Luka 1 - ICIGHAN BIBILO

¹ Ior kpishi ver ishima ve nger akaa a i er a hen vese i kure a la,

² er mba ve lu nengen Imo la sha ashe a ve sha hiihii je shi ve lu eren Un tom kpaa yô, ve na se a la,

³ nahan mo kpaa er m time sha akaa la cii doo doo, hii sha mhii u a zan zan, je yô, m nenge doo u me nger u a sha inja sha inja sha adondo adondo, we Teofilu ormimi,

⁴ sha u ú fa mimi u akaa a i ôr u la yô.

⁵ Sha ayange a Herode, tor u Yudia la, pristi ugen lu, iti na er Sekaria, u ken nongo u Abiya; lu a kwase, lu wan u ken ônov mba Aron, iti na er Elisabetu.

⁶ Ve uhar cii ve lu mbaperapera sha ishigh ki Aôndo, ve kuran atindi a Ter kua akaawan a Na cii ve lu a acôghol a wan iyol ga.

⁷ Kpa ve lu a wan ga, sha ci u Elisabetu lu ikômkwase; ve uhar cii, ayange kar ve sha won kpishi.

⁸ Tsô zum u a lu ken tom na u pristi sha ishigh ki Aôndo sha shighe u nongo na la yô,

⁹ ishor gba sha a na sha ieren i tom u pristi er a̱ nyôr ken tempel u Ter, a̱ nande nagh ku human doon.

¹⁰ Ikpelaior i nongo la cii lu eren msen ken won sha shighe u nanden nagh ku human doon la.

¹¹ Tsô ortyom u Ter va ande hen na, tile ken uwegh ku yanegh ku atse a nanden nagh ku human doon sha mi la.

¹² Sekaria nengen a na yô, ishima ta un kwe, mciem gba un iyol kpaa.

¹³ Kpa ortyom la kaa a na er: De cie ga, Sekaria, gadia i ungwa msen wou; kwase wou, Elisabetu, kpaa una mar u wannomso, ú ii un iti wer Yohane.

¹⁴ Ú zua a iember á saan we iyol kpaa; ior kpishi vea ember sha mmar na.

¹⁵ Gadia una lu zegeor sha ishigh ki Ter; una tswer wain kua msôrom kpaa, una iv a Icighan Jijingi er una lu ngô na ken uya je.

¹⁶ Man una gema ior kpishi ken Mbaiserael una va a ve hen Ter Aôndo ve.

¹⁷ Una za Un sha ishi a jijingi u Eliya man agee a na, sha u una gema asema a uter a̱ hide hen uôn, man una gema mbahembanato sha mfe u mbaperapera, sha u una sôr Ter nongo u i vande veren u a ver je.

¹⁸ Tsô Sekaria kaa a ortyom la er: Ka sha nyi man me fa kwagh nee? Gadia mo m bee iyol, kwase wam kpaa za gigh ve.

¹⁹ Ortyom la gema kaa a na er: Ka mo Gaberiel u m til sha ishigh ki Aôndo ne; i tindim er m̱ va ôr u kwagh, m̱ va u a loho u dedoo sha akaa ne.

²⁰ Nenge, huan you ving, ú kera fatyô u ôron kwagh ga, zan zan iyange i akaa angan aa va er la, sha ci u u ne akaaôron am a aa va er sha shighe u a la, jighjigh ga yô.

²¹ Ikpelaior lu her, lu keghen Sekaria, lu kpiligh ve iyol er a ngôôr ken tempel yum nahan yô,

²² kpa dugh ken won yô, a kera fatyô u lamen a ve ga; nahan ve kav er a nenge a ma kwagh ken tempel yô. Lu ôron kwagh a ve sha ave, a kondo iker.

²³ Tsô ayange a tom na la nga been yô, a hire a yem ken ya na.

