Levitiku 6 - ICIGHAN BIBILO

¹ TER shi ôr kwagh a Mose, kaa er:

² Aluer anti or nana er isholibo nana er TER kwagh u a lu sha mimi ga, nana tuna er or u wan ndor a nan, na nan inyaregh nan koso ga, shin ityungu kpaa ga, shin nan ii nan kwagh kpaa ga; shin nana ya or u wan ndor a nan kwagh sha apera;

³ shin nana zua a kwagh u a saa, man nana gema á tuna; shin nana bum sha aie yô; sha hanma kwagh u or a fatyô u eren isholibo sha mi yô;

⁴ aluer nana er isholibo, man ibo ia kôr nan yô, nahan nana̱ hide a kwagh u nan ii la, shin kwagh u nan ye or sha apera la, shin inyaregh ki i ne nan, koso la, shin kwagh u a saa man nan zough a mi la,

⁵ shin nyityô kwagh i nan bum sha mi sha aie la cii, nana̱ hide a mi cii, shi nana̱ seer môm-ken-utaan sha mi; sha iyange i nan ye ibo la, nana̱ hide a min, nana̱ na or u i lu kwagh u nan la je.

⁶ Shi nana̱ na TER nagh sha nomiyôngo, shin kpev u a lu a ihogholough iyol ga yô, u a kom sha ishe i u we la, sha ci u nagh ku iboogh; nana̱ va na pristi,

⁷ pristi a̱ na iwom sha ci u nan sha ishigh ki TER, nahan á de nan kwaghbo u nan, sha hanma kwagh u nan er man nan hingir oriboogh sha mi la.

⁸ TER shi ôr kwagh a Mose, kaa er:

⁹ Kaa Aron a ônov nav wer: Ka tindi u nagh ku nanden ne: Nagh ku nanden, ku̱ lu sha usu sha atse a nanden nagh sha mi, tugh jimin cii, zan zan sev mbu kar aven; usu a atsegh la u̱ lu sha mi gbem.

¹⁰ Pristi a̱ haa riga na u sha ikondo i pupuu, shi a̱ huwa ifo na i sha ikondo i pupuu, a̱ cir idyelegh na, a̱ kura mtwem ma nagh ku nanden ku usu u hie ku sha atse la, a̱ haa ma hen kpeatsegh.

¹¹ Nahan a̱ er akondo na la kera, a̱ haa akondo agenegh, a̱ kura mtwem mara, a̱ due a mi ken akôngoafogh hen ijiir i wang.

¹² Usu u sha atse la, u̱ lu her, u̱ de pirin ga; pristi a̱ waan ikon sha mi hanma sev, a̱ pendan nagh ku nanden sha mi sha inja sha inja, a̱ nanden ahôm a nagh ku bem sha mi.

¹³ Usu u̱ yeghen sha atse gbem, u̱ de pirin mayange ga.

¹⁴ Ka tindi u nagh ku sha samuyia ne: Ônov mba Aron ve̱ vaan a ku sha ishigh ki TER hen kpeatsegh.

¹⁵ A̱ ongo mwem ma kengese ma nagh ku sha samuyia ma i hee mkurem sha mi la, ikevwe poo, shi a̱ kura libano u human doon u a lu sha nagh ku sha samuyia la cii, a̱ nande sha atse, i̱ lu ihuma i doon; ka nagh ku umbur ku nan TER.

¹⁶ Kwagh u a shi her yô, Aron a ônov nav ve̱ ya; i̱ de we kwa sha mi ga, i̱ yaan ku ken icighanjiir; ka ken tembe u tenti u kohol ker la, ve̱ yaan ku ye.

¹⁷ I̱ de kaan ku a kwa sha mi ga. Ka kwar u M ne ve je ne, ken iniav Yav mbi usuv; ka icighankwagh u hemban cii je, er nagh ku isholibo man nagh ku iboogh nahan.

¹⁸ Hanma wan u Aron u nomso nana ya ku, ka tindi u gbem sha ikov ikov sha iniav mbi usuv mbi TER; hanma or u nana bende a mbi yô, nana hingir icighanor.

¹⁹ TER shi ôr kwagh a Mose, kaa er:

²⁰ Nagh ku Aron a ônov nav, ku vea na TER sha iyange i á shighe un mkurem la yô, ka mwem ma kengese ma ma kom môm-ken-upue u efa, sha ci u nagh ku sha samuyia ku gbem, i̱ pande ma vough vough, i̱ na pepe man aikighe.

²¹ I̱ kaa ma sha mkure sha icenge, i̱ vande hôron ma, man á va a mi ye; ka avur a kaan nan nagh ku sha samuyia mi ye, i̱ lu TER ihuma i dedoo.

²² Pristi u i shigh un mkurem, u a tem sha ityough nagh ken ônov nav la, ka un una naan ku ye, ka tindi u gbem; á nanden TER ku jimin cii.

²³ Hanma nagh ku sha samuyia ku pristi yô, i̱ nande ku jimin cii, i̱ de ye ku ga.

²⁴ TER shi ôr kwagh a Mose, kaa er:

²⁵ Ôr kwagh a Aron man ônov nav, kaa a ve wer: Ka tindi u nagh ku isholibo ne: ka hen ijiir i i senge nagh ku nanden la, i̱ sôngon nagh ku isholibo sha ishigh ki TER kpaa ye, ka icighankwagh u hemban cii je.

²⁶ Pristi u a ne ku sha ci u isholibo la, ka un una yaan ku ye; i̱ yaan ku hen icighanjiir je, ka hen tembe u tenti u kohol ker la.

²⁷ Hanma or u nana bende a inyam i ku yô, nana hingir icighanor; aluer awambe a ku á tsenda sha ikondo yô, ôô kwagh u a tsende sha mi la ken icighanjiir.

²⁸ Ityegh ki inyaagh ki i jiir ku shi mi yô, i̱ hembe ki; man aluer á jiir ku shin ityegh ki togula yô, i̱ kile ki i̱ elegh ki sha mnger.

²⁹ Hanma nomsoor u ken upristi yô, nana ya ku; ka icighankwagh u hemban cii je.

³⁰ Kpa nagh ku isholibo ku i pande awambe a ku, i ve a min ken tenti u kohol ker la, sha u nan iwom mi ken icighanjiir yô, i̱ de ye ku mayange ga, i̱ nande ku sha usu je.