Mateu 25 - ICIGHAN BIBILO

¹ Tartor u Sha ua lu inja er anuunaukase pue, a a tôô amenger a ve, ve due sha u za keghen orkwasehe gbenda.

² Mba utaan ken ve lu mbalanenkwagh, mba utaan yô, lu mbafankwagh.

³ Gadia mbalanenkwagh mbala, er ve tôô amenger a ve yô, ve kera tôô mkurem kpaa ga.

⁴ Kpa mbafankwagh mbala yô, tôô asegh a mkure a ve a amenger a ve imôngo.

⁵ Tsô er orkwasehe timbir u van yô, ve cii ve meer mnyam, ve yav.

⁶ Kpa ka kom atôutu yô, i ungwa angwe u orkwasehe er: Orkwasehe ngu van, due nen za kegh nen un gbenda!

⁷ Nahan anuunaukase la cii nder, gba sôron amenger a ve.

⁸ Mbalanenkwagh mbala kaa a mbafankwagh la er: Pande nen se mkurem enem man, gadia amenger ase nga pirin.

⁹ Kpa mbafankwagh mbala gema kaa er: Alaghga maa kuma se a ven imôngo ga. Guda yô, za nen hen mbateen, za yam nen ma enem.

¹⁰ Tsô mba ngur yemen sha u za yamen yô, orkwasehe za va; mba ve wa ago iyol la ve nyôr a na imôngo ken iyou i iniongo i kwasehe maa i wuhe hunda.

¹¹ Ken masejime la yô, anuunaukase agen la kpaa shi va, va kaa er: Tere Tere, shi bugh se ga!

¹² Kpa a gema a kaa er: Mimi je, m kaan ne ne, m fa ne ga.

¹³ Yô, kuran nen gadia ne fa iyange shin ihwa kpaa ga.

¹⁴ Gadia ka er or u a lu yemen tar ugen u icaa; tsô a yila mbatomov nav a wa ve inyaregh nagh sha ikev.

¹⁵ A na ugen talenti utaan, ugen la uhar, man ugen la môm; hanmô ve sha agee a nan; tsô maa a yem zende na.

¹⁶ Nahan un u i na un talenti utaan la, yem za er kasua a mi, zua a mtsera utalenti mbagenev utaan.

¹⁷ Kape u a ngohol uhar la kpaa, a zua di a mtsera sha mi uhar.

¹⁸ Kpa u a ngohol môm la yô, a za time ihungwa shin inya, yer inyaregh ki ter na la shimi.

¹⁹ Tsô ka tse gbang yô, ter u mbatomov mbala za hide, ôr iyenge i inyar a ve.

²⁰ U a ngohol talenti utaan la za ve yô, va a talenti utaan a kaa er: Tere, ka talenti utaan mba iyange u nam ne; yô, nenge ase, m shi m zua a talenti mbagenev utaan sha mi.

²¹ Tsô ter na kaa a na er: Doo yum, we ortom u injaa u jighjigh, u er jighjigh sha akaa a kpeghee, nahan me ver u sha akaa kpishi. Nyôr ken iember i teru.

²² Shi un u a ngohol talenti uhar la kpaa, za va, va kaa er: Tere, iyange u nam talenti uhar: yô, nenge ase, m shi m zua a talenti uhar sha mi.

²³ Ter na kaa a na er: Doo yum, we ortom u injaa, u jighjigh, u er jighjigh sha akaa kpeghee; nahan me ver u sha akaa kpishi. Nyôr ken iember i teru.

²⁴ Tsô u a ngohol talenti môm la, kpaa za va, va kaa er: Tere, m fa u, u ngu or u taver inja; ka u sunda henpe u lee ga yô, ka u kohol henpe u vande saren ga yô.

²⁵ Yô, mo m cia a yagh, m za yer talenti wou ne shin inya; ngohol a you kwagh wou.

