Luka 5 - ICIGHAN BIBILO

¹ Tsô er ikpelaior lu imbishi Un, lu ungwan kwaghôron u Aôndo yô, a tile shin kpe u ber u Genesareti.

² Tsô A nenge utso uhar lu hen kpe u ber, kpa mbakôronishu vande duen kera, lu nzuan ukper.

³ Ken utso mbala Un nyôr ken u môm u lu u Shimon la, man A kaa a na er a̱ hide a tsô ijime a̱ undu kpetar kpeghee; tsô A tema ken tso, A gba tesen ikpelaior.

⁴ Kur kwaghôron yô, A kaa a Shimon er: Kporom hen ijiir i i ze yô, za haa ukper enev sha u kôron ishu.

⁵ Kpa Shimon gema kaa er: Tere, se tsa keren kaka sha ican, kpa se zua a ma kwagh ga; kpa sha imo You yô, me haa ukper.

⁶ Mba eren nahan yô, ve kôr ikpelaishu i vesen je, ukper vev gba anden.

⁷ Ve gba welegh mbaerentom a ve imôngo ken tso ugen la er ve̱ va, ve̱ va wase ve. Tsô ve va, ve va iv utso mba uhar mbala je, gba nôngon u urun.

⁸ Er Shimon Peteru nenge nahan yô, a gure Yesu hen anu, a kaa er: Due hen mo kera, Tere, gadia mo m ngu or u isholibo je.

⁹ Gadia cier un iyol kua mba ve lu a na cii sha mker u ishu u ve kôr la.

¹⁰ Kape Yakobu man Yohane, ônov mba Sebedeu, mba ve lu mbawasen Shimon la kpaa i cier ve iyol la. Tsô Yesu kaa a Shimon er: De cie ga, hii nyian je zan zan ken hemen kpaa ú mase kôron ior.

¹¹ Mba dugh a utso sha tar yô, ve undu akaa cii, ve dondo sha a Na.

¹² Tsô er A lu ken wangar ugen yô, nenge, orgen lu a imande iyol yoholoo; nengen a Yesu yô, a gure, a kuma ityough inya, a gba zamber a Na, kaan er: Tere, a lu ishima You yô, U fatyô u wanger mo.

¹³ Tsô A naregh uwegh, A bende un iyol, A kaa er: M rumun, i̱ wanger we! Fese nahan imande maa bee un.

¹⁴ Tsô A ta un icin er a̱ de ôron ma or kwagh ga; A kaa er: Gba yemen tsô, za tese pristi iyol you, shi na nagh sha ci u mwanger u i wanger we er Mose lu kaa nahan, sha u i̱ lu mpase hen a ve yô.

¹⁵ Kpa gwa Na hemba seer samber a samber; ikpelaior kpishi kohol sha u ungwan Un man shi u A̱ war ve sha uange.

¹⁶ Kpa A undu ior A yem ken taaikôngo, A gba za eren msen.

¹⁷ Tsô iyange igen er A lu tesen ior yô, Mbafarishi mbagenev man mbatesen atindi mba ve due ken angarev mba ken Galilia man Yudia cii man ken Yerusalem kpaa, ve tema heregh; agee a Ter lu a Na sha u been ve angev.

¹⁸ Tsô ior mbagenev tôô or u kpen alegh sha gambe, ve lu nôngon u vea nyôr a na, vea va ver Un sha ishi.

¹⁹ Man mba zough a ian ga, sha ci u ikpelaior yô, ve unde sha tor iyoughough, ve sen a na sha gambe hen ian i ikpande i sha tor u iyou la, a sen her atô hen ikum i Yesu.

²⁰ Nengen jighjigh ve u nan yô, A kaa er: We or ne, i de u asorabo ou.

²¹ Tsô mbangeren man Mbafarishi gba henen, kaan er: Or u nan er kwagh u ityuhwan ne ka anti? Ka an nana fatyô u den or asorabo, saa Aôndo tseegh gaa?

²² Kpa er Yesu kav mbamhen vev yô, A gema A pine ve er: Ka nyi ne hen ken asema a ene?

²³ Ka nyi i hembe lun uwer ga, u ma i kaa er: I de u asorabo a ou, shin u ma i kaa er: Mough sha, zende ase?

²⁴ Kpa sha u né fa er Wan u or A lu a tahav shin tar ne u den or asorabo yô, nahan A kaa a or u kpen alegh la er: M ngu kaan a we: Mough sha, tôô gambe wou, yem ken ya wou.

²⁵ Fese nahan a mough sha ishiv vev je, a tôô ikagh nagh ki yaven a mi la, a yem hen ya na, a gba wuese Aôndo.

²⁶ Kondo ve iyol cii, ve gba wuese Aôndo; mciem kpaa gba ve iyol, ve gba kaan er: Se nenge akaa a kpilighyol nyian.

²⁷ Ken masejime u akaa la, A due, tsô A nenge a orngoholkpandegh ugen, iti na er Levi, a tema ken iyou i ngohol kpandegh A kaa a na er: Dondo sha a Mo.

²⁸ Un kpaa a undu akaa cii, a mough, a dondo sha a Na.

²⁹ Levi er Un zegeiniongo ken ya na; ikpelaior kpishi i mbangoholkpandegh man shi mbagenev kpaa ve tema ve lu yan kwagh a ve imôngo.

³⁰ Kpa Mbafarishi man mbangeren vev gba ahon a mbahenen Nav, ve kaa er: Inja na nan ne ye kwagh shi ne me kwagh a mbangoholkpandegh kua mbaasorabo imôngo?

³¹ Yesu gema kaa a ve er: Ka mbadedoo kwagh a gbe ve a ortwer ga, saa mba angev mbu ker ve la tseegh.

³² Mo M va sha u Me yila mbaperapera ga, kpa ka mbaasorabo, sha u ve̱ gema asema yô.

³³ Ve kaa a Na er: Mbahenen mba Yohane mba her kwaghyan acin imôngo, mba eren msen kpaa; mbahenen mba Mbafarishi kpaa mba eren nahan, kpa mba Ou yô, mba ye kwagh heregh, mba me kwagh heregh kpaa.

³⁴ Kpa Yesu gema kaa a ve er: Ne fatyô u kighir mba ken ya u orkwasehe er ve̱ hôr kwaghyan je er orkwasehe a lu a ve la kpa?

³⁵ Kpa ayange nga van a á tôô ve orkwasehe kera, ka hen ayange la je man vea hôr kwaghyan ye.

³⁶ A shi A ôr ve injakwagh er: Ma or nana tôndo bamberikondo ken ikondo i he nana gema a cinge ikondo i tse a mi ga; gadia nahan nana ande i he la je, man shi bamber u he la kpaa una zua sha i tse la ga.

³⁷ Man shi ma or nan hee zar u wain u he ken akpaakôvough a tse ga; gadia á er nahan yô, zar u wain u he ua pav akpa la, ua haa inya akpa la kpaa aa saa ishe.

³⁸ Kpa mba hee zar u wain u he ken akpa a he.

³⁹ Man shi ma or u nan vande man zar u wain u tse yô, u he ua kera sar nan ga; gadia nana kaa er: U tse la doo yum.