²⁴ Ayange ne nga kar kera yô, kwase na Elisabetu jile iyol, yer iyol na iwer itian, lu kaan er:

²⁵ Kape Ter a er a mo sha ayange a A nenge sha a mo sha u Una beem ilyahan hen ior yô.

²⁶ Tsô sha uwer u sha ataratar la Aôndo tindi Gaberiel, ortyom, hen gar ugen ken Galilia, iti na er Nasareti,

²⁷ hen iniunkwase i or lu sôôr a sôôr i; iti i or la er Yosev, u ken tsombor u Davidi; iti i iniunkwase la yô, er Maria.

²⁸ Ortyom la va nyer her a na yô, kaa er: Mba sughun we, we u i rumun we sha mhôôn tsung ne, Ter ngu a we.

²⁹ Ishima ta un kwe kpishi sha kwaghôron la, a gba henen ken ishima er, shin ka nyi inja ishughun neou?

³⁰ Ortyom la kaa a na er: De cie ga, Maria, gadia u zua a mrumun u sha mhôôn her Aôndo.

³¹ Nenge, ú va wa iyav, ú mar wan u nomso, ú ii Un iti wer Yesu.

³² Un, Una lu Zegeor, á yilan Un er Wan u Uhembansha; Ter Aôndo kpaa Una na Un ikônough ki torough ki Ter Na Davidi.

³³ Una lu tor ken ya u Yakob gbem sha won; tartor Na kpaa ua bee mayange ga.

³⁴ Tsô Maria kaa a ortyom la er: Á er nan man kwagh ne una ere, gadia m ngu a fa nom ga?

³⁵ Ortyom la gema kaa a na er: Icighan Jijingi Una sen sha a we, man agee a Uhembansha la kpaa aa kase u; ka sha ci u nahan man Un u á mar Un la á yilan Un er Icighanwan u Aôndo ye.

³⁶ Nenge, Elisabetu, anmgbian wou, er a bee iyol nahan kpaa, ngu iyav, ka uwer na u sha ataratar je ne, un u ngise i yilan un er ikômkwase la.

³⁷ Gadia ma kwagh môm u a hembe Aôndo u eren un yô, ngu ga.

³⁸ Tsô Maria kaa er; Nenge, mo kpankwase u Ter, m ngun; i̱ erem sha mkaanem ou. Tsô ortyom la undu un.

³⁹ Tsô ken ayange la Maria mough yem zende ken tar u iwoogh, hen gar u Yuda ugen.

⁴⁰ A za nyôr ken ya u Sekaria a sugh Elisabetu.

⁴¹ Er Elisabetu ungwa ishughun i Maria nahan yô, wan tsuwe un ken uya; tsô Elisabetu iv a Icighan Jijingi,

⁴² a genger imo taver taver er: I̱ wuese we ken ukase cii, Wan u ú va mar Un la kpaa i̱ wuese Un.

⁴³ Man er nan man i lu mo ngô u Terem a ve hen mo?

⁴⁴ Gadia er imo i ishughun you i nyerem ken ato la je, wan tsuwem ken uya sha m-ember.

⁴⁵ Saan un u a ne jighjigh la, iyol, gadia kwagh u Ter kaa un la, á va er sha mi vough.

⁴⁶ Tsô Maria kaa er: Ishima yam ngi wuese Ter kpishi,

⁴⁷ jijingi wam kpaa ngu ember ken Aôndo, Oryiman wam.

⁴⁸ Gadia A nenge sha mlu u icivirigh ga u kpankwase Na la, hii hegen je zan zan ikov cii ia wuese msaanyol wam;

⁴⁹ gadia Wen u A lu u ageegh la A erem akaa a vesen je. Iti Na kpaa ka icighanti.

⁵⁰ Mhôônom Nam ma zungwen kpaa ma sha mba ve cie Un la, sha ikov ikov zan zan.

⁵¹ A er tom u ageegh sha uwegh Nagh; mba ve gengese iyol sha mhen u ken asema a ve la, A sambe ve kera.

