Luka 9 - ICIGHAN BIBILO

¹ Tsô A yila mba pue kar uhar, ve kohol imôngo, A na ve agee man tahav sha ujijingi mba bov cii, man u been angev kpaa.

² A tindi ve er ve̱ za ôr kwagh u tartor u Aôndo man ve̱ bee mba ve lu dedoo ga la angev kpaa.

³ A shi A kaa a ve er: De tee nen ma kwagh sha ci u gbenda ga, shin aga, shin ikpa, shin kwaghyan, shin inyaregh kpaa ga, man shi de luun nen a uriga uhar ga.

⁴ Hanma iyou i nea nyôr yô, tsaan nen her zan zan né kar moughon heregh.

⁵ Man shi ape nea za nyôr man a rumun ne her ga yô, zum u nea moughon hen gar la yô, kure nen ihundu i shin angahar a en heregh, i̱ hingir ve mpase.

⁶ Nahan ve due ve gba zenden nyôron angarev mba kiriki, ve lu ôron ior Loho u Dedoo, shi ve lu waren mbauangev kpaa.

⁷ Herode u tetera ungwa akaa a A er cii nahan lan un ishima cii sha ci u mbagenev kaan er, Yohane nder shin mbakpenev;

⁸ mbagenev yô, er, Eliya ande ve; mbagenev yô, er, ka mô gen ken uprofeti mba ngise nan nder ye.

⁹ Kpa Herode kaa er: Yohane yô, m gber un ityough; kpa Un u m ongo akaa a Na nahan ne ka anti? Nahan a gba nôngon u ma un nenge a Na.

¹⁰ Mbaapostoli mba za hir yô, ve ôr Un akaa a ve er cii. Tsô A ta ibalegh a ve A za a ve hen gar u i yer er Betesaida la hen ijiir i or lu ga yô.

¹¹ Kpa ikpelaior kaven yô, i dondo Un ijime; A rumun ve, A ôr ve kwagh u tartor u Aôndo; man mba kwagh a gbe u ma i ser ve angev yô, A war ve.

¹² Tsô er iyange sôôn u miren yô, mba pue kar uhar mbala va, va kaa a Na er: Na ikpelaior ne gbenda, ve̱ zua a kwaghyan, gadia hen ijiir i se lu ne ior mba her ga.

¹³ Kpa A kaa a ve er: Ne, na nen ve kwagh ve̱ ya. Ve kaa er: Kwagh u se lu a mi yô, kuma er ikpenbredi itian man ishu ihiar nahan tseegh, saa sé za sé za yam kwaghyan sha ci u ikpelaior ne cii.

¹⁴ Gadia nomsombaiorov lu er dubu utaan nahan. Kpa A kaa a mbahenen Nav er: Ver nen ve, ve̱ tema akum akum er akunduahargber, akunduahargber nahan.

¹⁵ Ve er di er A kaa nahan, ve ver ve, ve tema cii.

¹⁶ Tsô A tôô ubredi mba utaan man ishu ihiar la, A kende ashe sha, A sôn iveren sha mi, A coon, A na mbahenen Nav, ve za na ikpelaior.

¹⁷ Ve cii ve ya, kuma ve; i kura kwagh u a neer la, kuma akese pue kar ahar iv.

¹⁸ Er lu eren msen tswen nahan, mbahenen Nav lu a Na; tsô A pine ve er: Ikpelaior i kaan er, Mo M ngu ana?

¹⁹ Ve gema ve kaa er: Ka Yohane u eren batisema; mbagenev yô, er ka Eliya; shi mbagenev yô, er, ka u môm ken uprofeti mba ngise a nder ye.

²⁰ A kaa a ve er: Tsô ne yô, ne mba kaan ner: Mo, M ngu ana? Peteru gema kaa er: Ka Kristu u Aôndo.

²¹ Tsô A ta ve icin, A wa ve kwagh er ve̱ de ôron ma or môm kwagh ne ga.

²² A kaa er: Wan u or Una ya ican sha akaa kpishi keng, mbatamen man upristi mba tamen man mbangeren vea ta Un kera, á wua Un; sha iyange i sha utar la á nder Un.

²³ A kaa a ve cii er: Aluer anti or a sar nan pe van a Mo ityô yô, nana̱ nyiman iyol i nan, nana̱ tôô terankon u nan ayange ayange, nana̱ dondo sha a Mo.

²⁴ Gadia hanmô u i sar nan ka yiman uma u nan yô, una saa nan a saa; kpaa hanmô u uma u nan una saa sha ci Wam yô, nana yima Un a yima je.

²⁵ Gadia aluer or á zua a tar cii kpa uma u nan una gema á saa nan shin una gema á vihi nan yô, á doo nan sha nyi?

²⁶ Gadia anti or u nan cie ashe sha ci Wam kua akaaôron Am kpaa yô, Wan u or kpaa Una cia ashe a Ter Na sha ci u nan, zum u Una hide sha iengem Na man i Ter man i uicighanmbatyomov kpaa.

²⁷ Kpa M ngu kaan ne mimi je, mba ve til heen ne mbagenev ker ka mba vea bende a ku ga saa vea vande nengen tartor u Aôndo ve.

²⁸ Tsô shi ayange nga kar er anigheni nahan yô, A kua a Peteru man Yohane man Yakobu, A unde a ve sha uwo sha u za eren msen.

²⁹ Tsô ngur eren msen yô, mlu u ishigh Nagh gema, akondo a Na kpaa kungu, engem kpaa.

³⁰ Tsô nenge, ior ihiar lu ôron kwagh a Na, lu Mose vea Eliya;

³¹ ve ande sha iengem, ve ôr kwagh u ku u A sôôn u kpen ken Yerusalem la.

