Marku 11 - ICIGHAN BIBILO

¹ Tsô mba va mgbôghom a Yerusalem hen Betefage man Betani hen uwo u Olev yô, A tindi mbahenen Nav uhar,

² A kaa a ve er: Za nen sha wangar u a lu ne sha hemen la; né za nyôron yô, fese je né zua a wanjaki u i zer un u mayange je or lu a henda un ga yô. Sagh, va nen a mi.

³ Man aluer or a pine ne er: Ka nyi ne eren nahana, yô, kaa nen ner: Kwagh gba Ter sha mi, Una shi Á hide a mi fese je.

⁴ Tsô ve za, ve za zua a wanjaki, i zer un hen hunda ken won sha gbenda, ve sagh un.

⁵ Mbagenev mba ve tile her la, pine ve er: Inja na nan ne saghen wanjaki?

⁶ Tsô ve kaa ve er Yesu kaa nahan; nahan ve de ve, ve yem.

⁷ Mba ve a wanjaki la hen Yesu yô, ve haa un akondo a ve sha ijime, A tema sha mi.

⁸ Ior kpishi samber akondo a ve sha gbenda, mbagenev haa ahu a ve kever ken ikôngo yô.

⁹ Tsô, mbazan sha hemen man mbadondon ken ijime kpaa, gba genger amo kaan er: Hosana! I̱ wuese Un u A ve ken iti i Ter.

¹⁰ I̱ wuese tartor u ter wase Davidi u u lu van la; Hosana sha Usha mba hemban gban ica la!

¹¹ Tsô Yesu nyôr ken Yerusalem kar za nyôr ken tempel; jingi sha akaa cii been yô, iyange kpaa i been yô, a due a mba pue kar uhar, A yem ken Betani.

¹² Kper nan, mba dugh ken Betani yô, ijen kôr Un.

¹³ Nengen a itinetur a ika sha mi yô, A za er, shin alaghga Una zua a atam sha miou? Ar heregh yô, A zua a ma ityamegh sha mi ga, saa ika tseegh; gadia lu shighe u tur umen ga.

¹⁴ A gema A kaa a na er: Mayange mayange ma or nana̱ de kera shi ye atam a ou ga. Yô, mbahenen Nav lu ungwan.

¹⁵ Tsô ve va ken Yerusalem. Yesu va nyer ken tempel yô, A gba zendan mbateenkwagh man mbayamenkwagh ken tempel kera, A mgbegha utebul mba mbamusaninyaregh man mkônom ma mbateenmkungum kera kpaa.

¹⁶ A kera rumun u ma or nana̱ nyôr a ma ikagh ken tempel ga.

¹⁷ A gba tesen kaan a ve er: I kera nger er: Á yila iyou Yam er iyou i msen sha ci u akuraior cii gaa? Kpa ne yô, ne gema a mi, hingir bar u mbanumunior.

¹⁸ Upristi mba tamen man mbangeren mba ongo nahan yô, ve gba keren gbenda u vea wua Un yô; gadia ve lu cian Un, sha ci u ikpelaior cii, lu kpiligh ve iyol sha ityesen Na.

¹⁹ Iyange va been yô, A due ken gar.

²⁰ Mba ngur karen pepe yô, ve nenge tur la uma, hii shin amise na je.

²¹ Peteru umbur yô, kaa a Na er: Ortesen, nenge tur u U we un ifan ne, a uma.

²² Yesu gema kaa a ve er: Na nen Aôndo jighjigh.

²³ Gadia mimi je, M kaan ne ne, hanma or u nana kaa a uwo ne er: Mough, za gba shin zegemnger man nana ta akpelan ken ishima ga, kpa nana na jighjigh er kwagh u nan kaa la una er yô, á er nan un.

²⁴ Ka nahan man M kaa ne Mer: Akaa a ne sôn sha msen u eren cii, na nen jighjigh ner, ne ngohol un ve, tsô né zua a mi.

²⁵ Man hanma shighe u nea tile u eren msen, man ma kwagh una vihi ne a orgen yô, de nen nan kwagh la, sha u Ter wen u A lu Sha la kpaa, A̱ de ne akaabo a en yô.

²⁶ Kpa aluer nea deen ga yô, Ter wen u A lu Sha la kpaa Una de ne akaabo a en ga.

²⁷ Tsô ve shi ve va hen Yerusalem, Ngur zenden ken tempel yô, upristi mba tamen man mbangeren kua mbatamen ve va her a Na,

²⁸ ve pine Un er: Ka sha tahav mbu nyi man U eren akaa ne?

²⁹ Yesu gema kaa a ve er: Mo kpaa Me pine ne kwagh môm tsô, kaam nen, yô, Mo kpaa Me kaa ne tahav mbu M eren akaa sha mi ne.

³⁰ Batisema u Yohane la yô, ka Sha a dugh shin ka hen ioro? Kaam nen ase!

³¹ Tsô ve gba henen ayol a ve er: Aluer sea kaa nahan ser, ka Sha yô, Una kaa er: Ka nyi ne na un jighjigh ga?

³² Man aluer sea kaa ser: Ka hen ior yô, nahan ve lu cian ikpelaior, gadia ve cii ve fa er Yohane lu profeti mimi je yô.

³³ Tsô ve gema ve kaa a Yesu er: Se fa ga. Yesu kpaa kaa a ve er: Mo kpaa Me kaa ne tahav mbu M eren akaa ne sha mi ga.