Mateu 2 - ICIGHAN BIBILO

¹ Tsô er i mar Yesu ken Betelehem u ken tar u Yudia sha ayange a tor Herode yô, mbafankwagh due vegher u sha ityoughkitaregh la, va ken Yerusalem,

² ve pine er: Tor u Mbayuda u i mar Un ne, ka han A lu? Gadia se nenge ishan Na sha ityoughkitaregh, man se ve ser, sé va civir Un ye.

³ Tor Herode ongo nahan yô, ishima ta un kwe, kua ior mba ken Yerusalem cii a na imôngo.

⁴ Tsô er a kohol upristi mba tamen cii kua mbangeren mba nongoior la yô, a pine ve hen ape á mar Kristu yô.

⁵ Ve kaa a na er: Ka ken Betelehem u ken tar u Yudia, gadia kape profeti nger je la er:

⁶ We, Betelehem, tar u Yuda, mayange je u lu u gban ijime ken mbahemenev mba Yuda ga; gadia ka ken we je man Orhemen Una due, u Una kuran nongoior Wan Iserael ye.

⁷ Tsô Herode yila mbafankwagh mbala ken myer pine ve vighe vighe sha u ma un fe shighe u ishan la i ande yô.

⁸ Tsô a na ve gbenda u zan hen Betelehem, a kaa er: Za nen za time nen sha kwagh u Wanikundan la doo doo; nea zua a Na yô, va ôrom nen, sha er mo kpaa me za, me za civir Un yô.

⁹ Mba ongo imo i tor nahan yô, ve gba yemen. Yô, ishan i ve nenge a mi sha ityoughkitaregh la, lu zan ve sha hemen zan zan i za tile sha hen ijir i Wanikundan la lu la.

¹⁰ Mba nengen a ishan la yô, ve ember kpen kpen.

¹¹ Tsô ve za nyôr ken iyou la, ve nenge a Wanikundan la a ngô Na Maria, ve gure inya ve civir Un, ve gema ve sagh ikav vev, ve na Un iwua: zenaria man kwaghhumandoon man mire.

¹² Kpa Aôndo wa ve kwagh ken mnyam ma cien er, ve̱ de kera hidi hen Herode ga, nahan ve mough, ve kar gbenda ugen, ve yem tar ve.

¹³ Tsô mba yemen kera yô, ortyom u Ter va ande hen Yosev ken mnyam ma ciem, kaa er: Mough, tôô Wan ne kua ngô Na, yevese yem ken Igipiti, za lu ker zan zan Mo man Me kaa u ye; gadia Herode una ker Wanikundan ne a ku.

¹⁴ Tsô a maa a mough je, a tôô Wanikundan la kua ngô Na tugh, a yem ken Igipiti;

¹⁵ a za lu keela zan zan Herode kar kpen, sha er kwagh u Ter lu kaa sha ikev i profeti la a̱ kure sha mi vough yô, er: Ka ken Igipiti man M yila Wan Wam ye.

¹⁶ Tsô Herode nengen er mbafankwagh mbala bume un a bume yô, ishima vihi un tsung, a tindi er, i̱ za wua mbayevnomso mba ve lu ken Betelehem kua ken ityar i i kase un la ca ca, hii sha mba ve lu anyom ahar kua mba ve yen nahan kpaa, sha inja i shighe u a time vighe vighe hen mbafankwagh la.

¹⁷ Nahan zum la kwagh u profeti Yeremia lu ôron la, kure sha mi vough, ape a kaa er:

¹⁸ I ungwa imo ken Rama, mliam ma haan man mzungu tsung! Rahel ngu vaan ônov nav, a rumun er i̱ sur un ishima ga, sha ci u ve kera lu ga yô.

¹⁹ Kpa Herode va kpe kera yô, ortyom u Ter za ande hen Yosev ken mnyam ma cien ken Igipiti,

²⁰ kaa er: Mough sha, tôô Wanakiriki ne man ngô Na, yem ken tar u Iserael gadia mba ve lu keren Wan ne a ku yô, ve kpe kera ve.

²¹ Tsô a mough, a tôô Wan la man ngô na, a va nyôr ken tar u Iserael.

²² Kpa ongo er Arekilau tema tor ken tar u Yudia sha ityough ki ter na, Herode yô, a cia u zan ker; shi i wa un kwagh ken mnyam ma cien, nahan a kar a za nyôr ken tiôn u Galilia,

²³ a za a za tema ken gar ugen u i yilan er Nasareti la, sha u kwagh u uprofeti lu ve kaa la, a̱ kure sha mi vough yô, er: Á yila Un er Ornasareti.