Mateu 26 - ICIGHAN BIBILO

¹ Tsô zum u Yesu kure akaaôron ne cii yô, A kaa a mbahenen Nav er:

² Ne fa ayange aa kar ahar yô, Paseka una kuma; nahan á na Wan u or sha u i̱ za mande Un sha terankon.

³ Tsô upristi mba tamen kua mbatamen mba nongoior la, ve za kohol hen tembe u zegepristi u i yilan un er Kayafa la.

⁴ Ve hen er vea er man vea kôr Yesu sha ayom, vea wua yô.

⁵ Kpa ve kaa er: I̱ de lu sha iyange i iniongo ga, sha er ikpelaior ve̱ de moughon ayôôso ga yô.

⁶ Tsô zum u Yesu lu ken Betani hen ya u Shimon, orimande yô,

⁷ kwase ugen va her a Na, lu a tumugh ku alabasetu a mkurem ma sha inyaregh kpishi, a va haa Un sha ityou er A tema hen kwaghyan la je.

⁸ Kpa er mbahenen Nav nenge nahan yô, asema vihi ve, ve kaa er: Inja na nan man i vihi kwagh ne nahana?

⁹ Gadia mkurem man kuma u ma i tee ma, ma i yam inyaregh kpishi ma i ne mbaatsanev.

¹⁰ Kpa er Yesu kav nahan yô, A kaa er: Ka nyi ne ze kwase ne iyolo? A erem kwagh u dedoo.

¹¹ Gadia ne mba a mbaatsanev a ven imôngo gbem; kpa Mo yô, né lu a Mo gbem ga.

¹² Gadia mhee u a heem mkurem iyol ne, a er nahan sha ci u m-ii Wam.

¹³ Mimi je M kaan ne ne, hanma ijiir i á ôr Loho u Dedoo ne sha won cii yô, kwagh u a er ne kpaa á ter un, sha u umbur un.

¹⁴ Tsô u môm ken mba pue kar uhar, u i yilan un er, Yuda u Isekarioti la, za hen upristi mba tamen

¹⁵ za kaa er: Ka nyi né nam sha er m̱ na Un sha ikev yene? Ve na un agbenger a azurfa ikundugber.

¹⁶ Hen shighe la je a gba keren ian i una na Un sha ikev ve yô.

¹⁷ Tsô sha iyange i hiihii i ayange a bredi u i we kwa sha mi ga la, mbahenen va hen Yesu, ve kaa a Na er: Ka hanma ijiir i sar U ka se za sôr U, U za ya Paseka here?

¹⁸ A kaa er: Za nen ken gar hen via la, za kaa nen un ner: Ortesen kaa er: Shighe Wam mgbôghom; yô, ka hen ya wou Me ya Paseka a mbahenen Av imôngo ye.

¹⁹ Mbahenen mbala za, za er er Yesu kaa ve nahan. Ve sôr Paseka kpaa.

²⁰ Tsô iyange i been yô, A tema kwaghyan a mbahenen mba pue kar uhar.

²¹ Mba ngur yan ave yô, A kaa er: Mimi je M kaan ne ne, u môm ken a ven una nenge mker sha a Mo.

²² Asema vihi ve kpishi, tsô ve gba pinen Un môm môm er: Ka mo, shinii, Tere?

²³ A gema A kaa er: Ka un u a lu zan uwegh a Mo shin gbande imôngo la, ka un je una nenge mker sha a Mo ye.

²⁴ Wan u or ngu zan er i nger sha a Na nahan, kpa kwagh á tser or u nan nenge mker sha a Na la; ka u ma i mar nan ga la, ma i lu nan guda ye.

²⁵ Tsô Yuda u a nenge mker sha a Na la, gema pine er: Ka mo shinii, Ortesen? A kaa a na er: U kaa tsô.

²⁶ Mba ngur yan ave yô, Yesu tôô bredi A sôn iveren i dedoo sha mi, A coon, A na mbahenen, A kaa er: Ngohol nen, ya nen, ka iyol Yam je ne.

²⁷ Shi A tôô iyongo, sughun yô, A na ve, A kaa er: Ne cii ma nen shimi;

²⁸ gadia ka awambe Am a ikuryan je ne, a i hee a sha ci u ior kpishi sha u den asorabo.