²⁶ Kpa ter na la gema kaa a na er: We, ortom u ifer u wan hwev ne, u fa mo m sondo henpe m lee ga, m kohol henpe m vande saren ga.

²⁷ Ma u za koso inyaregh yagh ken iyou i inyar, er m hir nahan yô, ma m ngohol kwagh wam a mtsera sha mi.

²⁸ Yô, ngohol nen talenti la her a na, gema na nen u a lu a mi pue la,

²⁹ gadia hanma or u nan lu a kwagh yô, á seer nan, nana lu a mi kpishi; kpa u nan lu a kwagh ga yô, kwagh u nan lu a mi je kpaa, á ngohol hen nan kera.

³⁰ Man shi kende nen ortom u ifer shon ken ime i ken won la, keregh la mliam maa lu kua anyi a yan.

³¹ Kpa zum u Wan u or Una va sha iengem Na a mbatyomov mba Shaav cii a Na imôngo yô, zum la Una tema sha ikônough Nagh ki torough ki engem la;

³² á kohol akuraior cii sha ishigh Nagh, Una pav ve kposo er orkuranilev ka nan pav iyôngo a ivo nahan.

³³ Una ver iyôngo ken uwegh Nagh ku yanegh, kpa ivo yô, Una ver i ken uwegh Nagh ku imesegh.

³⁴ Zum la Tor la Una kaa a mba ve lu ken uwegh Nagh ku yanegh la er: Va nen, ne mba i saan ne iyol mba Terem, ya nen dyako u tartor u i ver sha ci wen hii sha igbetar je la.

³⁵ Gadia ijen lu kôron Mo, kpa ne nam kwaghyan; imura lu kôron Mo, kpa ne nam kwagh u man; M lu orvannya kpa ne nyôr a Mo;

³⁶ M lu idyelegh, kpa ne zerem ikondo; M lu uange, kpa ne va nengem; M lu ken gaadi, kpa ne va sôrom.

³⁷ Tsô mbaperapera vea gema á kaa a Na er: Tere, ka hanma shighe se nenge ijen kôr U man se na U kwaghyana? Man shi se nenge imura kôr U ve se na U kwaghmana?

³⁸ Man shi ka hanma shighe se nenge U lu orvannya ve se nyôr a Wee? Shin U lu idyelegh ve se zer U ikondo?

³⁹ Man shi ka hanma shighe se nenge U uange shin ken gaadi man se va her a Wee?

⁴⁰ Tsô Tor la Una gema Una kaa a ve er: Mimi je M kaan ne ne, er ne er a mô gen u ken anmgbianev Av mba hemban gban ijime mban nahan yô, ka Mo je ne er a Mo nahan ye.

⁴¹ Tsô Una shi Una gema Una kaa a mba ve lu ken uwegh Nagh ku imesegh la er: Yem nen heen kera, ne mba i we ne ifan, yem nen ken usu u tsôron u i keer sha ci u diabolo a mbatyomov nav la.

⁴² Gadia ijen lu kôron Mo, kpa ne nam kwaghyan ga; imura lu kôron Mo, kpa ne nam kwagh u man ga;

⁴³ M lu orvannya, kpa ne nyôr a Mo ga; M lu idyelegh, kpa ne zerem ikondo ga; M lu uange, M lu ken gaadi, kpa ne va sôrom ga!

⁴⁴ Tsô ve kpaa vea gema á kaa er: Tere, ka hanma shighe se nenge ijen kôr U, shin imura kôr U, shin U lu orvannya, shin U lu uange, shin ken gaadi ve se wase U ga?

⁴⁵ Tsô Una gema Una kaa a ve er: Mimi je M kaan ne ne, er ne er nahan a mô u ken mba hemban gban ijime mban ga yô, ka Mo je ne er a Mo nahan ye.

⁴⁶ Mbala vea kar vea yem ken mtsaha u tsôron; kpa mbaperapera yô, vea nyôr ken uma u tsôron.