Mateu 6 - ICIGHAN BIBILO

¹ Ver nen ishima sha perapera wen la, de eren nen un sha ishigh ki iorough i̱ lu sha ci u ve̱ nenge ga; á lu nahan yô, ne kera mba a injar hen Ter wen u A lu Sha la ga.

² Nahan shighe u wea eren iwua yô, de tôngon korough sha hemen wou, er mbaatsereghev ve eren ken ushinagoge kua sha igbenda sha u vea zua a icivir hen ior la nahan ga. Mimi je, M kaan ne ne, ve ngohol injar ve kera ve.

³ Kpa shighe u wea eren iwua yô, de rumun uwegh ough ku imesegh ku̱ fan kwagh u ku yanegh ku eren la ga;

⁴ sha er iwua you i̱ lu ken myer yô, man Teru u A nengen ken myer la, Una na u injar you yô.

⁵ Man shighe u wea eren msen yô, de luun er mbaatsereghev nahan ga; gadia ka i doo ve u tilen eren msen ken ushinagoge man sha akahar a akômaigbinda sha u ior ve̱ nenge a ve yô. Mimi je M kaan ne ne, ve ngohol injar ve kera ve.

⁶ Kpa we, shighe u wea eren msen yô, nyôr ken iyou you i ken iuv, u wuhe hunda kera yô, sôn Teru u A lu ken myer la; Una ungwa imo you.

⁷ Sha msen u eren la kpaa, de zeren nen kimbir gbilin gbilin er atôatyev a eren nahan la ga, gadia mba henen er ka sha kwaghôron ve yum la man á ungwa ve ye.

⁸ Yô, de luun nen er ve nahan ga; gadia Ter wen fa kwagh u a gbe ne je er ne lu a sôn Un ga yô.

⁹ Yô, eren nen msen nahan, ner: Ter wase u Sha, i̱ tsegha iti You,

¹⁰ tartor Wou u̱ va, i̱ er ishima You shin tar kpaa vough er i eren i Sha nahan;

¹¹ na se kwaghyan wase nyian u a lu sha ci u ayange ayange la;

¹² man de se anzô ase di er se kpaa se deen mba ve gbe anzô hen vese la nahan;

¹³ man shi de ze a vese hen ape imeen i lu ga, kpa yima se sha ifer. (Gadia tartor ka u Wou kua agee man icivir kpaa, gbem sha won. Amen)

¹⁴ Gadia aluer nea deen ior akaabo a ve yô, Ter wen u Sha di kpaa Una de ne.

¹⁵ Kpa aluer nea deen ior akaabo a ve ga yô, Ter wen di kpaa Una de ne akaabo a en ga.

¹⁶ Man shighe u nea hôron kwaghyan yô, de luun nen zunguluu er mbaatsereghev nahan ga; gadia ka ve vihi ishiv vev sha u ior ve̱ nenge er ve her kwaghyan yô. Mimi je, M kaan ne ne, ve ngohol injar ve kera ve.

¹⁷ Kpa we yô, shighe u wea hôron kwaghyan la, shighe mkurem sha ityou, ôô ishigh you,

¹⁸ sha u ior ve̱ de kaven er u lu hôron kwaghyan ga, saa di Teru u A lu ken myer la; man Teru u A nengen ken myer la, Una na u injar ken igbar.

¹⁹ De koson nen akaa a injaa sha ci wen shin tar ne hen ape ivina kua nduran ve vihin kwagh kera, mbaiv kpaa ka ve time ve iin ne ga;

²⁰ kpa koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la.

²¹ Gadia ape kwaghinjaa wou a lu yô, ka her man ishima you kpaa ia lu ye.

²² Imenger i iyolough ka ishe; nahan aluer ishe you ia lu dedoo yô, iyol you cii kpaa ia iv a iwanger.

²³ Kpa aluer ishe you ia lu i ifer yô, iyol you cii kpaa ia iv a ime. Nahan yô, aluer iwanger i i lu ken a we la ia lu ime yô, ime la, ia kehe tsô!

²⁴ Or môm môm ngu u nana fatyô u eren uter uhar tom ga; gadia nana kôr ugen ihom, ugen á doo nan ishima, shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.

²⁵ Ka nahan man M kaan ne ye Mer, asema, a̱ de nyian ne sha ci u uma, wen, sha kwagh u né ya man sha kwagh u né ma, shin sha ci u iyol yen, sha kwagh u né zer la, ga. Uma hemba kwaghyan gaa, man iyol kpaa i hemba akondo gaa?

²⁶ Nenge nen inyon i sha, ngi lee ga, ngi sondo kpaa ga, ngi ombon sha iuna kpaa ga; nahan kpaa Ter wen u Sha la koson i. Ne ne hemba i inja tsung je gaa?

²⁷ Ka an wen je sha ishima i nyian i nan la, nana fatyô u seer ishiva i môm sha ityaven i nan ase?

²⁸ Inja na nan man asema a nyian ne sha kwagh u akondo? Nenge nen er ityombo i ken toho i vesen yô; ngi eren tom ga, mou kpaa ngi te ga.

²⁹ Kpa M kaan ne ne, Solomon a iengem na cii je kpaa, mayange haa akondo er mô ve môm nahan ga.

³⁰ Yô, aluer Aôndo Una wuhan ahu a ken toho iyol doo doo nahan, a a lu uma nyian, kper a haa ken atse la, man hire ne mba ne lu a anjighjigh u nan nee?

³¹ Nahan yô, asema a̱ de nyian ne, kaan ner ner: Sé ya nyi? Shin: Sé ma nyi? Shin Sé zer nyi? ga.

³² Gadia akaa ne cii atôatyev nga keren a, kpa Ter wen u Sha fa er kwagh a gbe ne sha akaa ne cii yô.

³³ Kpa vande keren nen tartor Na man perapera Na, man akaa ne cii á seer ne a ye.

³⁴ Nahan yô, asema a̱ de nyian ne sha kwagh u kper ga, gadia kper una gba nôngon sha kwagh na iyol na tsô; hanma iyange zayol u i lu a mi la, kuma i.