Marku 15 - ICIGHAN BIBILO

¹ Fese nahan er sev av yô, upristi mba tamen kua mbatamen man mbangeren kua mkohol u mbaajiriv cii, ve hen imôngo, ve kange Yesu ve yem a Na, ve za na sha ikev i Pilatu.

² Pilatu pine Un er; U ngu tor u Mbayuda? A gema A kaa a na er: U kaa tsô.

³ Upristi mba tamen sende Un sha akaa kpishi.

⁴ Pilatu shi pine Un er: U shi bughun zwa sha ma kwagh gaa? Ungwa ase atôakaa kpishi a ve senden We a mi ne.

⁵ Kpa Yesu kera bugh zwa sha ma kwagh ga, nahan kpiligh Pilatu iyol.

⁶ Man sha shighe u iniongo yô, a dughun ve orkwar môm u ve sen un yô.

⁷ Tsô ugen lu, iti na Baraba, a lu uikangen a mbanumuv mbagenev imôngo, mba ve wua or sha num.

⁸ Ikpelaior gba za zamber a na er, a̱ er a ve sha ier na la.

⁹ Pilatu gema kaa a ve er: Ka ne pe m̱ pase ne tor u Mbayuda shinii?

¹⁰ Gadia a kav er i lu sha iwuhe man upristi mba tamen ve ne Un sha ikev na yô.

¹¹ Kpa upristi mba tamen tor ikpelaior ityô er, guda a̱ pase ve Baraba.

¹² Pilatu shi pine ve er: Tsô m̱ er nyi a Or u ne yer Un ner tor u Mbayuda nee?

¹³ Ve shi ve genger amo er: Mande Un sha terankon!

¹⁴ Nahan Pilatu, kaa a ve er: Ka nyi kwaghbo A ere? Kpa ve ger er: I̱ mande Un sha terankon!

¹⁵ Nahan Pilatu, er i lu un ka eren sha asema a ikpelaior yô, a pase ve Baraba; man zum u i gbidye Yesu akpa kera yô, a na Un sha u i̱ za mande Un sha terankon.

¹⁶ Tsô mbautyav yem, a Na ken iyou, ka iyoujir je la, ve yila mbautyav cii, va kohol imôngo.

¹⁷ Ve haa Un riga u nyian dindee; shi ve tume tsar sha saa ve penda Un sha ityou.

¹⁸ Ve gba sughun Un er: Mba sughun We, tor u Mbayuda!

¹⁹ Ve gbidye Un aga sha ityou, ve haa Un azer, ve gure inya ve civir Un sha tar nahan.

²⁰ Mba nahan Un tar cii yô, ve er Un riga u nyian dindee la kera, ve hire ve haa Un akondo a Na. Tsô ve due a Na sha u za manden Un sha terankon.

²¹ Yô, orgen due ken ikôngo lu karen, iti na er Shimon u Shirene, ter u Alekesander man Rufu, ve kighir un er a̱ tôô terankon Na.

²² Ve va a na hen ijiir igen i i yer er Golgota la, inja na yô er, ijiir i gbôndotyou.

²³ Tsô ve na Un wain u i nongo mire sha mi yô, er A̱ ma, kpa A venda.

²⁴ Tsô ve mande Un sha terankon, ve tôô akondo a na ve kar, ve gba eren ishor sha a, sha u fan kwagh u hanma or nana tôô yô.

²⁵ Shighe u i mande Un la, lu ahwa ataankaranyiin atetan.

²⁶ I nger ityôikaa i ijirigh Na la er: Tor u Mbayuda.

²⁷ Shi ve mande mbanumungbenda uhar a na imôngo, u môm ken uwegh Nagh ku yanegh, u môm ken imese.

²⁸ Nahan icighanruamabera u a kaa er: I wa Un ken mbavendan atindi la, kure sha mi vough.

²⁹ Mba ve lu karen her yô, ve ôr akaa a dang sha a Na, ve gba jingir ityouv, kaan er: We u U hembe tempel, shi U maa un ayange atar ne,

³⁰ yima ase iyol You ga! Hungwa sha terankon!

³¹ Kape upristi mba tamen lu ôron ayol a ve, nahan Un tar, kua mbangeren kpaa, ve lu kaan er, A yima mbagenev, tsô A kera fatyô u yiman iyol Na ga.

³² De, Kristu, Tor u Iserael, A̱ hungwa sha terankon hegen, se̱ nenge, se̱ na jighjigh. Mba i mande ve sha terankon a Na imôngo la kpaa, ve lu nahan Un tar.

³³ Iyange i kom sha tembe yô, ime wa tser tar cii zan zan ahwa atar atetan.

³⁴ Tsô sha ahwa atar atetan la, Yesu yila sha imo i taver genger genger er: Eloi, Eloi, Lama Sabatani! Inja na yô, er: Aôndo Wam, Aôndo Wam, ka nyi U undumu?

³⁵ Mba ve tile her la, mbagenev ken a ve mba ongo nahan yô, ve kaa er: Ungwa, ngu yilan Eliya.

³⁶ U môm kura ayem, za wa kileyongo ken vineger, shindi sha aga u iyia, na Un er A̱ ma, kaa er: De tsô, se nenge nen shin Eliya una va hungwa Unou?

³⁷ Kpa Yesu yila sha imo i taver genger genger maa A sule.

³⁸ Tsô ikondo i yisan i ken tempel la pav hii sha je, mande shin inya.

³⁹ Tsô torutya u a tile her sha ishigh Nagh la, nengen er A sur nahan yô, a kaa er: Mimi je, Or ne lu Wan u Aôndo.

⁴⁰ Kasev mbagenev kpaa tile ken ica lu kenger; ken ve yô, lu Maria Magedalena man Maria ngô u Yakobu u kiriki kua Yose, man Salome kpaa.

⁴¹ Ka ve mba ve dondo Un, ve wasen Un zum u A lu ken Galilia la; man shi kasev mbagenev kpishi kpaa mba ve va a Na sha Yerusalem imôngo la, ve lu her.

⁴² Iyange i bee, tsô er i lu shighe u wan ago iyol yô, inja na yô, kper á lu iyange i memen

⁴³ Yosev u Arimatia, orjir u mimi, u wen iyol na kpaa lu keghen tartor u Aôndo la va hen Pilatu vangertiôr je, va sôn er, i̱ na un ikom i Yesu.

⁴⁴ Kpiligh Pilatu iyol er A kpe fefa yum nahan yô; a yila torutya la, a pine un, shin A kpe anshighe karou?

⁴⁵ Zough a imo hen torutya la yô, a na Yosev ikom la.

⁴⁶ Tsô a yam ikondo, hongo a Na yô, a cir Un i iyol, a ii Un ken uwar u i time ken vande; tsô a menger iwen a cir sha hunda u uwaregh la.

⁴⁷ Maria Magedalena man Maria ngô u Yosev, ve nenge ijiir i i ii Un her la.