan Shihon gema kohol ior nav cii haa afo ken Yahashi, nôngo ityav a Iserael.

²¹ Tsô TER, Aôndo u Iserael, na Shihon a ior nav cii sha ikev i Iserael, a hemba ve; nahan Iserael ngohol tar u Mbaamor mba ve tema ken tar la cii.

²² Ve ngohol tar u Mbaamor cii, hii hen Arnon zan zan ar shin Yaboki, man shi hii ken desereti zan zan ar shin Yordan kpaa.

²³ Ka ape TER, Aôndo u Iserael, lu numun Mbaamor ken tar ve, sha ishigh ki ior Nav Iserael kera la, nahan we ú gema ú ngohol u ve zee?

²⁴ We ú ngohol kwagh u Kemoshi, aôndo wou a ne u er u̱ ngohol la gaa? Se di sé ya kwagh u TER, Aôndo wase, A ngohol hen ior mbagenev, A ne se yô.

²⁵ Nahan u hemba Balaki wan u Shipor, tor u Moabi je kpa? A hendan kwagh a Mbaiserael, shin a nôngo ityav a ve mayange kpa?

²⁶ Er Iserael tema ken Heshebon man angarev nav, man ken Aroer man angarev nav, man ken agar a a lu hen kpe u Arnon cii, anyom kuma deri utar je, ka nyi man iyange ne kera hide ne ngohol a hen shighe shon la gaa?

²⁷ Nahan mo yô, m er u kwaghbo ga, kpa ka we u erem kwaghbo ye, er u nenge ityav a mo yô; TER Orjir, A̱ ôr ijir hen atô u Mbaiserael a Mbaamon nyian.

²⁸ Nahan kpaa, tor u Mbaamon wa kwaghôron u Yefeta tindi un a mi la iko ga.

²⁹ Tsô Jijingi u TER sen tema sha Yefeta, nahan a kar her Gileadi man Manase, shi a za kar Misepa u Gileadi la, a per a za hen Mbaamon.

³⁰ Yefeta bum a TER, a kaa er: Aluer Wea na Mbaamon sha ikev yam mimi je yô,

³¹ nahan nyityôkwagh i ia due hen ihinda i ya wam sha u va keghen mo gbenda, zum u me hide hen Mbaamon dedoo yô, ia lu kwagh u TER, me na TER nagh ku nanden sha mi.

³² Tsô Yefeta per za hen Mbaamon sha u za nôngon ityav a ve; TER kpaa na ve sha ikev na.

³³ A hemba ve, hii hen Aroer zan zan nyôr hen Miniti, ka agar ikundu je la, man zan zan ar hen Abel-keramim; ior kpe ken utya je faregh gba. Nahan Mbaamon cia Mbaiserael var inya.

³⁴ Er Yefeta va ar hen ya na hen Misepa yô, wan na u kwase due sha u va keghen un gbenda a angenga u kuhwan vinen amar; lu di wan na u môm tsô la, lu a mô ugen ga, u nomso shin u kwase kpaa ga.

³⁵ Tsô nengen a na yô, a ande akondo a na, a kaa er: Kpe ahii, wan wam! U sombom anu vughô vughô, u ngu ken mba eren mo ican; gadia m vande bughun zwa a TER, nahan me kera fatyô u hiden ijime ga.

³⁶ A kaa a na er: Terem, u bugh zwa a TER; yô, er a mo sha kwagh u a dugh ken zwa wou yô, gadia TER or iyev sha ci wou sha mbaihomov ou, Mbaamon.

³⁷ Shi a kaa a ter na er: Kpa i̱ erem kwagh ne tsô, dem iwer ihiar me mough me za sha iwo me za vaa iniun yam, mo kua azende a am.

³⁸ A kaa er: Yô, za. A na un gbenda iwer ihiar; tsô a mough, un kua azende a na, a za vaa iniun na sha iwo.

³⁹ Tsô iwer ihiar la ngi been yô, a hide hen ter na, a er a na sha mbum na u a bum la; mayange a lu a fa nom ga. Maa hingir ieren ken Iserael je,

⁴⁰ ônkasev mba Iserael ve duen anyom anyom ve za wa icam i wuese wan u Yefeta Orgileadi ayange anyiin sha hanma inyom.