Luka 19 - ICIGHAN BIBILO

¹ Tsô A nyôr ken Yeriko, lu karen.

² Orgen, i yilan un er Sakiu, lu orngoholkpandegh, lu ornyar;

³ hange un ka ma un nenge a Yesu er A lu yô, kpa a fatyô ga sha ci u ikpelaior, gadia un lu icinor.

⁴ Tsô a kar sha hemen ayem, a za unde sha kon u tur sha u una nenge a na, gadia lu gbenda u Una kar je la.

⁵ Er Yesu va ar heregh yô, A kenger sha, A kaa a na er: Sakiu, hungwa fefa, gadia nyian Me shi ken ya wou keng.

⁶ Wen kpaa a hungwa fefa a nyôr a Na saan saan.

⁷ Mba nengen nahan yô, ve cii ve gba unun kaan er: A nyôr hen ya u or u asorabo sha u Una shi a na.

⁸ Tsô Sakiu mough, tile sha, kaa a Ter er: Tere, nenge, veghernyar wam m ngu nan mbaatsanev; aluer m ngohol ma or kwagh sha icugh yô, me shi me hide nan a mi kwa nyiin.

⁹ Yesu kaa a na er: Nyian myom va hen ya ne ve, sha ci u wen kpaa a lu wan u Aberaham je yô.

¹⁰ Gadia Wan u or va sha u keren man u yiman kwagh u a saa yô.

¹¹ Tsô mba ongo akaa ne yô, shi ka seer Na u ôron ve injakwagh igen la, sha ci u A mgbôghom a Yerusalem, man lu ve er tartor u Aôndo ua ande ken igbar fese je.

¹² A kaa er: Oricivirigh yem ken tar u icaa sha u una za ya tor, man una hide ye.

¹³ Tsô a yila mbatomov nav pue, a na ve pam pue, a kaa a ve er: Cinge nen sha kasua u eren zan zan me kar hiren.

¹⁴ Kpa ior mba hen tar na la venda un, ve tindi mbatyomov ken ijime na er: Ka se ka or ne a̱ lu tor sha a vese ga.

¹⁵ Tsô za zough a tor la kera, hir yô, a kaa, i̱ va un a mbatomov mba lu un na ve inyaregh la, sha u una fa mtsera u ve zough a mi sha kasua yô.

¹⁶ U hiihii la va her a na kaa er: Tere, pam wou ne zua a mtsera sha mi pam pue.

¹⁷ Tsô a kaa a na er: Doo yum, we ortom u injaa! Er i zough u a jighjigh sha kwagh u kiriki nahan yô, ngohol tahav sha agar pue.

¹⁸ U sha uhar la kpaa shi va, a va kaa er: Tere, pam wou ne zua a mtsera sha mi pam utaan.

¹⁹ Ngula kpaa a kaa a na er: We yô, lu a tahav sha agar ataan.

²⁰ Ugen la yô, za va, va kaa er: Tere, pam wou ne ngun, m kange un ken adikpo m koso kera;

²¹ gadia m cia u sha ci u u lu nomor yô; ka u tôô kwagh u u koso ga yô; ka u sunda kwagh u u lee ga yô.

²² Kpa a kaa a na er: Ka sha kwagh ôron u ken zwa wou je man me ôr u ijir ye, we ortom u ifer ne! U fa er m lu nomor yô, m tee henpe m ver ga, man m sondo henpe m lee kpaa ga yô.

²³ Inja na nan man u za koso inyaregh yagh ken iyou i inyar ga, er m ve nahan, ma m zough a ki a mtsera sha mi.

²⁴ Tsô A kaa a mba ve til her la er: Ngohol nen pam la her a na, na u a lu a mi pue la.

²⁵ Ve kaa a na er: Tere, ngu a pam pue.

²⁶ Gadia Me kaa ne, hanma or u nan lu a kwagh yô, ka nan je shi á seer nan ye; kpa u nan lu a kwagh ga yô, kwagh u nan lu a mi la je kpaa á ngohol hen nan kera.

²⁷ Kpa mbaihomov av mbala mba ve rumun er m̱ lu tor ve ga la yô, va nen a ve heen, va wua nen ve sha ishigh yagh.

²⁸ Kaan nahan yô, A kar ve sha hemen, A gba yemen sha Yerusalem.

²⁹ Tsô ngur mgbôghom ken Betefage man Betani, hen uwo u i yer er Olev la yô, A tindi mbahenen Nav uhar,

³⁰ A kaa er: Za nen ken wangar u a lu ne ken hemen la; né nyôron ker yô, né zua a wanjaki u i zer un, u mayange je or lu a henda un ga yô; sagh nen un, va nen a mi.

³¹ Man á lu or a pine ne er: Ka nyi ne saghen un yô, kaa nen nan ner: Kwagh gba Ter sha mi.

³² Mba i tindi ve la, ve za, ve za zua a mi er A kaa ve nahan.

³³ Mba ngur saghen wanjaki yô, mba a lu u ve la, pine ve er: Ka nyi ne saghen wanjaki?

³⁴ Ve kaa er: Kwagh gba Ter sha mi.

³⁵ Tsô ve va a mi hen Yesu, ve haa akondo a ve sha wanjaki la, ve penda Yesu sha mi.

³⁶ Ngur yemen yô, ve gba samber akondo a ve sha gbenda.

³⁷ Za mgbôghom u aren hen soughsough u uwo u Olev yô, mbahenen cii gba ember, wuese Aôndo sha imo i taver sha ci u aerenakaa a vesen a ve nenge yô,

³⁸ ve gba kaan er: I̱ wuese Tor u A ve ken iti i Ter! Bem a̱ lu Sha kua iengem sha Usha mba hemban gban ica la.

³⁹ Mbafarishi mbagenev ken ikpelaior la kaa a Na er: Ortesen, yange mbahenen Ou!

⁴⁰ A gema A kaa er: Me kaa ne, aluer mban vea huan yô, awen aa gema á gbire vaa.

⁴¹ Tsô za mgbôghom, nengen a gar yô, A vaa sha ci na.

⁴² A kaa er: Kpash, ma u shi fe akaa a a lu nan bem nyian ne; kpa hegen yô, nga myer sha ashe ou.

⁴³ Gadia ayange nga van sha a we, a mbaihomov ou vea maa u gar, vea wa u atô, vea kura u hanma imbusu.

⁴⁴ Vea kôr u vea ta inya a ônov ou keregh; iwen i môm tsô kpaa vea undu sha igen ken a we ga; sha ci u u kav shighe u Aôndo A ve sha u va sôron we ne ga.

⁴⁵ Tsô A nyôr ken tempel, A gba duen a mbateenakaa man mbayamenakaa,

⁴⁶ kaan a ve er: I nger er: Iyou Yam ka iyou i msen, kpa ne yô, ne gema a mi hingir bar u mbanumunior.

⁴⁷ A gba tesen ken tempel ayange ayange; kpa upristi mba tamen man mbangeren man mbatamen gba keren u ma ve woo Un.

⁴⁸ Kpa ve zua a kwagh u vea er ga; gadia ior cii lu veren ato sha a Na, ungwan Un.