Marku 5 - ICIGHAN BIBILO

¹ Tsô ve per zegemnger yande la, ken tar u Gerasene.

² Mba dugh shin tso yô, fese nahan or u lun a jijingi u hôngorough due shin iwar, va kohol Un;

³ ijiir na i tsan yô, lu ken iwar, man or kera fatyô u kangen un ga, sha mshir je kpaa i fatyô ga.

⁴ Gadia i kange un acin imôngo sha ahye a haan man mshirim, kpa a tôndo mshirim mara kera, a tôndo ahye kpaa, or môm môm kera lu a agee a kôôm un ga.

⁵ Gbem je, tugh man tetan, lu ken iwar man sha iwo, yôôso genger genger, kômbon iyol na sha awen.

⁶ Nengen a Yesu ica je tsô a ande ayem, a za gure Un inya,

⁷ genger imo taver taver, kaa er: Ka nyi i zoughom a We, Yesu Wan u Aôndo Uhembansha? M zua U vea Aôndo, de eren mo ican ga.

⁸ Gadia A kaa a na er: We, jijingi u hôngorough, due ken or ne kera.

⁹ A pine un er: Iti you er ana? A kaa a Na er: Iti yam er ikpela, gadia se mba kpishi.

¹⁰ Tsô a zamber a Na tsung er, A̱ de kera zendan ve ken tar la kera ga.

¹¹ Hen ijiir la ikpelaigo lu kpishi, lu yan akaa hen imbusuwoogh.

¹² Nahan ve zamber a Na er: Tindi se hen igo la, se̱ za nyôr ken i.

¹³ Tsô A rumun. Ujijingi mba hôngorough mbala, mba dugh yô, ve nyôr ken igo la; ikumigo la, i kuma er dubu uhar nahan, i hembe ayem, i za haa shin zegemnger, i saa mnger.

¹⁴ Mbakuran i nyôngoso va ôr kwagh la ken gar kua ken tar la kpaa. Nahan ior due sha u va nengen kwagh u a er yô.

¹⁵ Tsô ve va hen Yesu, nahan ve nenge a or u a lu a ujijingi mba bov la, tema, haa akondo iyol, hingir or u kaven kwagh, wen u a lu a mi kpishi la. Nahan cier ve iyol.

¹⁶ Man mba ve nenge yô, ve ôr ve kwagh u i er a or u a lu a ujijingi mba bov la, kua kwagh u i er a igo la kpaa.

¹⁷ Nahan ve gba zamber a Na er, A̱ mough ken tar ve kera.

¹⁸ Gbe nyôron shin tso yô, or u a lu a ujijingi mba bov la, zamber a Na sha u ma un lu a Na ityô.

¹⁹ Kpa A rumun nahan ga, A kaa a na er: Yem hen ya wou hen ior ou, za ôr ve akaa a vesen a Ter A er u ne, man er A zungu u mhôônom kpaa yô.

²⁰ Tsô a yem a gba za ôron akaa a vesen a Yesu A er un la ken Dekapoli; kpiligh ior iyol cii.

²¹ Tsô er Yesu shi per yande la shin tso yô, ikpelaior kpishi kohol her a Na. Un lu a zegemnger ikua ikua.

²² Tsô u môm u ken mbavesen mba shinagoge va, iti na er Yairu, nengen a Na yô, a gba hen angahar a Na,

²³ a gba zamber a Na er: Wan wam u kwase u kiriki ngu nôngon ku. Yô, va, va penda ave sha a na, angev mbu̱ bee un a̱ lu uma.

²⁴ Tsô A za vea na. Ikpelaior kpishi dondo sha a Na, i imbishi Un.

²⁵ Yô, kwase ugen u haan awambe anyom pue kar ahar,

²⁶ u a ya ican sha ikev i mbatwerev imôngo, a vihi akaa a na cii, nahan kpaa lu un kposo ga, lu zan un a za hemen;

²⁷ man er a ungwa kwagh u Yesu yô, a va hen ikpelaior ken ijime Na, a bende Un sha riga;

²⁸ gadia a kaa er: Aluer mea bende shin akondo Na tseegh tsô kpaa, me war je.

²⁹ Fese nahan imbor i awambe na tôndo, man a kav ken iyol na er angev nav mbu bee un yô.

³⁰ Fese nahan Yesu kav ken iyol Na er agee a dugh ken a Na, tsô A gema ken ikpelaior, A pine er: Ka an nan bendem akondo avee?

³¹ Nahan mbahenen Nav kaa a Na er: U nenge ikpelaior ngi imbishi We, nahan kpaa U ngu pinen Wer: Ka an nan bendemo?

³² Tsô A gba jingen sha u Una nenge or u nan er kwagh la yô.

³³ Tsô kwase la lu cian, gbidyen ikarikase iyol gadia a fa kwagh u a er un yô, a va gba inya sha ishigh Nagh, a ôr Un kwagh la sha mimi cii.

³⁴ Nahan A kaa a na er: Wankwase, jighjigh wou u nan war u ve; yem bem bem, angev ou mbu̱ bee u.

³⁵ Tsô ngur ôron kwagh nahan yô, mba ken ya u orvesen u shinagoge la va, va kaa a na er: Wan wou u kwase kpe kera. Ka nyi shi u ze Ortesen iyolo?

³⁶ Kpa Yesu, er A ungwa kwagh u i kaa la yô, A kaa a orvesen u shinagoge la er: De cie ga, gba nan jighjigh tsô.

³⁷ A rumun u ma orgen nana̱ za a Na imôngo ga, saa Peteru man Yakobu kua Yohane anngô u Yakobu.

³⁸ Nahan ve hen ya u orvesen u shinagoge la yô, A nenge ior lu zenden sha, ve lu vaan gberen kwelegh tsung.

³⁹ Nyer yô, A kaa a ve er: Ka nyi ne zenden sha, ne vaan nahana? Wankwase ne kpe ga, kpa ngu yaven a yav.

⁴⁰ Nahan ve se Un ibumegh. Kpa dugh a ve ken won kera cii yô, A kua a ter u wankwase la man ngô na kua mba ve lu a Na imôngo la, A nyôr her ape wankwase la lu yô.

⁴¹ Ker wankwase sha uwe yô, A kaa a na er: Talita kumi! Inja na yô er: Wankwase, M ngu kaan we Mer, mough sha!.

⁴² Fese nahan wankwase la mough sha, gba zenden; gadia anyom a na kuma pue kar ahar je. Nahan cier ve iyol je zua ga.

⁴³ A ta ve icin gbang gbang er, ma or nana̱ de fe kwagh ne ga, shi A kaa er, i̱ na wankwase la kwagh a̱ ya.