²⁹ Kpa Me kaa ne, mayange Me kera ma zar u atam a kon u wain ne ga zan zan sha iyange i Me ma u hegh a ven imôngo sha tartor u Terem.

³⁰ Mba we icam kera yô, ve due, ve za sha uwo u Olev.

³¹ Tsô Yesu kaa a ve er: Hen tugh mbun, ne cii á na ne anzughul sha kwagh Wam, gadia i nger er: Me gbidye orkuranilev, ilev mbi ken ikum la mbia sambe.

³² Kpa Me nderen shin ku kera yô, Me hemen a ven u zan sha Galilia.

³³ Kpa Peteru gema kaa a Na er: Shin er ve cii á na ve anzughul sha kwagh Wou kpaa, mo yô, mayange á nam anzughul ga!

³⁴ Yesu kaa a na er: Mimi je M kaan we ne, hen tugh mbun ne, er ikegh ia lu a tôngo ga je tsô, ú nyiman kwa tar je wer, u fam ga.

³⁵ Peteru kaa a Na er: Shin a lu u m̱ kpe a We imôngo keng kpaa, mayange me nyiman We ga. Kape mbahenen cii kpaa ve kaa la.

³⁶ Tsô Yesu va ar a ve hen ijiir i i yilan i er Gesemane la, tsô A kaa a mbahenen Nav er: Hira tema nen heen, Me yem keela Me za er msen.

³⁷ Tsô A kua a Peteru man ônov mba Sebedeu mba uhar mbala a Na imôngo, ishima hii u vihin Un, hingir Un ken ishima dang.

³⁸ Tsô A kaa a ve er: Ishima vihin tsung je ar ken ku, tema nen heen, kura nen a Mo imôngo.

³⁹ Tsô A kporom sha hemen kpeghee, A gure a suwa ityough inya, A er msen, A kaa er: Terem, aluer a fatyô yô, iyongo ne ma i karem kera; nahan kpaa i̱ de eren sha ishima Yam ga, i̱ er sha ishima You.

⁴⁰ Tsô A va hen mbahenen mbala, A va kohol ve ve lu yaven; tsô A kaa a Peteru er: Ku! Ihwa i môm tsô kpaa ne fatyô u kuran a Mo imôngo gaa?

⁴¹ Yô, kuran nen, eren nen msen sha er né gba ken imeen ga yô, jijingi yô, rumun, kpa iyol yô, ngi a agee ga.

⁴² A shi A yem mze u sha kwa har la, A er msen, A kaa er: Terem, aluer iyongo ngin ia fatyô u karen Mo ga, saa Me ma i keng yô, i̱ er ishima You!

⁴³ A shi a va, A va kohol ve, ve lu yaven, gadia ashe yuhwa ve ikôl.

⁴⁴ A undu ve, A yem, A za er msen u sha kwa tar, A kimbir mkaanem ma ashen la.

⁴⁵ Tsô A va hen mbahenen mbala, A va kaa a ve er: Gba yaven nen tsô, mem nen, nenge, shighe kuma ve, mba nan Wan u or sha ikev i mbaasorabo.

⁴⁶ Mough nen sha, se yem nen; nenge, u a nengen mker sha a Mo la, mgbôghom.

⁴⁷ Er lu ôron ave la je, tsô Yuda, u môm ken mba pue kar uhar mbala za va, ikpelaior kpishi lu a na ijime imôngo a usanker man agudô; ve due hen upristi mba tamen man mbatamen mba nongoior la.

⁴⁸ Un u a lu nengen mker sha a Na la, vande tesen ve ikav kaa er: U me suse Un zwa la yô, ka Un je la, kôr nen Un.

⁴⁹ Fese nahan a za hen Yesu jighilii a kaa er: M sugh U, Ortesen! Tsô a gba susen Un zwa.

⁵⁰ Kpa Yesu kaa a na er: Ikar, ka nyi u ve heene? Tsô ve maa ve va shire sha a Na, ve kôr Un gbang gbang.

⁵¹ Yô, u môm ken mba ve lu a Yesu imôngo la, za uwegh tsuwa sanker na, gber wanakiriki u zegepristi la, bugh un togh.

