Mateu 13 - ICIGHAN BIBILO

¹ Sha iyange la je Yesu due ken iyou, za tema hen kpezegemnger.

² Ikpelaior kpishi kohol her a Na; nahan A nyôr A tema shin tsô. Ikpelaior cii yô, gema tile sha kpe.

³ Nahan A ôr ve akaa kpishi sha anzaakaa, A kaa er: Ortanivor due sha u za tan ivor.

⁴ Ngur tan yô, ivor igen haa sha kpegbenda; inyon va, sange i, ya.

⁵ Igen haa sha ikuu, ape i zough a inya kpishi ga yô; fese nahan i mende sha ci u inya i civir her ga yô.

⁶ Er iyange due yô, oo ta i, i uma sha ci u i lu a mise ga yô.

⁷ Igen haa ken usaa; usaa vese imbishi i.

⁸ Igen haa ken inya i dedoo; via, iyiagh hemba ivor la kwa akunduataan, igen akunduatar, igen ikundugber.

⁹ Or u nan lu a ato a ungwan yô, nana̱ ungwa.

¹⁰ Tsô mbahenen Nav va, pine Un er: Inja na nan man U er ve kwagh sha anzaakaa?

¹¹ A gema A kaa a ve er: Ne yô, i na ne sha u ne̱ fa akaa a myer a tartor u Sha, kpa ve yô, i na ve ga.

¹² Gadia hanma or u nan lu a kwagh yô, ka nan á seer nan nana gema nana lu a mi kpishi ye; kpa hanmô u nan lu a kwagh ga yô, ka nan man á ngohol nan kwagh u nan lu a mi la kpaa ye.

¹³ Ka sha ci u nahan man M er ve kwagh sha anzaakaa ye, gadia shin er ve nengen nahan kpaa mba nengen ga, man er ve ongo nahan kpaa mba ungwan ga, mba kaven kpaa ga.

¹⁴ Nahan kwagh u profeti Yesaia lu ôr la kure sha a ve vough er: M-ongo yô, né ungwa, kpa á wanger ne je ga. Mnenge kpaa né nenge, kpa né kav je ga.

¹⁵ Gadia ishima i nongoior ne cighir, ato a ve kpaa nga ongo dedoo ga; ve kusu ashe a ve kpaa, sha u vea nenge sha ashe a ve ga; man vea ungwa sha ato a ve kpaa ga, vea kav ken asema a ve ga, vea shi vea gema man Mo Me bee ve angev ga.

¹⁶ Kpa ne yô, saan ashe a en iyol, gadia nga nengen, ato a en kpaa saan a iyol gadia nga ungwan.

¹⁷ Gadia mimi je M kaan ne ne, lu sar uprofeti man mbaperapera kpishi u ma ve nenge akaa a ne nenge ne, kpa ve nenge a mi ga, shi u ma ve ongo akaa a ne ongo ne, kpa ve ungwa a ga.

¹⁸ Nahan ne yô, ungwa nen injakwagh i ortanivor ne:

¹⁹ Hanma or u ka nana̱ ungwa kwaghôron u tartor man nana̱ kav ga yô, or u ifer a va, a va tsuwe kwagh u i lee ken ishima i nan la kera; ka u i te ivor hen a nan sha kpegbenda je la.

²⁰ U i te ivor hen a nan sha ikuu yô, ka u ka nan ungwa kwaghôron, nan ngohol fese saan saan je la;

²¹ kpa nan lu a mise ken iyol i nan ga, nan taver ishima ica i gba ga; kpa er mkighir u sha ican shin mtev u sha ican una moughon a nan sha ci u kwaghôron la yô, nan nôngo gbev fese je.

²² Man u i te ivor i nan ken usaa yô, ka u ka nan ungwa kwaghôron la kpa anzughul a tar ne a nyian ishima man icugh i inyar ve va imbishi kwaghôron la, a kera ume atam ga.

²³ U i te ivor hen a nan hen inya i dedoo yô, ka u ka nan ungwa kwaghôron, nan kav un; ka nan je ka nan ume atam nan tser ye; ugen kwa akunduataan, ugen akunduatar, ugen yô, ikundugber.

²⁴ Shi A va ve a injakwagh igen, A kaa er: Tartor u Sha ngu er or u nan lee ivor i dedoo ken sule u nan.

²⁵ Kpa zum u ior lu yaven yô, orihom u nan za va, va lôô ivor i bo ker atô u uwua, tsô a yem.

²⁶ Kpa er iyiagh mende vese, man ki hiin u maren yô, ivor i bo la kpaa gema due ken igbar.

²⁷ Nahan mbashiren mba orsule la va, va kaa a na er: Tere, ka ivor i dedoo yan u lôô ken sule wou gaa, man ka han u zough a ivor i bo nee?

²⁸ A kaa a ve er: Ka ma orihom nan er nahan ye. Tsô mbashiren mbala kaa a na er: Nahan ka u ka se̱ za wuhe i se̱ kura kera?

²⁹ Kpa a kaa er: Ei, alaghga né za wuhen ivor i bo la yô, né wuhe i a uwua imôngo.

