Marku 12 - ICIGHAN BIBILO

¹ Tsô A hii u ôron kwagh a ve sha anzaakaa er: Orgen er sule u wain, kase u gar shi time ihungwa i shoghol wain ker, shi maa gôgôyou u taven sha sha u kuran u kpaa; tsô a gema u, a wa sha ikev i mbashiren sule sha tôndo, a yem tar ugen.

² Shighe kom yô, a tindi ortom hen mbashiren sule mbala er, a̱ za ngohol kwar u atam a wain hen ve.

³ Kpa ve kôr un, ve gbidye, ve na un gbenda aveve.

⁴ A shi A tindi ortom ugen her a ve. Ugen ne yô, ve gber un ivav sha ityou, ve hee un.

⁵ Tsô shi a tindi ugen; ngula yô, ve wua je. Shi mbagenev, kpishi kpaa; i gbidye mbagenev, i wua mbagenev.

⁶ Mase shin un môm, lu wan na u ishima ishima; a mase tindin un her a ve, a kaa er: Wan wam yô, vea wa un iko.

⁷ Kpa mbashirensule mbala, ve kaa ayol a ve er: Ngun ka u dyako je ne, se wua nen un, dyako a̱ hingir u wase.

⁸ Ve kôr un, ve wua ve gbihi hen ikpisule i wain la.

⁹ Nahan ter u sule la una er nana? Una va, una va tim mbashirensule mbala kera, una gema u, una na ior mbagenev.

¹⁰ Shin icighanruamabera ne, ne mba a ôr un gaa? er: Iwen i mbamaan venda i, ka i je, i hingir i sha zongo ye;

¹¹ ka Ter A er kwagh ne ye. Ka kwagh u kpilighyol sha ashe ase.

¹² Tsô ve gba keren ian i vea kôr Un, kpa ve lu cian ikpelaior, gadia ve kav er A ôr injakwagh la sha a ve yô. Maa ve undu Un ve yem.

¹³ Tsô ve tindi mbagenev ken Mbafarishi man Mbaherode her a Na sha u vea kôr Un a ikaazwa yô.

¹⁴ Mba ve yô, ve kaa a Na er: Ortesen, se fa U ngu Or u mimi, or môm môm kpaa U cie nan ashe ga; gadia U nengen sha mlu u or er nan lu la ga, kpa ka sha mimi je U tesen gbenda u Aôndo ye. Yô, u tan Shisar kpandegh ka sha mi shinii, ka sha mi ga? Se̱ na shinii, se̱ de ne ga?

¹⁵ Kpa A fa atseregh a ve la, nahan A kaa a ve er: Ka nyi ne karen Mo? Va nam nen sule, M nenge sha mi.

¹⁶ Tsô ve va a mi. A pine ve er: Ityough kin man kwaghngeren ne ka u ana? Ve kaa a Na er: Ka u Shisar je.

¹⁷ Nahan Yesu kaa a ve er: Yô, na nen Shisar akaa a a lu a Shisar yô, Aôndo di kpaa na nen Un akaa a a lu a Aôndo yô. Kpiligh ve iyol a Na kpishi.

¹⁸ Man shi Mbasadushi mba ve kaan er mnder u shin ku ngu ga la, ve va her a Na, ve va pine Un er:

¹⁹ Ortesen, Mose nger se er, aluer anngô u or una kpe, una undu kwase, kpa wan una lu ga yô, anngô u nan la a̱ tôô kwase la a̱ ver anngô na la tse.

²⁰ Yô, ior lu utaankaruhar; ve lu ngô môm; u hiihii la er kwase, kpe, ver tse ga.

²¹ U sha uhar la kpaa tôô un, shi kpe, ver tse ga; u sha utar la kpaa di nahan.

²² Zan zan ve utaankaruhar cii ve ver tse ga. Ken masejime la, kwase la iyol na kpaa kpe.

²³ Tsô sha mnder u vea nder shin ku la yô, kwase la una lu u an ken a ve? Gadia ve utaankaruhar cii ve er un.

²⁴ Yesu kaa a ve er: Kera ka er ne fe icighanruamabera man agee a Aôndo ga, ve ne tsum nahan ye gaa?