⁵² Tsô Yesu kaa a na er: Wa sanker wou ken vaa, gadia mba ve tee sanker cii á wua di ve sha sanker.

⁵³ Shin u hen wer nana, Me fatyô u sônon Terem man hegen je kpaa Una tindim a akum a mbatyomov mba Shaav, á hemba pue kar uhar, gaa?

⁵⁴ Tsô á er nan icighanruamabera una kure sha mi vough, u a kaa er, á er nahan keng, laa?

⁵⁵ Hen ihwa la je Yesu kaa a ikpelaior la er: Ne va a usanker man agudô sha u va kôron Mo, er ka or u numun gbenda yôô? Hanma iyange kpaa M teman ken tempel, M tesen, kpa ne kôrom ga.

⁵⁶ Kpa kwagh ne cii er sha er uruamabera mba uprofeti ve̱ kure sha mi vough yô. Hen shighe la je, mbahenen mbala cii undu Un yevese.

⁵⁷ Mba ve kôr Yesu la, ve yem a Na hen ya u Kayafa, zegepristi la, henpe mbangeren man mbatamen kohol la.

⁵⁸ Kpa Peteru dondo Un ken ijime ica, zan zan hen tembe u zegepristi la; nyer ker yô, a tema a udugwer imôngo sha u nengen er kwagh la una kure yô.

⁵⁹ Upristi mba tamen man mkohol cii gba keren shiada u aiegh sha Yesu sha u vea wua Un yô,

⁶⁰ kpa ve zua a min ga, shin er mbashiada mba aiev va kpishi nahan kpaa.

⁶¹ Kpa ken masejime mbagenev za va uhar; ve kaa er: Or ne lu kaa er: Me fatyô u hemben tempel u Aôndo ne, Me shi Me maa un ayange atar.

⁶² Tsô zegepristi mough tile sha, kaa a Na er: U shi bughun zwa sha ma kwagh je gaa? Ka nyi kwagh man mban ve eren shiada sha a We nahana?

⁶³ Kpa Yesu huan ving. Zegepristi la kaa a Na er: M zua U vea Aôndo u uma mer: Ôr se dedoo, U ngu Kristu Wan u Aôndo shinii?

⁶⁴ Yesu kaa a na er: U kaa tsô! Kpa M ngu kaan ne Mer; hii hegen je né nenge Wan u or Una tema ken uwegh ku yanegh ku Ageegh, man Una va sha abeen a sha kwavaôndo.

⁶⁵ Tsô zegepristi ande akondo a na kaa er: A tuhwa Aôndo ve! Shi kwagh gba se a shiada? Nenge ase, ne ungwa mtoho u A toho hegen ne.

⁶⁶ Ne nenge nana? Ve gema ve kaa er: A kuma ku je.

⁶⁷ Tsô ve ta Un azer sha ishi, shi ve ta Un azu kpaa; mbagenev ta Un sambe.

⁶⁸ Ve kaa er: Pase ase, We Kristu ne, ka an nan gbidi We?

⁶⁹ Yô, Peteru tema hen tembe ken won. Wankwase ugen za va her a na, va kaa er: We kpaa, u lu a Yesu, Or u Galilia ne imôngo!

⁷⁰ Kpa a tuna sha ishiv vev cii, a kaa er: M fa kwagh u u er ne ga!

⁷¹ Tsô ngur van u duen sha puadwer yô, wankwase ugen nenge a na, shi kaa a mba ve lu her la er: Or ne kpaa lu a Yesu, Or u Nasareti ne imôngo.

⁷² A shi a tuna sha mbum kpaa er: M fa a ne yagh Or ne ga!

⁷³ Ka tem dôghôô yô, mba ve tile her la, ve va, ve va kaa a Peteru er: Mimi je, we kpaa, u ngu u ken ve, gadia ka ilyam wou je a pase u ye.

⁷⁴ Tsô a gba tuhwan man bumun kpaa kaan er: M fa Or shon ga. Fese nahan ikegh maa tôngo.

⁷⁵ Tsô Peteru umbur mkaanem ma Yesu kaa un la er: Ikegh ia lu a tôngo ga je tsô ú nyiman kwa tar wer, u fam ga. Tsô a due ken won, a gba za vaan tsung.