Mateu 15 - ICIGHAN BIBILO

¹ Tsô Mbafarishi man mbangeren due ken Yerusalem va hen Yesu, ve kaa er:

² Ka nyi mbahenen Ou ve undu aeren a mbayiase, gadia mba ee ave a ve shighe u ka vea yaan kwaghyan la ga.

³ Kpa A gema A kaa a ve er: Man ka nyi ne kpaa ne peren tindi u Aôndo sha aeren a en laa?

⁴ Gadia Aôndo kaa er: Civir teru man ngôu; man u nana tuhwa ter shin ngô yô, nana kpe keng.

⁵ Kpa ne yô, ne mba kaan ner: Hanma or u nana kaa a ter u nan shin ngô u u nan er: Kwagh u ma u zough a iwasen sha mi her a mo yô, ka nagh ku i na Aôndo;

⁶ nahan nan kera civir ter u nan shin ngô u nan ga. Nahan yô, ne gema kwaghôron u Aôndo hingir gbilin sha aeren a en je ve.

⁷ Ne mbaimangerev, kwagh u Yesaia tsengaôron sha a ven yô, ka vough je, er lu kaa er:

⁸ Nongoior ne ngu civir Mo sha ityumbujôôgh ve tseegh, kpa ishima ve yô, ngi ica a Mo je.

⁹ Nahan ka gbilin tsô ve civir Mo, sha ci u ityesen i ve tesen la ka atindi a ior tsô.

¹⁰ Tsô a yila ikpelaior her a Na A kaa a ve er: Ver nen ato her a Mo man shi kav nen kpaa.

¹¹ Ka kwagh u a nyer or ken zwa man a ne nan kera lu wang ga ze. Kpa ka kwagh u a dugh ken zwa, ka a na or nan kera lu wang ga ye.

¹² Tsô mbahenen Nav va her a Na, va kaa a Na er: U fa er Mbafarishi ve ongo kwaghôron ne nahan, asema a vihi ve kpa?

¹³ Kpa A gema A kaa er: Hanma kwagh u i lu Terem u Sha a môôr ga yô, á wuhe un kera.

¹⁴ De nen ve kera; ka mbaapirashe shi mba hemen mbaapirashe gbenda. Aluer orapirashe nana kôr orapirashe ugen aga yô, ve uhar cii vea gba shin akpa.

¹⁵ Tsô Peteru gema kaa a Na er: Pase se injakwagh ne.

¹⁶ Kpa Yesu kaa er: Ne je kpaa, ne mba a mkav gaa?

¹⁷ Ne mba a fa er hanma kwagh u a nyer ken zwa, ka a sen shin uya, i za due a mi ken won je gaa?

¹⁸ Kpaa akaa a a dugh ken zwa yô, ka ken ishima a dugh ye, ka a je, a ne or nan kera lu wang ga ye.

¹⁹ Gadia ka ken ishima man aferakaa a henen kua iwooor man idya man iv man mbampase mba sha aie man ityuhwanev ve dugh ye.

²⁰ Ka ve ve ne or nan kera lu wang ga ye; kpa u ôôn ave ga, yan kwagh yô, gem or nan lu wang ga ze.

²¹ Tsô Yesu mough heregh, gba yemen ken tar u Tiru man Shidon.

²² Tsô kwase ugen u ken Kanaan u a lu ken iningirtar la, a genger imo, a kaa er: Zungwem mhôônom Tere, We Wan u Davidi, jijingi u bo ngu eren wan wam u kwase ican tsung.

²³ Kpa A bugh un zwa sha ma kwagh môm ga. Mbahenen Nav va, va zamber a Na er: Shi na un gbenda, gadia ngu vaan, van a vese ityô.

²⁴ Kpa A gema A kaa er: Ka hen iyôngo i hen ya u Iserael i i saa la tseegh i tindim ye.

²⁵ Kpa kwase la va, gure civir Un, kaa er: Tere, shi wasem yôô!

²⁶ Kpa A gema A kaa er: Doo u tôôn kwaghyan u uôn, kenden aniwaav ga.

²⁷ Kpa a kaa er: Een, Tere, aniwaav kpaa mba ye avur a akaayan a sha tebul u uter vev a a hee inya la.

²⁸ Tsô Yesu gema kaa a na er: Kwase, jighjigh wou vese tsô; yô, i̱ er u er i sar u nahan la vough. Wan na u kwase la angev maa bee un hen shighe la je.

²⁹ Tsô Yesu mough keela, gba teran hen zegemnger u Galilia; za unde sha uwo, A tema sha her.

³⁰ Tsô ikpelaior va her a Na, ve lu a mbasombon man mbakeer man mbaapirashe man mbakondonaker, man mbagenev kpaa kpishi, ve va ver ve hen ikum Na nahan A war ve;

³¹ kpiligh ikpelaior iyol, er ve nenge mbakondonaker lu lamen, mbakeer hingir dedoo, mbasombon lu zenden, mbaapirashe lu nengen; tsô ve gba civir Aôndo u Iserael.

³² Tsô Yesu yila mbahenen Nav her a Na kaa a ve er: Mhôônom kôrom a ikpelaior ne, gadia mba a Mo ityô ka ayange atar je ne, man kwagh u vea ya kpaa, mba a min ga: yô, sarem pe nan ve gbenda ijen ga, sha u ve̱ de za vôron sha gbenda ga yô.

³³ Mbahenen kaa a Na er: Ka han man sé za zua a kwaghyan kpishi ken toho ne, ve una kuma imbaikpelaior ne nahana?

³⁴ Yesu pine ve er: Ne mba a ubredi u me? Ve kaa er: Mba utaankaruhar kua ishu i kiriki kpeghee tsô.

³⁵ Tsô A yôô ikpelaior haa inya.

³⁶ A tôô ubredi mba utaankaruhar kua anishuuv mbala, sughun yô, A coon, A na mbahenen; mbahenen di gema na ikpelaior.

³⁷ Ve cii ve ya kuma ve; ve kohol avur a a neer la iv akese ataankarahar

³⁸ Mba ve ya yô, nomso lu dubu unyiin, i wa kasev man mbayev ker ga.

³⁹ Tsô A na ikpelaior gbenda; maa A nyôr ken tso, A va ken tar u Magadan.