³⁰ Yô, de nen i cii, i̱ vese imôngo zan zan shighe u sundan; man sha shighe u sundan yô, me kaa a mbasundan mer: Vande sangen nen ivor i bo la kera man kange nen aile aile sha u za nanden; kpa gema kohol nen uwua, za ombom sha wuna.

³¹ Shi A va ve a injakwagh igen, A kaa er: Tartor u Sha ngu er ishange i masetadi i or nan tee nan za lee ken sule u nan yô.

³² I yô, i hemba ndahar a asangeakaa agen cii je; kpa er ka ia mende a vese yô, i hemba aveghem a uyia i̱ hingir kon je, inyon i sha i va, i va wa aya sha agbaa a na.

³³ Shi A ôr ve injakwagh igen er: Tartor u Sha ngu er kwa u kwase ka nan tôô, nan wa ken mwem ma ma kom uikaren utar zan zan u zende sha mi cii je.

³⁴ Akaa angan cii Yesu ôr ikpelaior sha anzaakaa, gbaa ôron ve ma kwagh ga, saa sha injakwagh;

³⁵ sha u kwagh u i ôr sha ikev i profeti Yesaia la yô, a̱ kure sha mi vough, er: Me bugh zwa Wam Me ôr anzaakaa. Me pase akaa a a lu myer er i gba tar je la.

³⁶ Tsô A na ikpelaior gbenda A za nyôr ken ya, Nahan mbahenen Nav va her a Na, ve kaa er: Pase se inja i kwagh u ivor i bo i ken sule la.

³⁷ Nahan A gema A kaa er: Or u lôôn ivor i dedoo la, ka Wan u or je la.

³⁸ Sule la yô, ka tar; ivor i dedoo la yô, ka ônov mba tartor; ivor i bo la gema ka ônov mba iferor.

³⁹ Orihom u a lee i la yô, ka diabolo; sunda la yô, ka mkurtar; mbasundan mbala yô, ka mbatyomov mba Shaav.

⁴⁰ Er ka i kohol ivor i bo la, i nande sha usu nahan, kape á er sha iyange i mkurtar je la.

⁴¹ Wan u or Una tindi mbatyomov Nav, man atôakaa a nan gbev mbu nôngon ci ca, man mbavendan atindi kpaa vea kura ve ken tartor Na kera,

⁴² vea haa ken igyamusu; keregh la mliam maa lu kua anyi a yan.

⁴³ Shighe la mbaperapera vea engem er ka iyange nahan sha tartor u Ter ve. U nan lu a ato a ungwan yô, nana̱ ungwa.

⁴⁴ Tartor u Sha ngu er kwagh u injaa u i yer ken sule ugen, u or za zua a mi, maa nan gem nan yer; sha iember i nan la nan gema nan za tee akaa a nan lu a mi la cii, nan za yam sule la.

⁴⁵ Shi tartor u Sha ngu er or u teen kasua, keren utagbede mba dedoo.

⁴⁶ Er nan za zua a tagbede môm u lun ishe kpishi yô, nan yem nan za tee akaa a nan lu a mi la cii, nan za yam un.

⁴⁷ Man shi tartor u Sha ngu er kper u kpelan a kpela u i hee shin zegemnger, a kohol ishu atô kposo kposo.

⁴⁸ Ivin yô, ior ve urugh ve due a mi sha kpetar, ve tema ve kohol i dedoo la, ve haa ken uika, kpa i bo la yô, ve haa kera.

⁴⁹ Kape á lu sha mkurtar je la. Mbatyomov vea due, vea sange mbaaferev ken mbaperapera kera;

⁵⁰ vea haa ve ken igyamusu, keregh la mliam maa lu kua anyi a yan kpaa.

⁵¹ Ne kav akaa angan cii kpa? Ve rumun a Na er: Een!

⁵² Tsô A kaa a ve er: Kape i lu man hanma orngeren u nan hingir orhenen ken tartor u Sha yô, nan ngu er orya nahan u ka nan dughun akaa a he man a tse ken iyou i nan i koson akaa a injaa la.

⁵³ Tsô Yesu, er A kure kwaghôron u sha anzaakaa ne yô, A mough heregh kera.

⁵⁴ Va nyer ken gar Na yô, A tese ve ken shinagoge ve, tsô kpiligh ve iyol, ve kaa er: Ka han Or ne A zough a mfe ne man ityom i ageegh ne?

⁵⁵ Ngun ka Wan u orgbanakaa ne gaa? Mba yer ngô Na er, Maria; anngôôv Nav yô, ka Yakobu man Yosev man Shimon man Yuda gaa?

⁵⁶ Anngôôv Nav mba kasev kpaa mba a vese heen cii gaa? Yô, ka han je Or ne A za zough a akaa angan cii ase?

⁵⁷ Nahan anzughul lu ve ken ishima sha kwagh Na. Tsô Yesu kaa a ve er: Profeti de lun a icivir ga, saa ken gar u nan man hen ya u nan tsô.

⁵⁸ Nahan A kera er akaa a ageegh kpishi keregh ga sha ci u mban u jighjigh ve u nan.