³² Tsô Peteru man mba ve lu a Na yô, ve lu meer mnyam; kpa mba nderen yô, ve nenge a iengem Na, kua ior ihiar mba ve tile a Na imôngo la.

³³ Tsô mba ngur undun Un yô, Peteru kaa a Yesu er: Tere, se mba heen, nahan doo; yô, sé er atumbe atar, i môm sha ci Wou, i môm sha ci u Mose, i môm di sha ci u Eliya; kpa a fa kwagh u a kaa la ga.

³⁴ Ngur ôron akaa ne nahan yô, ibeenegh sen, va gba mure sha a ve; cier ve iyol er mbala nyôr ken ibeen yô.

³⁵ Imo kpaa due ken ibeenegh kila, gba kaan er: Ngun ka Wan Wam u M tsough Un, ungwan nen Un.

³⁶ Imo la ngi ve yô, i mase shin Yesu tseegh. Ve cir zwa ve sha ayange la cii, ve ôr or môm môm ma kwagh u ken akaa a ve nenge la ga.

³⁷ Tsô kper nan mba hongo sha uwo yô, ikpelaior kpishi va kohol Un.

³⁸ Yô, orgen ken ikpelaior la genger imo gba kaan er: Ortesen m ngu zamber a We, nenge wan wam, gadia ngum môm tsô.

³⁹ Jijingi ugen ka a kôr un, nahan a ngor ikenge fese, a vihi un iyol caver caver zan zan a mbuwa hugh zwa, a vihi un iyol kpee, mayange a soo u deen un vough ga.

⁴⁰ M va zamber a mbahenen Ou mer, ve̱ dugh un, kpaa ve fatyô ga.

⁴¹ Yesu gema kaa er: Ne kov u lun a jighjigh u nan ga, u lun geseghee ne, mase shin ayange a me man Me tema a ven, Me wa ishima a vene? Va a wan wou heen.

⁴² Ngur van a va je tsô, jijingi la kende un inya, vihi un iyol caver caver. Kpa Yesu yange jijingi u hôngor la, gema war wanakiriki la, hire a mi, na ter na.

⁴³ Ve cii kpiligh ve iyol a tahav mbu vesen mbu Aôndo. Kpa er ve cii lu kpiligh ve iyol sha akaa a Yesu A er cii nahan, A kaa a mbahenen Nav er:

⁴⁴ De nen, akaaôron ne a̱ nyôr ne ken ato, gadia á na Wan u or sha ikev i ior.

⁴⁵ Kpa ve kav mkaanem man ga gadia lu ve myer sha u ve̱ de kaven ga; kpa ve lu cian u pinen Un sha mkaanem mara.

⁴⁶ Nahan ve sendegh anyiman er, shin ka an nan lu orvesenou?

⁴⁷ Kpa Yesu kaven akperan ken asema a ve nahan yô, A tôô wanye A ver hen ikooso,

⁴⁸ A kaa a ve er: Anti or u nana rumun wanye ne ken iti Yam yô, ka Mo je nan rumun ye, man shi anti or u nan rumun Mo yô, nan ngu rumun Un u A tindim la kpaa. Gadia ka or u nan hembe ndahar ken a ven la, ka nan nan lu orvesen ye.

⁴⁹ Yohane gema kaa er: Ortesen, se nenge orgen lu dughun ujijingi mba bov ken iti You, nahan se yange un sha ci u a lu dondon se ga yô.

⁵⁰ Kpa Yesu kaa a na er: De yangen nen un ga, gadia U nan lu ihom a ven ga yô, nan ngu nongo a ven je.

⁵¹ Tsô er ayange a á ngohol Un Sha la nga mgbôghom yô, A ver ishigh u zan Yerusalem jighilii,

⁵² A tindi mbatyomov sha hemen Na; tsô ve za ve za nyôr ken wangar u Mbasamaria sha u vea sôr Un ijiir yô.

⁵³ Kpa ve rumun Un keregh ga sha ci u A ver ishigh u yemen ken Yerusalem yô.

⁵⁴ Kpa er mbahenen Nav, Yakobu man Yohane, nenge nahan yô, ve kaa er: Tere, ka U ka se̱ kaa, usu u̱ sen sha aôndo u̱ hia ve kera?

⁵⁵ Kpa A gema ashe, A yange ve A kaa a ve er: Ne fa inja i jijingi i ne lu la ga; gadia Wan u or va sha u timin uuma mba ior ga, kpa ka u yiman ve a yima.

⁵⁶ Tsô ve yem wangar ugen.

⁵⁷ Tsô mba ngur yemen sha gbenda yô, orgen kaa a Na er: Wea za han han kpaa, me zaan a We heregh je!

⁵⁸ Kpa Yesu kaa a na er: Atsôngo nga a ijô, inyon i sha kpaa ngi a aya; kpa Wan u or yô, ngu ape suur ityough ga.

⁵⁹ A shi A kaa a ugen er: Dondo sha a Mo. Kpa ngula kaa er: Tere, nam ian m̱ za m̱ za ii terem ve.

⁶⁰ Kpa A kaa a na er: De, mbakpenev ve̱ ii mbakpenev vev; kpa we yô, yem, za yôô tartor u Aôndo.

⁶¹ Shi ugen kaa er: Me dondo sha a We Tere, kpa nam ian m̱ za m̱ za lôhô mba hen ya wam ayem ve.

⁶² Kpa Yesu kaa a na er: Anti or u nana kôr ave a nan sha ikyekye i kahan sule, man nana geman ashe ken ijime yô, nan kuma tartor u Aôndo ga.