Luka 4 - ICIGHAN BIBILO

¹ Yesu kpaa, iv a Icighan Jijingi, A mough hen Yordan, A hide; tsô Icighan Jijingi yem a Na ken taaikôngo,

² tsa keregh ayange akunduahar, diabolo lu meen Un; sha ayange la cii ya kwagh ga. Ayange la nga kar kera yô, ijen kôr Un.

³ Tsô diabolo kaa a Na er: Aluer Wea lu Wan u Aôndo je yô, kaa iwen ne i̱ hingir bredi.

⁴ Kpa Yesu gema kaa a na er: I nger er: Ka sha bredi tseegh or á lu uma ga.

⁵ Shi a yem a Na sha ijiir i taven sha a tese Un ityartor i sha won cii fese.

⁶ Tsô diabolo kaa a Na er: Me na U tahav mbun cii kua icivir i mbu kpaa gadia i nam mbu sha ikev; ka m na hanma or u i lum pe nan nan yô.

⁷ Aluer Wea gure inya Wea civir mo yô, á hingir kwagh Wou cii.

⁸ Kpa Yesu gema kaa a na er: I nger er: Civir Ter Aôndo wou, ka Un tseegh er Un tom ye.

⁹ Tsô a yem a Na ken Yerusalem a za ver Un sha ityough ki tempel, a kaa a Na er: Aluer Wea lu Wan u Aôndo je yô, henpe U til ne, gba ase iyol You shin inya,

¹⁰ gadia i nger er: Una wa mbatyomov Nav kwagh sha a We, ve̱ kura U dedoo,

¹¹ man shi: Vea kôr U sha ave ve sha u U̱ de te nguhar sha iwen ga yô.

¹² Kpa Yesu gema kaa a na er: I kaa er: De karen Ter, Aôndo wou, ga.

¹³ Zum u diabolo bee ameen cii yô, a mough hen a Na kera er saa shighe ugen.

¹⁴ Nahan Yesu hire hen Galilia ken agee a Jijingi, man gwa Na samber ken iningirtar la cii.

¹⁵ A lu tesen ken ushinagoge vev man ior cii lu wuese Un.

¹⁶ Tsô A va ken Nasareti henpe i yese Un la. A nyôr ken shinagoge sha ieren Na sha iyange i memen; A mough A tile sha sha u Una ôr Icighanruamabera.

¹⁷ Mba ne Un Ruamabera u profeti Yesaia yô, A bugh, A zua a ijiir i i nger er:

¹⁸ Jijingi u Ter ngu sha a Mo, sha ci u A shighem mkurem, A tindim er M̱ yôô Loho u Dedoo hen mbaatsanev,

¹⁹ M̱ yôô, i̱ pase mbakwarev, i̱ tuhwa, i̱ bugh mbaapirashe ashe, man M̱ pase mba i nzughul a ve ve gbe caver yô, M̱ tuhwa, shi M̱ yôô inyom i erdoo u Ter.

²⁰ Tsô A hure Ruamabera, A gema A na ortom la, A hire A tema inya. Mba ken shinagoge cii ve haa ashe sha a Na.

²¹ A gba kaan a ve er: Nyian i kure icighanruamabera ne ken ato a en ve.

²² Tsô ve cii ve wuese Un, gba kpiligh ve iyol sha akaaôron a dedoo a a dugh ken zwa Na yô, ve kaa er: Shin ka Wan u Yosev ne ga ase?

²³ A gema A kaa a ve er: Né kaam injakwagh ne kpee er: We Ortwer, sôr ase iyol You, hanma kwagh u se ongo i er ken Kapernahum la yô, shi er ken gar Wou nahan kpaa.

²⁴ Tsô A kaa er: Mimi je, M kaan ne ne, mba wuese ma profeti ken gar na ga.

²⁵ Kpa mimi je M kaan ne ne, sha ayange a Eliya la kasev mba côgholov lu ken Iserael kpishi, zum u ura kera nôô ga anyom atar man iwer ataratar, man zegejen gba sha won cii la.

²⁶ Kpa i tindi Eliya hen ma kwase hen ve ga saa hen Sarefati ken tar u Shidon, hen kwase ugen u a lu kwasecôghol yô.

²⁷ Sha ayange a profeti Elisha kpaa, mbaamandev lu ken Iserael kpishi, kpa i wanger mô ve môm ga, saa Naaman or u Shiria la tseegh.

²⁸ Mba ken shinagoge la cii, asema nyoon ve tsung er ve ungwa akaa ne yô.

²⁹ Nahan ve mough, ve zenda Un, ve due a Na ken akôngo a gar, ve za a Na zan zan sha kurigôr u uwoogh henpe i maa gar ve la, sha u vea gbihi Un shin ijem yô.

³⁰ Kpa A kar hen atô ve kera, A yem a Nagh.

³¹ Tsô A va shin Kapernahum, gar u Galilia ugen, lu tesen ve sha ayange a memen.

³² Kpiligh ve iyol a ityesen Na, gadia kwaghôron Na lu sha utaha.

³³ Ken shinagoge la orgen lu, lu a jijingi u bo u hôngorough, a genger imo taver taver er:

³⁴ Ka nyi i zough se a We, We Yesu, Ornasareti? U va sha u va timin see? M fa U doo doo, U ngu Icighan u Aôndo je.

³⁵ Kpa Yesu yange un, kaa er: Huan, due ken a na kera! Er jijingi u bo la kende un inya her atô ve yô, maa a due ken a na, kpa a vihi un iyol mape ga.

³⁶ Nahan cier ve iyol ve gba ôron kwagh ayol a ve kaan er: Ka nyi injakwaghôron ne? Gadia ka sha utaha man sha agee A yange ujijingi mba hôngorough man ve dugh ye.

³⁷ Gwa Na samber ken hanma ijiir ken iningirtar la cii.

³⁸ Tsô A mough ken shinagoge a za nyôr ken ya u Shimon. Yô, angev mbu iyolhian kôr ngôkem u Shimon kpishi; nahan ve zamber a Na sha ci na.

³⁹ Tsô A va tile A ngurum her a na, A yange angev mbu iyolhian la maa mbu de un; fese nahan a mough, a gba gilim sha sha ci ve.

⁴⁰ Iyange ngur milen yô, ior cii mba ve lu mba i kpe ve iyol ga mba angev atô kposo kposo er ve yô, ve va a mi her a Na. A penda ave sha hanmô ve, A war ve.

⁴¹ Ujijingi mba bov kpaa due ken ior kpishi, ve lu genger imo, kaan er: U ngu Wan u Aôndo je! A yange ve, A rumun ve u ve̱ ôr kwagh ga, gadia ve fa er A lu Kristu je yô.

⁴² Sev mbu av yô, A due A yem hen ijiir igen her ape or lu ga yô; ikpelaior ker Un; mba ar her a Na yô, lu ve pe timbir Un, sha u A̱ de undun ve ga yô.

⁴³ Kpa A kaa a ve er: Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.

⁴⁴ Tsô A gba ôron kwaghaôndo ken ushinagoge mba ken Galilia.