Marku 16 - ICIGHAN BIBILO

¹ Tsô iyange i memen kar kera yô, Maria Magedalena man Maria ngô u Yakobu, kua Salome kpaa, ve yam icimbiv mbi human doon sha u vea za shighe Un yô.

² Pepe pepe sha iyange i Lahadi la, ve va hen uwar la, er iyange ka i due nahan.

³ Tsô ve gba kaan ayol a ve er: Ka anti nana menger se iwen i sha hunda u uwaregh la keraou?

⁴ Mba kenden ashe yô, ve nenge i vande menger iwen la kera ve, gadia i gba ikôl tsô.

⁵ Mba nyer ken uwar la yô, ve nenge wanyekwaor tema ken uwegh ku yanegh, haa gôgôriga u pupuu; cier ve iyol.

⁶ Kpa a kaa a ve er: I̱ de kera cier ne iyol ga; ne mba keren Yesu u Nasareti, u i mande Un sha terankon. A nder, ngu heen ga; nenge nen henpe i ver Un la.

⁷ Kpa za, za kaa nen mbahenen Nav man Peteru ner: Ngu hemen a ven u zan sha Galilia, ka keela né za nenge a Na ye, er lu kaa ne nahan.

⁸ Tsô ve due ken uwar la fefa, ve gba yemen ayem, gadia ikarikase lu gbidyen ve iyol, cier ve iyol kpishi kpaa, ve ôr ma or kwagh ga, sha ci u ve lu cian yô.

⁹ Er a nder shin ku pepe pepe sha iyange i lahadi la yô, A hii anden hen Maria Magedalena, un u yan A dugh ujijingi mba bov ken a na utaankaruhar la.

¹⁰ Tsô un yem za kaa mba yan ve lu a Na imôngo la; asema lu vihin ve, ve lu vaan.

¹¹ Ve yô, er ve ungwa er ngu uma, un nenge a Na kpaa, ve na jighjigh ga.

¹² Ken masejime u akaa ne yô, A ande sha mlu u iyol igen hen ior uhar ken ve, zum u ve lu zan sha gbenda u ken iningirtar la.

¹³ Mbala kpaa yem, za kaa mbagenev; ve di kpaa ve na ve jighjigh ga.

¹⁴ Ken masejime la, A ande hen mba pue kar môm zum u ve tema ve lu yan kwagh la, A zôhô a ve sha ci u mban u jighjigh ve u nan man asema ve a cighir, sha ci u ve ne mba ve nenge a Na zum u Un nder shin ku la jighjigh ga yô.

¹⁵ A kaa a ve er: Zende nen sha won cii, za ôr nen uumace cii Loho u dedoo ne.

¹⁶ U nana na jighjigh man á er nan batisema yô, á yima nan. Kpa u nana na jighjigh ga yô, á ôr nan ijir á na nan ibo.

¹⁷ Uivande mban kpaa vea zaan a mbananjighjigh ityô; ken iti Yam je, vea dugh ujijingi mba bov, man shi vea ôr kwagh ken ijô i he kpaa;

¹⁸ vea tôô iyô, shin vea ma nyityô boci kpaa, una er ve kwagh mayange ga; vea penda ave sha mbalun dedoo ga, vea war kpaa.

¹⁹ Tsô zum u Ter er ve kwagh kera yô, i yem a Na Sha, A za tema ken uwegh ku yanegh ku Aôndo.

²⁰ Ve kpaa ve yem, ve gba za ôron kwaghaôndo sha won cii; Ter kpaa lu eren tom a ve imôngo, lu taver kwaghôron ve sha uivande mba ve ze a ve ityô la.