Mateu 17 - ICIGHAN BIBILO

¹ Tsô ayange nga kar ataratar yô, Yesu kua a Peteru man Yakobu man anngô na Yohane, za unde sha gôgôwo, ve tseegh;

² tsô i gema iyol Na sha ishiv vev; ishigh Nagh engem er iyange nahan, akondo Na kpaa kungu segh segh er iwanger nahan.

³ Tsô Mose man Eliya va ande her a ve gba ôron kwagh a Na.

⁴ Peteru gema kaa a Yesu er: Tere, se mba heen nahan doo; a lu ishima You yô, me er atumbe atar hen ijiir ne, i môm sha ci u Wou, i môm sha ci u Mose, i môm di sha ci u Eliya.

⁵ Tsô ngur ôron kwagh nahan ave je yô, ibeenegh ki iwangeregh va gba mure sha a ve; tsô imo due ken ibeenegh kila, kaa er: Ngun ka Wan Wam u ishima ishima, u ishima i doom a Na yum yô, ungwan nen Un.

⁶ Mbahenen mba ongo nahan yô, ve gba inya ve cir ishigh inya, cier ve iyol tsung je.

⁷ Tsô Yesu va, va kpoghol ve, A kaa er: Mough nen sha, de cie nen ga.

⁸ Mba kenden ashe sha yô, ve kera nenge a ma or ga, saa Yesu tseegh.

⁹ Tsô mba ngur hungwan sha uwo la yô, Yesu ta ve icin, kaa er: De ôron nen ma or kwagh u ne nenge ne ga, saa Wan u or Una vande nderen shin mbakpenev ve.

¹⁰ Mbahenen Nav pine Un er: Man er nan mbangeren ve kaan er: Saa Eliya una vande van kenge?

¹¹ A gema A kaa er: Ka mimi, Eliya una vande van man una sôr akaa cii kpaa.

¹² Kpa M ngu kaan ne mer, Eliya vande van a ne nagh kera, kpa ve fa un ga man ve er un nyi ityôkwagh i i sar ve u eren un yô. Kape Wan u or kpaa Una ya ican sha ikev ve la.

¹³ Zum la mbahenen Nav kav er i lu Yohane u eren batisema A er ve kwagh na yô.

¹⁴ Tsô mba ve hen ikpelaior yô, orgen va her a Na, va gure Un inya, gba kaan er:

¹⁵ Tere, zungwe wan wam mhôônom, gadia gbe ikungu, ngu dedoo ga tsung je, sha ci u ka a gba shin usu acin imôngo je kua shin mnger kpaa.

¹⁶ Man m va a na hen mbahenen Ou kpa ve fatyô u been un ga.

¹⁷ Yesu gema kaa er: Kpash! Kov u lun a jighjigh u nan ga, u lun geseghee ne, mase shin ayange a me je man Me wa ishima a vene? Va nen a na her a Mo.

¹⁸ Tsô Yesu yange un, maa jijingi u bo la due ken a na kera; hen shighe la je wanakiriki la hingir dedoo.

¹⁹ Tsô mbahenen va hen Yesu ape lu tswen yô, ve va kaa er: Ka nyi man se se fetyô u dughun un kera ga?

²⁰ Yesu kaa a ve er: Ka sha ci u myina u jighjigh wen u nan; gadia ka mimi je M kaan ne ne, aluer nea lu a jighjigh u nan sha inja i ishange i masetadi yô, ma ne kaa a uwo ne ner: Mough heen, hire keela, kpa ma u mough; man ma kwagh u ne fatyô u eren un ga yô, una kera lu ga.

²¹ [Kpa imba ne i gbe duen ga saa sha msen u eren man kwaghyan u hôron]

²² Tsô er ve lu zenden ken Galilia la yô, Yesu kaa a ve er: Á na Wan u or sha ikev i ior.

²³ Vea wua Un kpaa, man sha iyange i sha utar la á nder Un. Nahan asema vihi ve kpishi.

²⁴ Tsô mba ve ken Kapernahum yô, mba ve ngohol kpandegh ku tempel la va hen Peteru, va pine un er: Ortesen wou te kpandegh ku tempel gaa?

²⁵ A kaa er: Te! Tsô nyer ken iyou yô, Yesu vande ôron kwagh a na, kaa er: U hen nana, Shimon? Ka unô man utor mba tarev ve sav akaa man ve ngohol kpandegh hen ve, ka hen ônov vev shinii, ka hen mbavannya.

²⁶ Peteru kaa er: Ka hen mbavannya. Tsô Yesu kaa a na er: Nahan ônov yô, ve tema enger enger.

²⁷ Kpa sha u se na ve gbev mbu nôngon ga yô, za shin kpe u zegemnger, za kende tsuwe, tôô ishu i wea vande kôron la; ú bughun i zwa yô, ú zua a shekel môm; tôô, za na ve sha ci Wam vea we.