Marku 3 - ICIGHAN BIBILO

¹ Shi A nyôr ken shinagoge; orgen lu ker, nan uma uwegh.

² Ve haa ashe sha a Na er vea nenge shin Una bee nan angev sha iyange i memenou, sha u vea zua a kwagh u nan Un ibo sha mi yô.

³ A kaa a or U uman uwegh la er: Mough sha, tile her atô.

⁴ Nahan A pine ve er: I rumun er i̱ er kwagh u dedoo sha iyange i memen, shin i̱ vihi a vihi kwagha, i̱ yima or shin i̱ wua a wua oro? Kpa ve huan, ve bugh zwa ga.

⁵ Tsô er A gema A jinge sha a ve a iyugh, ishima lu vihin Un sha ci u asema a ve a cighir yô, A kaa a or la er: Naregh uwegh ough; a naregh ku; tsô uwegh nagh maa hingir dedoo.

⁶ Nahan Mbafarishi due za kohol a ior mba Herode fese, ve gba henen kwagh sha a Na, er vea er man vea wua Un yô.

⁷ Tsô Yesu kar a mbahenen Nav, ve yem shin kpe u zegemnger. Ikpelaior kpishi dondo sha a Na, i ken Galilia, man shi ken Yudia,

⁸ man i ken Yerusalem, man i ken Idumea, man i ken yande Yordan kua i ken ian i Tiru man Shidon kpaa, lu ikpelaior i vesen; er ve ungwa akaa a A lu eren la cii yô, ve va her a Na.

⁹ A kaa a mbahenen Nav er, i̱ ver wantso a keghen Un sha ci u ikpelaior ve̱ de imbishi Un ga yô.

¹⁰ Gadia A bee ior kpishi angev, ka nahan man mba ve lu uange cii ve sôsom her a Na sha u vea bende Un ave iyol ye.

¹¹ Ujijingi mba hôngorough kpaa, hanma shighe u vea nenge a Na yô, ve gba Un sha ishi, ve genger imo ve kaan er: We, U ngu Wan u Aôndo.

¹² A ta ve icin gbang gbang er, ve̱ de pasen Un ga.

¹³ Tsô A unde sha uwo, A yila mbala mba i sar Un a ve la, tsô ve va her a Na.

¹⁴ A ver ve pue kar uhar sha u vea lu a Na imôngo, man shi sha er Una tindin ve sha u za ôron kwaghaôndo,

¹⁵ man shi sha u vea lu a tahav mbu dughun ujijingi mba bov yô.

¹⁶ A ver mba pue kar uhar mbala: Shimon yô, a seer un iti igen er Peteru;

¹⁷ man Yakobu wan u Sebedeu kua Yohane anngô u Yakobu, A seer ve iti er Boanerge, inja na yô er, ka uidyuranmbauôn.

¹⁸ Man Anderia man Filibu man Bartolomeu, man Mateu man Toma, man Yakobu wan u Alefeu, man Tadeu man Shimon or u Kana,

¹⁹ man Yuda u Isekarioti, u a nenge Un mker la.

²⁰ Tsô A za nyôr hen ya ugen; ikpelaior shi kohol je, kwaghyan tsô kpaa, ve kera fatyô u yan ga.

²¹ Anmgbianev Nav mba ongo nahan yô, ve due sha u vea za kôr Un, gadia ve kaa er, A nyôr ihundu.

²² Mbangeren mba ve due ken Yerusalem kpaa, ve kaa er, ngu a Belesebu; ka sha tor u ujijingi mba bov man A dughun ujijingi mba bov kera ye.

²³ Nahan A yila ve, A ôr ve kwagh sha anzaakaa, A kaa er: A er nan man Satan una dugh Satana?

²⁴ Man aluer tartor ugen ua pav sha ihom yô, tartor la ua fatyô u lun her ga.

²⁵ Man aluer ya ugen una pav sha ihom yô, ya la una fatyô u lun her ga.

²⁶ Man aluer Satan una mough num a iyol na, una pav yô, una fatyô u lun her ga, kwagh na bee a bee je.

²⁷ Man shi ma or ngu u nana fatyô u nyôron hen ya u ortaveryol kuran nan inyaregh ga saa nana vande kangen ortaveryol la, man nana mase saren ya la ye.

²⁸ Mimi je M kaan ne ne, á de ônov mba iorov asorabo a ve cii man hanma ityuhwanev mbi ve toho kpaa;

²⁹ kpa or u nana tuhwa Icighan Jijingi yô, mayange je á de nan isholibo i nan ga, kpa nana ya ibo i tsôron gbem sha won je.

³⁰ Ka sha ci u ve kaa er: Ngu a jijingi u hôngorough yô.

³¹ Tsô ngô Na kua anngôôv Nav va, ve tile ken won, ve tindi loho her a Na sha u yilan Un.

³² Ikpelaior tema, kase Un; tsô ve kaa a Na er: Nenge ngôu man anngôôv Ou mba kasev mba ken won, mba keren We.

³³ A gema A kaa a ve er: Ka an nan lu ngôm man anngôôv Ava?

³⁴ Jingi sha mba ve tema ve kase Un la yô, A kaa er: Nenge, ngôm, man anngôôv Av mban.

³⁵ Gadia hanma or u nan eren ishima i Aôndo yô, ka nan je nan lu anngôm u nomso man u kwase man ngôm kpaa ye.