Luka 24 - ICIGHAN BIBILO

¹ Kpaa sha iyange i Lahadi ken lahadi la, ve va hen uwar la pepe dindee a icimbiv mbi ve sôr la.

² Ve nenge er i vande menger iwen sha uwar la kera ve.

³ Tsô ve nyôr, kpa ve zua a ikom i Ter Yesu ga.

⁴ Tsô ka ngur nzughul ve yô, ior uhar tile a ve a akondo a engem.

⁵ Cier ve iyol ve kuma ishiv inya, tsô mbala kaa a ve er: Ka nyi ne keren or u uma hen mbakpeneve?

⁶ Ngu heen ga, A nder. Umbur nen kwagh u lu ôr ne zum u A lu ken Galilia la,

⁷ er: Ka u á na Wan u or sha ikev i mbaasorabo keng, á mande Un sha terankon kpaa, sha iyange i sha utar la Una nder.

⁸ Nahan ve gba umbur akaaôron a Na la.

⁹ Tsô ve mough ken uwar la ve hide, ve va ôr akaa la cii hen mba pue kar môm mbala kua mbagenev cii.

¹⁰ Ve yô, lu Maria Magedalena man Yoana man Maria ngô u Yakobu, kua kasev mbagenev mba ve lu a ve imôngo la, ve ôr mbaapostoli akaa la.

¹¹ Akaaôron a ve la lu ve ken ato dang, ve na ve jighjigh ga.

¹² Kpa Peteru mough, gba zan hen uwar ayem, za ngurum gbirin ashe yô, a nenge a akondo la tseegh lu her ijiir i môm; tsô a mough a yem, gba kpiligh un iyol sha kwagh u a er la.

¹³ Sha iyange la je mbauhar ken ve, ve lu zan zende ken wangar ugen u i yilan er Emou; ica na a Yerusalem kuma umail anigheni.

¹⁴ Ve lu ôron kwagh ayol a ve sha akaa a a er la cii.

¹⁵ Tsô mba ngur ôron kwagh timen sha mi ayol a ve nahan yô, Yesu iyol Na va mgbôghom a ve, gba zan a ve imôngo.

¹⁶ Kpa ime wa ve ashe sha u vea kav Un ga yô.

¹⁷ A kaa a ve er: Ka nyi akaa ne lu ôron ayol a en ne yemene? Ve tile, ve gema ashe zuu.

¹⁸ U môm ken ve, u i yilan er Keleopa la, gema kaa a Na er: Ka We tseegh U lu orvannya ken Yerusalem, U fe akaa a a er her sha ayange ne ga yee?

¹⁹ A kaa a ve er: Ka nyi akaa? Ve kaa a Na er: Ka kwagh u Yesu, Or u Nasareti, u A lu profeti u lun a agee ken tom man kwaghôron sha ishigh ki Aôndo kua ior cii.

²⁰ Man upristi mba tamen kua mbavesen ve na Un ken ijir i kuugh ve mande Un sha terankon kpaa.

²¹ Man se lu veren ishima ser, ka Wen je Una paa Mbaiserael ye. Nahan er akaa ne a er yô, nyian ka iyange i sha utar je ne.

²² Man shi kasev mbagenev ken vese va ôr se kwagh u kpiligh iyol; er ve ze shin uwar nyian pepe yô,

²³ ve zua a ikom Na ga, ve va kaa se er ve nenge mbatyomov mba Shaav; mbala kaa er: Wen ngu uma.

²⁴ Mbagenev mba ve lu a vese imôngo kpaa, ve za hen uwar la, ve za nenge ka di er kasev mbala kaa se nahan; kpa Un yô, ve nenge a Na ga.

²⁵ Tsô A kaa a ve er: Ne mbakavenkwagh ga, mba ne timbir u nan akaa a uprofeti ve kaa la cii jighjigh ne.

²⁶ Kera lu u Kristu Una ya atsan ne cii keng, man Una nyôr ken icivir Na ye gaa?

²⁷ Hii sha Mose kua uprofeti cii, A gba pasen ve akaa a sha iyol Na ken Icighanruamabera cii.

²⁸ Tsô mba za mgbôghom hen wangar u ve lu zan la yô, A er er Una kar Una za ken hemen nahan.

²⁹ Kpa ve zamber a Na, ve kaa er: Tsa a vese heen, gadia iyange i mgbôghom u been, i sôôn miren. Tsô A nyôr sha u za tsan a ve.

³⁰ Tsô tem kwaghyan a ve yô, A tôô bredi, A sôn iveren i dedoo sha mi, A coon, A na ve.

³¹ Wanger ve ashe, ve kav Un; maa A ndiir ve ashe.

³² Tsô ve kaa ayol a ve er: Asema lu yeghen se a yegh zum u A lu ôron kwagh a vese sha gbenda, pasen se icighanruamabera la gaa?

³³ Ve mough hen shighe la je, ve hire ken Yerusalem, ve va kohol mba pue kar môm mbala ve kohol ijiir i môm, kua mba ve lu a ve cii.

³⁴ Ve lu kaan er: Mimi je Ter nder; A ande hen Shimon!

³⁵ Tsô ve ôr akaa a a er sha gbenda la man er ve kav Un sha mcoon u bredi yô.

³⁶ Tsô mba ngur ôron akaa ne nahan yô, Un iyol Na va tile ve her atô.

³⁷ Kpa ve cia sulugha, cier ve iyol kpishi, lu ve er ka jijingi ve nenge a mi yô.

³⁸ Kpa A kaa a ve er: Ka nyi ishima i te ne kwe nahana? Man shi ka nyi akpelanakaa a lu ne ken ishima nahana?

³⁹ Nenge nen ave Am man angahar Am, ka Mo iyol Yam je; bendem nen ave, nenge nen; gadia jijingi ngu a inyam man ikuhe er ne nengen Mo a min ne ga. [

⁴⁰ Kaan nahan yô, A tese ve ave Na man angahar a Na kpaa.]

⁴¹ Er ve lu a na jighjigh ga sha ci u iember, man i kpiligh ve iyol her yô, A kaa a ve er: Ne shi ne mba a ma kwagh u yan heen kpa?

⁴² Ve na Un tiônishu u anen.

⁴³ A tôô un A ya sha ishigh vegh.

⁴⁴ A kaa a ve er: Angan ka akaaôron Am a M ôr ne je er M lu a ven imôngo la, Mer, ka u akaa a i nger sha a Mo ken atindiakaa a Mose man uprofeti man upasalmi á kure sha mi vough keng.

⁴⁵ Tsô A bugh ve ishima sha u kaven icighanruamabera;

⁴⁶ man A kaa a ve er: Kape i nger je la er: Kristu Una ya ican Una shi Á nder shin mbakpenev sha iyange i sha u tar la;

⁴⁷ man shi ka ken iti Na man á ôr kwagh u mgemshima man mde u asorabo ken akuraior cii á hii ken Yerusalem je.

⁴⁸ Ne mba mbashiada sha akaa ne.

⁴⁹ Man nenge, M ngu tindin ityendezwa i Terem sha a ven; kpa hira lu nen ken gar zan zan i̱ haa ne agee a Sha.

⁵⁰ A due A yem a ve ken won zan zan ikua ikua a Betani, A kende ave Na sha, A ver ve doo doo.

⁵¹ Er lu veren ve a ver tsô A pav a ve, i yem a Na sha.

⁵² Ve gba hiden ken Yerusalem a iember kpishi,

⁵³ ve lu ken tempel gbem, ve lu wuese Aôndo.