Mateu 27 - ICIGHAN BIBILO

¹ Tsô sev mbu av yô, upristi mba tamen cii kua mbatamen mba nongoior la, ve hen imôngo er vea wua Yesu yô.

² Ve kange Un ve yem a Na, ve za na sha ikev i gomna Pilatu.

³ Tsô Yuda u a nenge mker sha a Na la, zum u a nenge er i na Un ibo kera yô, a vaa afanyô, a za hire upristi mba tamen kua mbatamen a agbenger azurfa ikundugber la,

⁴ a kaa er: M er isholibo sha er m nenge mker sha awambe a or u ishôôgh yô. Kpa ve kaa er: Kwagh wase ngu sha mi hana? Mase shin kwagh wou tsô.

⁵ Tsô a tsenda agbenger azurfa la ken tempel, maa a yem, a kar a za sende iyol na.

⁶ Upristi mba tamen tôô agbenger azurfa la, ve kaa er: Doo u á haa a ken akwatinyar ga, sha ci u i lu inyaregh ki awambegh yô.

⁷ Tsô ve hen sha mi imôngo, ve yam sule u ormaantyegh sha u iin mbavannya her.

⁸ Ka nahan i yer sule la er, sule u awambe zan zan nyian ye.

⁹ Tsô kwagh u profeti Yeremia lu kaa la kure sha mi vough er: Ve tôô agbenger azurfa ikundugber la, ka ishe i i ôr sha a na, i ônov mba Iserael mbagenev ve ôr ishe na la;

¹⁰ ve na sha ci u sule u ormaantyegh, er Ter kaam yô.

¹¹ Tsô Yesu tile sha ishigh ki gomna. Gomna pine Un er: U ngu tor u Mbayuda? Yesu kaa er: U kaa tsô.

¹² Zum u upristi mba tamen man mbatamen gba wan Un akaa iyol yô, A bugh zwa sha ma kwagh ga.

¹³ Tsô Pilatu kaa a Na er: U ngu ungwan er ve eren shiada sha akaa kpishi sha a we gaa?

¹⁴ Nahan kpaa A bugh un zwa sha ma kwaghôron môm ga; nahan kpiligh gomna iyol.

¹⁵ Kpa sha shighe u iniongo yô, gomna dughun ikpelaior orkwar môm u i lu ve ka i dugh nan yô.

¹⁶ Hen shighe la ve lu a orkwar ugen u ior ve fe un cii yô, iti na er Baraba.

¹⁷ Nahan zum u ve kohol her imôngo yô, Pilatu pine ve er: Ka an man i lu ne pe m̱ dugh ne nana? Ka Baraba shinii, i̱ lu Yesu u i yer er Kristu laa?

¹⁸ Gadia a fa er i lu sha iwuhe man ve lu yilan Un ijir yô.

¹⁹ Tsô er a tema sha ikônough nagh ki orjir yô, kwase na tindi loho her a na er: Dugh ave ou sha kwagh u Or u perapera la kera, gadia nyian tugh ican erem kpishi ken mnya sha ci Na.

²⁰ Yô, upristi mba tamen man mbatamen sendegh a ikpelaior er, ve̱ pine er i̱ dugh ve Baraba, kpa i̱ gema i̱ wua Yesu.

²¹ Gomna gema kaa a ve er: Ken a ve mba uhar mban yô, ka an man i lu ne pe m̱ dugh ne nana? Ve kaa er: Ka Baraba!

²² Pilatu kaa a ve er: Tsô m̱ er a Yesu u i yer er Kristu la nana? Ve cii ve kaa er: I̱ mande Un sha terankon!

²³ A kaa er: Ka nyi kwaghbo a ere? Kpa ve seer genger amo taver taver, ve kaa er: I̱ mande Un sha terankon!

²⁴ Tsô er Pilatu nenge un kera fatyô ciôn kpaa ga, man er ayôôso kpaa lu hiin u taver yô, a tôô mngerem a ôô ave na sha ishigh ki ikpelaior, a kaa er: M ngu a ibo sha awambe a ishôôgh ne ga, mase shin kwagh wen.

²⁵ Ikpelaior la cii gema kaa er: Awambe a Na a̱ lu sha a vese kua sha ônov asev kpaa.

²⁶ Tsô a dugh ve Baraba, kpa a gbidye Yesu akpa, a gema Un a na er i̱ za mande Un sha terankon.

²⁷ Tsô mbautyav mba gomna nyôr a Yesu ken iyoujir, ve kohol ikum i mbautyav cii her a Na.

²⁸ Ve er Un akondo kera, ve haa Un riga ugen u nyian dindee;

²⁹ ve tume tsar sha saa ve penda Un sha ityou ve na Un aga ken uwegh Nagh ku yanegh, ve gure inya sha ishigh Nagh ve gba nahan Un tar, kaan er: Mba sughun We, tor u Mbayuda!

³⁰ Ve ta Un azer, ve ngohol aga la, ve gbidye Un sha ityou.

³¹ Er ve nahan Un tar cii yô, ve er Un riga la kera, ve hire ve haa Un akondo a Na, ve yem a Na sha u za manden Un sha terankon.

³² Mba ngur duen yô, ve kohol orgen u ken Shirene, iti na er Shimon; ve kighir un er a̱ tôô terankon Na.

