Luka 23 - ICIGHAN BIBILO

¹ Ikpelaior la cii mough, za a Na hen Pilatu.

² Ve gba sendegh Un er: Or ne yô, se kohol Un tsughun nongo wase, yangen er i̱ de te Shisar kpandegh ga, kaan er, Wen iyol Na Un ngu Kristu tor je.

³ Pilatu pine Un er: We, U ngu tor u Mbayuda? A gema A kaa a na er: U kaa tsô.

⁴ Pilatu kaa a upristi mba tamen man ikpelaior er: M zua or ne a ibo ga.

⁵ Kpa ve hemba a hemba ôron kaan er: Ngu vihin ikpelaior sha ityesen Na ken Yudia cii, hii ken Galilia je zan zan va ar hen ijiir ne.

⁶ Tsô er Pilatu ungwa nahan yô, a pine er, shin ka or u Galiliaou?

⁷ Fe er A lu ken tiôn u Herode a lu a tahav sha mi la yô, a na Un, i̱ za a Na hen Herode, u a gema a lu ken Yerusalem her ayange la yô.

⁸ Er Herode nenge a Yesu yô, doo un tsung, gadia lu un pe nengen a Na ica i gba je, sha ci u lu ungwan kwagh Na yô; man lu veren ishima sha u nengen ma ivande i Una er yô.

⁹ A pine Un akaa kpishi; kpa A bugh un zwa sha ma kwagh môm ga.

¹⁰ Tsô upristi mba tamen man mbangeren tile, gba norom wan Un akaa iyol tsung.

¹¹ Herode a mbautyav nav laha Un, naha Un tar; a haa Un riga u engem, a tindi er, i̱ hide a Na hen Pilatu.

¹² Sha iyange la je Herode man Pilatu hime iyongo ve, gadia ngise ve lu ihom ayol a ve.

¹³ Tsô Pilatu yila upristi mba tamen man mbavesen man ikpelaior kohol her a na,

¹⁴ a kaa a ve er: Ne va a or ne her a mo ner, ka or u vihin ior; man nenge, m time kwagh Na sha ishigh yenegh, kpa m zua a ibo hen Or ne sha akaa a ne yer Un ijir sha mi ne ga,

¹⁵ Herode kpaa nahan; gadia a hire se a Na man nenge, A er ma kwagh man i lu wuan un ga.

¹⁶ Yô, me tsaha Un, tsô me pase;

¹⁷ gadia lu u una dugh ve orkwar môm sha shighe u iniongo keng.

¹⁸ Kpa ve cii ve genger imo zwa môm er: Yem a or ne kera, pase se Baraba;

¹⁹ lu or u a na i hii num ken gar a wua or kpaa, man i wa un ken gaadi ye.

²⁰ Pilatu shi seer ôron kwagh a ve, lu wan ken ishima er una pase Yesu.

²¹ Kpa ve genger imo er: I̱ mande Un sha terankon, i̱ mande Un sha terankon.

²² A shi a ôr a ve kuma acin atar er: Ka nyi kwaghbo Or ne a ere? M zua a ma ityôkwagh sha u á wua Un ga; nahan me gbidye Un, tsô me pase.

²³ Kpa ve gba taver imo a ishima i môm genger genger er, i̱ mande Un sha terankon; maa amo ve zever cii.

²⁴ Tsô Pilatu kure kwagh la er, i̱ lu er ve kaan keng keng la.

²⁵ Kpa wen u i gbihi ken gaadi sha ci u num man iwooor, u ve kaan er a̱ pase un la yô, a gema a pase; kpa Yesu yô, a gema Un a na er i hange ve la.

²⁶ Mba ngur yemen a Na yô, ve kôr Shimon, or u ken Shirene, lu za hiden ken ikôngo, ve na un terankon er a̱ tôô, a̱ dondo sha Yesu.

²⁷ Ikpelaior kpishi dondo Un, kua shi kasev mba ve lu vaan, zungwen Un kpaa.

²⁸ Kpa Yesu gema ashe hen ve, kaa er: Ne ônkasev mba Yerusalem, de kera vaan nen sha ci Wam ga, kpa vaa nen sha ci wen ayol a en man sha ci u ônov enev kpaa.