²⁵ Gadia zum u ka a nder shin mbakpenev yô, i kera er kwase ga, man shi i kera na kwase ken nom kpaa ga, kpa ka ve lu er mbatyomov mba Shaav nahan.

²⁶ Man sha kwagh u mbakpenev er á nder a ve yô, ne kera ôr ken takerada u Mose sha kwagh u ageva la, er Aôndo ôr a na, kaa er: Mo m ngu Aôndo u Aberaham man Aôndo u Isaka man Aôndo u Yakob kpaa, gaa?

²⁷ Un ka Aôndo u mbakpenev ga, kpa ka Aôndo u mbaumav je; ne tsume yum.

²⁸ Tsô ugen ken mbangeren va; ongo er ve lu sendegh kwaghôron ayol a ve man shi fa er Yesu kaa ve imo sha mi vough yô, a va pine Un er: Atindi cii, ka hanmô ker a lu u hiihii?

²⁹ Yesu kaa er: U hiihii yô, er: Ver ato Iserael, Ter Aôndo wase ka Ter tswen je,

³⁰ man shi Ter Aôndo wou A̱ doo u ishima sha ishima you cii, man sha uma wou cii, man sha mfe wou cii kua sha agee ou cii.

³¹ U sha uhar yô, er: Or u nan we ndor a we yô, nana̱ doo u ishima er we iyol you nahan. Tindi ugen u a hembe angan, ngu ga.

³² Nahan orngeren la kaa a Na er: Ka sha mi, Ortesen, U kaa vough er U kaa Wer, ngu môm tsô, ugen ngu ga, saa Un tseegh yô.

³³ Man shi A̱ doo or ishima sha ishima i nan cii man sha mkav u nan cii man sha agee a nan cii kpaa. Shi or u nan we ndor a nan kpaa, nana̱ doo nan ishima er iyol i nan nahan la, hemba nagh ku sôngon ica je.

³⁴ Er Yesu nenge er a rumun vough nahan yô, A kaa a na er: U ngu ica a tartor u Aôndo ga. Nahan ma or kera cihi u pinen Un kwagh ga.

³⁵ Zum u Yesu lu tesen ken tempel la, A gema A kaa er: Hii nan man mbangeren ve kaan er: Kristu ka Wan u Davidi?

³⁶ Gadia Davidi iyol na je kaa sha Icighan Jijingi er: Ter kaa a Terem er: Temam ken uwegh ku yanegh zan zan Me gema mbaihomov Ou ve̱ hingir We kwagh u pendan angahar sha mi.

³⁷ Davidi iyol na yilan Un er Ter, man er nan shi A lu Wan Naa? Nahan doo ikpelaior u ungwan Un.

³⁸ Ken ityesen na i A tesen yô, A kaa er: Kura nen ayol a en sha mbangeren, mba i doo ve u zenden a ugôgômbarigav man u ior ve̱ sughun ve sha ityembekasua,

³⁹ man shi mkônom ma injaam ma ken ushinagoge kua ajiir a teman a injaa ken uiniongo hemba doon ve ishima;

⁴⁰ mba yan uya mba kasev mba côgholov, man eren ugôgômbamsenev sha imanger, ka ve je á hemba nan ve ibo sha ijir ye.

⁴¹ Tsô Yesu za tema ken hemen u akwati u inyar. A nenge ikpelaior lu haan inyaregh ken akwati u inyar; mbanyarev mbagenev kpishi va haa inyaregh kpishi.

⁴² Tsô kwasecôghol u a lu icankwase va, va haa ideri ihiar, ka kobo je la.

⁴³ Nahan A yila mbahenen Nav her a Na, A kaa a ve er: Ka mimi je, M kaan ne ne, kwagh u kwasecôghol u a lu icankwase ne a hee ker ne a hembe kwagh u mbagenev ve lu haan ken akwati u inyar la cii.

⁴⁴ Gadia mban cii ka ken mngee u ve ngee a akaa man ve hee kimi ye, kpa wen yô, ka ken ibanave na a hee kimi ye, ka kwagh u a lu a mi sha u koson iyol na cii je la.