⁵² A dugh mbaageev sha ukwav vev kera, A kende mba ve gengese iyol ga la, sha,

⁵³ A iv mbagenev a akaa a dedoo; A na mbanyarev gbenda ave gbilin;

⁵⁴ A wase wanakiriki Na, Iserael, gadia A umbur mhôônom Nam ma zungwen.

⁵⁵ Er lu kaa uter asev nahan a Aberaham man tsombor na kpaa, gbem sha won.

⁵⁶ Tsô Maria tsa her a na er iwer itiar nahan, man a hide hen ya na ye.

⁵⁷ Tsô shighe kom u Elisabetu una mar yô, maa a mar wannomso.

⁵⁸ Mba ve wa ndor a na man anmgbianev nav ungwa er Ter A zungu un mhôônom kpishi nahan ve ember a na imôngo.

⁵⁹ Tsô ka kom sha iyange i sha anigheni yô, ve va sha u va tsôngon wan la; lu ve ka yilan un iti er, Sekaria, sha iti i ter na la.

⁶⁰ Kpa ngô na gema kaa er: Ei, nahan ga, á yila un iti er, Yohane.

⁶¹ Tsô ve kaa a na er: Ken anmgbianev ou cii ma or ngu u i yer nan sha iti ne ga.

⁶² Nahan ve ôr kwagh a ter na sha ave, ve pine un er i lu un pe i̱ yilan un yô.

⁶³ Tsô a sôn kpande u ngeren, a nger er: Iti na er, Yohane. Ve cii kpiligh ve iyol.

⁶⁴ Fese nahan zwa na bugh, nombor na kpaa sagh; a ôr kwagh a gba wuese Aôndo.

⁶⁵ Tsô mciem gba ior mba ve wa ndor a ve la cii iyol; ve gba ôron kwagh u akaa angan ken tar u iwoogh u Yudia la cii.

⁶⁶ Mba ve ungwa cii ve koso a ken ishima, ve gba kaan er: Wan ne una va lu nan kangev kangeva? Gadia uwegh ku Ter lu sha a na.

⁶⁷ Ter na, Sekaria kpaa iv a Icighan Jijingi, gba ôron kwaghôron u profeti kaan er:

⁶⁸ I̱ wuese Ter Aôndo u Iserael; gadia A va sôr nongo Na, A paa u kpaa.

⁶⁹ A tim se korough ku myom ken ya u wanakiriki Na Davidi,

⁷⁰ er A ôr sha ikev i uicighanmbaprofeti Nav mba tsuaa la,

⁷¹ sha u yiman se sha ikev i mbaihomov asev, man sha uwegh ku mba ve ker se ihom la cii.

⁷² Lu sha u zungwen uter asev mhôônom, man shi u umbur icighanikuryan Na kpaa;

⁷³ ka mbum u A bum a Aberaham ter wase la,

⁷⁴ er Una na á yima se sha uwegh ku mbaihomov kera, man sé civir Un a mciem iyol ga ye,

⁷⁵ sha wang man sha perapera sha ishigh Nagh sha ayange a uma wase cii.

⁷⁶ Man we, wan á yilan we er profeti u Uhembansha; gadia ú zaan Ter sha hemen sha u sôron Un gbenda,

⁷⁷ man shi sha u nan nongo Na kwaghfan sha u fan myom u sha mde u á de ve asorabo a ve yô,

⁷⁸ sha mhôônom ma zungwen tsung ma Aôndo wase la; ka sha ma man sev mbu aven Sha la mbua va hen vese ye,

⁷⁹ sha u tan sha mba ve tem ken ime man ken mure u kuugh la kpaa, man shi sha u kôôm angahar ase zan a mi sha gbenda u bem kpaa.

⁸⁰ Wan la vese man taver a taver ken Jijingi; lu ken taaikôngo zan zan sha iyange i i ver un ken igbar sha ishigh ki Iserael la.