Mateu 7 - ICIGHAN BIBILO

¹ De gbe nan nen or ibo gagh ga, er ne kpaa á na ne ibo gagh ga yô.

² Gadia imbajir i ne er ne, ka i á ôr ne ye; man ikaren i ne karen a mi ne kpaa, shi ka sha i je á kar ne mi ye.

³ Inja na nan man u nengen anivurkon u a lu anmgbian wou ken ishe, kpa gungurkon u u lu ken ishe you yô, u we u iko ga?

⁴ Shin ú er nan man ú kaa a anmgbian wou wer: De, m̱ dugh u anivurkon ken ishe, man nenge, gungurkon u gem u lu u ken ishee?

⁵ We, orimangeregh ne, vande dughun gungurkon ken ishe you kera, nahan man u nenge dedoo sha u ú za dugh anivurkon la ken ishe i anmgbian wou kera ye.

⁶ De ne nen iwa icighankwagh ga, man shi de gbihin nen igo utagbede enev sha ishi ga, sha u i̱ de ndyaren angahar sha mi, i̱ gema i̱ vihin ne iyol ga yô.

⁷ Sôn nen, á na ne; ker nen, né zua a mi; mande nen uwegh sha katsor á bugh ne.

⁸ Gadia hanmô u nan sen yô, nan ngohol; u nan keren kpaa, nan zough a mi; u nan manden uwegh kpaa á bugh nan.

⁹ Ka an or je nan lu ken a ven u aluer wan u nan á sôn nan bredi, nana gema á na un iwen ase?

¹⁰ Shin una sôn ishu yô, nana gema á na un iyô ase?

¹¹ Aluer ne mba ne lu mbaaferev je kpaa ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un, akaa a dedoo ga yee?

¹² Akaa cii a i sar ne ka ior ve̱ er ne yô, ne kpaa er nen ve di nahan je, gadia ka atindiakaa kua uprofeti je la.

¹³ Nyôr nen hen hunda u hogholoo, gadia gbenda u zan ken mtim la gbangese, ngu bele bele kpaa, man ior mba ve nyer her yô, ve ngee tsô.

¹⁴ Gadia hunda hoghor, gbenda kpaa imbishi u u ze sha uma la, mbazuan a mi mba kpeghee tsô.

¹⁵ Kura nen ayol a en sha uprofeti mba aiev mba ve ve her a ven a akôv a iyôngo iyol, kpa ken atô ve yô, gema ka ugbaseela mba huav je.

¹⁶ Ka sha atam a ve man né fa ve ye. Mba zer wain sha usaa, shin mba zer tur sha ishishagh ase?

¹⁷ Kape hanma kon u injaa u um atam a injaa je la; kpa kon u bo yô, ngu um di atam a bo je.

¹⁸ Kon u injaa ngu fetyô u umen atam a bo ga; kon u bo di kpaa ngu fetyô u umen atam a injaa ga.

¹⁹ Hanma kon u u um atam a injaa ga yô, ka i gber kera, i gbihi ken usu.

²⁰ Nahan yô, ka sha atam a ve man né fa ve ye.

²¹ Ka hanma or u nana kaa a Mo er, Tere! Tere! man nana nyôr sha tartor u Sha ga, saa u nan eren ishima i Terem u A lu Sha yô.

²² Sha iyange la ior kpishi vea kaa a Mo er: Tere! Tere! Ka ken iti You man se lu ôron kwaghôron u profeti gaa? Man ka ken iti You se lu dughun ujijingi mba bov gaa? Man shi ka ken iti You se lu eren akaa a ageegh kpishi kpaa gaa?

²³ Tsô Me kaa a ve Mer: Mayange je M ngu a fa ne ga, yem nen heen kera, ne mbavendan atindi mban.

²⁴ Hanma or u nan ongo akaaôron Am ne man nan eren sha a yô, á kar nan sha orfankwagh u nan maa iyou i nan sha vande.

²⁵ Ura nôô, uikuwan sen, ahumbeura ta sha iyou la, kpa i gba ga, sha ci u i we i imagh sha vande yô.

²⁶ Man shi hanmô u nan ongo akaaôron Am ne, man nan eren sha a ga yô, á kar nan sha ibumeor u nan maa iyou i nan sha waarawa yô.

²⁷ Ura nôô, uikuwan sen, ahumbeura ta sha iyou la, mgbegha i, i gba; mgbe u i kaa kpee!

²⁸ Tsô er Yesu been akaaôron ne yô, kpiligh ikpelaior iyol a ityesen Na;

²⁹ gadia A tese ve er ka or u lun a tahav nahan, lu er mbangeren vev ga.