²⁹ Gadia nenge, ayange nga van a á kaa er: Saan kasev mba ikômov iyol, man iyav mbu mbu lu a mar mayange ga, man atumba a i lu a ambe a mayange ga yô.

³⁰ Sha ayange la vea gba kaan a iwo er: Kighir nen se! Man a agungu kpaa er: Cir nen se!

³¹ Gadia vea eren akaa ngan sha kon u ndor yô, u ombor je yô, á er a u nana?

³² I shi i va a mbagenev ior ihiar, lu mbaaferev, sha u á za wua ve a Na imôngo yô.

³³ Mba za nôôr hen ijiir i i yer er Igbôndotyou la yô, ve mande Un sha terankon her, man mbaaferev mbala kpaa, u môm ken uwegh ku yanegh, u môm ken imese.

³⁴ Tsô Yesu kaa er: Tere, de ve, gadia ve fa kwagh u ve lu eren ne ga. Man shi ve kar akondo a Na sha ishor i eren kpaa.

³⁵ Ior tile, lu kenger. Mbavesen kpaa gba nahan Un tar, kaan er: A yima mbagenev, yô, aluer Una lu Kristu, icuwan u Aôndo je yô, de, A̱ yima ase iyol Na!

³⁶ Mbautyav kpaa gba nahan Un tar, van her a Na, nan Un vineger,

³⁷ kaan er: Aluer Wea lu tor u Mbayuda je yô, yima ase iyol You!

³⁸ Kwaghngeren kpaa lu sha henpe ityough Nagh lu la, er: Ngun ka tor u Mbayuda je.

³⁹ U môm ken mbaaferev mba i mande ve la, gba nahan Un tar, a kaa er: U ngu Kristu je gaa? Yima ase iyol You kua se kpaa.

⁴⁰ Kpa ugen la gema zôhô a na, kaa er: Aôndo je kpaa u shi cie ga, er ijir you i lu i môm a Na yôô?

⁴¹ I yase ne yô, ka sha mi je, gadia se ngohol injar kuma sha akaa a se er vough, kpa Or ne yô, A er ma kwagh u lun kpe ga.

⁴² Tsô a kaa er: Yesu, umbur mo zum u Wea nyôr sha tartor Wou yô.

⁴³ A kaa a na er: Mimi je M kaan we ne, nyian je ú lu a Mo imôngo ken Paradiso.

⁴⁴ Tsô ka kom er iyange sha tembe nahan yô, ime wa tser tar cii zan zan ahwa atar atetan;

⁴⁵ i pir iyange; ikondo i yisan i ken tempel la pav her atô.

⁴⁶ Yesu kpaa yila sha imo i taver genger genger er: Tere, M na jijingi Wam sha ikev You. Kaan nahan yô, maa A sule.

⁴⁷ Tsô er torutya la nenge kwagh u a er la yô, a gba civir Aôndo, kaan er Or ne lu Or u mimi keng je.

⁴⁸ Man shi ikpelaior cii i i kohol sha u nengen kwagh la, mba nengen akaa a a er la yô, ve hire, ve gba tan ave vanger.

⁴⁹ Man mba ve fa Un cii kua kasev mba ve due a Na imôngo ken Galilia la, ve tile ken ica, ve lu nengen akaa la.

⁵⁰ Tsô nenge, orgen iti na er Yosev, lu orjir, lu or u injaa man shi u perapera kpaa,

⁵¹ un lu a ve ityô sha mhen ve man ier ve la kpaa ga; lu or u ken Arimatia, gar u Mbayuda ugen, wen kpaa lu keghen tartor u Aôndo.

⁵² Un za hen Pilatu, a za sôn ikom i Yesu.

⁵³ A hungwa a i, a cir i ikondo, a ii ken uwar u i time ken vande u mayange i lu a ii or kimi ga yô.

⁵⁴ Lu iyange i sôron Paseka, iyange i memen mgbôghom.

⁵⁵ Kasev mba ve due ken Galilia a Na imôngo la kpaa ve dondo ve, ve za nenge uwar man er i ver ikom Na kpaa.

⁵⁶ Mba hir yô, ve sôr icimbiv man mkurem ma shighen. Tsô ve mem sha iyange i memen sha tindi.