³³ Tsô ve va hen ijiir igen i i yer er Golgota la, inja na yô er, ka ijiir i igbôndotyou je la,

³⁴ ve na Un zar u wain u i nongo zarmle sha mi yô, er A̱ ma; kpa benden sha zwa yô, A venda u man.

³⁵ Er i mande Un sha terankon kera yô, ve kar akondo a Na her ayol a ve, ve er ishor sha a.

³⁶ Ve tema her ve gba kuran Un.

³⁷ Ve ver ityôikaa i ijirigh Na sha henpe ityough Nagh lu la, i nger er: Ngun ka Yesu Tor u Mbayuda.

³⁸ Tsô i mande mbanumungbenda uhar a na imôngo, u môm ken uwegh Nagh ku yanegh, u môm ken imese.

³⁹ Mba ve lu karen her yô, ve ôr akaa a dang, sha a Na, ve jingir ityouv,

⁴⁰ ve kaa er: We u U hemben tempel, shi U maa un ayange atar ne, yima ase iyol You ga! Aluer wea lu Wan u Aôndo yô, hungwa sha terankon.

⁴¹ Upristi mba tamen kpaa kape ve lu nahan Un tar je la kua mbangeren man mbatamen kpaa, ve kaa er:

⁴² A yima mbagenev, kpa A kera fatyô u yiman iyol Na ga. Ka Tor u Mbaiserael je; yô, A̱ hungwa sha terankon hegen, tsô se na Un jighjigh.

⁴³ A lu suur sha Aôndo; yô, A̱ yima Un hegen, aluer a doo Un a Na yô, gadia kaan er, Un ngu Wan u Aôndo je.

⁴⁴ Kape mbanumungbenda mba i mande ve a Na imôngo la kpaa, ve lu ôron akaa a dang sha a Na la.

⁴⁵ Hii iyange sha tembe zan zan ahwa atar atetan yô, ime wa tser tar.

⁴⁶ Tsô ka kom er ahwa atar nahan, Yesu yila sha imo i taver genger genger er: Eli! Eli! Lama Sabatani! Inja na yô, Aôndo Wam, Aôndo Wam, ka nyi U undumu?

⁴⁷ Mba ve tile her la, mbagenev ken ve mba ongo nahan yô, ve kaa er: Or ne ngu yilan Eliya!

⁴⁸ Fese nahan u môm ken ve kura ayem, za tôô kileyongo, wa shin vineger, shindi sha aga u iyia va na Un er A̱ ma.

⁴⁹ Kpa mbagenev kaa er: De, se nenge nen shin Eliya una va yima Unou?

⁵⁰ Kpa Yesu shi genger imo taver taver, tsô A na jijingi Na kera.

⁵¹ Tsô ikondo i yisan i ken tempel la pav, hii sha je mande shin inya. Tar kpaa tenger, avande pav;

⁵² iwar kpaa bugh, ayol a uicighanmbaiorov mbagenev kpishi mba ve vande kpen kera la nder,

⁵³ ve due shin iwar zum u A nder shin mbakpenev kera la, ve nyôr ken icighangar, ve za ande hen ior kpishi.

⁵⁴ Torutya kua mba ve lu a na imôngo, ve kuran Yesu la, zum u ve nenge mtenger u tar man akaa a a er la yô, cier ve iyol kpishi ve kaa er: Mimi je, Ngun lu Wan u Aôndo.

⁵⁵ Kasev kpishi kpaa lu heregh, ve tile ken ica, ve lu kenger; ka mba ve van a Yesu jime ken Galilia, ve wasen Un la.

⁵⁶ Ken ve yô, lu Maria Magedalena, man Maria ngô u Yakobu man Yose, man shi ngô u ônov mba Sebedeu.

⁵⁷ Iyange i been yô, ornyar ugen u ken Arimatia, za va, iti na er Yosev; un iyol na kpaa lu orhenen u Yesu.

⁵⁸ A za hen Pilatu, a za pine ikom i Yesu. Tsô Pilatu kaa er, i̱ na un i.

⁵⁹ Yosev tôô ikom la, cir i ikondo i dedoo,

⁶⁰ wa ken uwar na u he u a vande timen ken vande yô; a menger zegeiwen, a cir hunda u uwaregh la, tsô a mough a yem.

⁶¹ Maria Magedalena kpaa lu her, kua Maria ugen la, ve tema sha ishigh ki uwaregh.

⁶² Kper nan yô, lu sev mbu dondon sha iyange i kohol iyol sha ci u Paseka je la, upristi mba tamen man Mbafarishi ve va hen Pilatu imôngo,

⁶³ Ve kaa er: Tere, se umbur er Orcugh ne, er lu uma je, tsô kaa er: Ayange á kar atar, tsô Me shi Me nder.

⁶⁴ Yô, kaa, i̱ za kura uwar la doo doo zan zan sha iyange i sha utar la, sha u mbahenen Nav ve̱ de va iin Un, ve̱ kaan er, A nder shin mbakpenev man icugh i masetyô i̱ hemba i hiihii la ga.

⁶⁵ Pilatu kaa a ve er: Ne mba a mbakuran, yem, za kura nen u doo doo er ne fatyô yô.

⁶⁶ Nahan ve za, ve za sôr uwar la, ve ver ikav sha iwen la, shi ve ver mbakuran her kpaa.