Levitiku 4 - ICIGHAN BIBILO

¹ Tsô TER ôr kwagh a Mose, kaa er:

² Ôr kwagh a Mbaiserael, kaa a ve wer: Aluer hanma or nana er isholibo abu, nana er ma kwagh u TER A yange er i̱ de eren ga yô,

³ aluer pristi u i shigh un mkurem la, una er isholibo una haa ior ibo iyol yô, a̱ na TER nagh ku isholibo sha gumbua u a lu a ihogholough iyol ga yô, sha ci u isholibo na i a er la;

⁴ a̱ va a nombua la hen hunda u tenti u kohol ker la, sha ishigh ki TER, a̱ penda uwegh sha ityough ki nombua la, a̱ sôngo un sha ishigh ki TER.

⁵ Pristi u i shigh un mkurem la a̱ pande awambe a nombua la, a̱ va a mi hen tenti u kohol ker la;

⁶ pristi la a̱ civ ihôwe shin awambe, a̱ mishi awambe la, kwa taankaruhar sha ishigh ki TER, sha ishigh ki ikondo i yisan i icighanjiir la.

⁷ Pristi la a̱ er awambe la, a̱ feregh sha akor a atse a nanden kwaghhumandoon sha mi, a a lu sha ishigh ki TER, ken tenti u kohol ker la; awambe a nombua la cii, a̱ gema a̱ haa hen ityô i atse a nanden nagh, a a lu hen hunda u tenti u kohol ker la.

⁸ Ahôm a nombua u nagh ku isholibo la cii, a̱ kura a sha; ahôm a a cir ikav mbi kimi la, man ahôm a a lu sha ikav mbi kimi la cii,

⁹ man ahi ahar la, kua ahôm a a lu sha a, vegher u shin iwenge la, man ishwalegh ki mtema, a̱ dugh ki a ahi la imôngo,

¹⁰ er ka i kura a sha, sha nombua u nagh ku bem la nahan; pristi a̱ gema cii, a̱ nande sha atse a nagh ku nanden.

¹¹ Ikôvough ki nombua la, a inyam na cii, kua ityough nagh man angahar a na man ikav nav mbi kimi, man icômbov nav,

¹² nombua la jimin cii, a̱ due a mi ken akôngoafogh hen ijiir i wanger, henpe i hee mtwem yô, i̱ za nande un sha usu sha ikon; ka hen ijiir i haan mtwem la, i̱ nande un ye.

¹³ Aluer mkohol u ior i Iserael cii vea kar kpe, man mkohol una fa nahan ga, vea er ma kwagh u TER A yange er i̱ de eren ga, vea tôô ibo yô,

¹⁴ zum u isholibo i ve er la ia due ken igbar yô, shighe la mkohol a̱ na nagh ku isholibo sha gumbua, ve̱ va a mi sha hunda u tenti u kohol ker la,

¹⁵ nahan mbatamen mba mkohol u ior ve̱ penda ave sha ityough ki nombua la sha ishigh ki TER, i̱ sôngo gumbua la sha ishigh ki TER.

¹⁶ Pristi u i shigh un mkurem la, a̱ pande awambe a nombua la, a̱ va a mi hen tenti u kohol ker la;

¹⁷ pristi a̱ civ ihôwe shin awambe la, a̱ mishi a kwa taankaruhar sha ishigh ki TER, sha ishigh ki ikondo i yisan la.

¹⁸ A̱ er awambe la, a̱ feregh sha akor a atse a a lu sha ishigh ki TER ken tenti u kohol ker la, a̱ gema awambe la cii, a̱ haa a hen ityô i atse a nanden nagh sha mi a a lu hen hunda u tenti u kohol ker la.

¹⁹ Ahôm a na la cii, a̱ kura a, a̱ nande a sha atse,

²⁰ a̱ er a nombua la er a er a nombua u sha nagh ku isholibo la nahan, kape á er a ngun kpaa la; pristi a̱ na iwom sha ci ve, tsô á de ve asorabo a ve.

²¹ Nahan a̱ tôô nombua la, a̱ due a mi ken akôngoafogh, a̱ za nande un er nombua u hiihii la nahan; ka nagh ku isholibo ku mkohol u ior je la.

²² Aluer ortaregh nana er ma kwagh abu u TER, Aôndo na, A yange er i̱ de eren ga la, nana tôô ibo yô,

²³ aluer nana̱ va kav isholibo i nan la yô, nana̱ va na nagh sha kpev u a lu a ihogholough iyol ga yô,

²⁴ nana̱ penda uwegh sha kpev la, nana̱ sôngo un hen ijiir i sôngon nagh ku nanden sha ishigh ki TER; ka nagh ku isholibo.

²⁵ Pristi a̱ er awambe a nagh ku isholibo la sha ihôwe na, a̱ feregh sha akor a atse a nagh ku nanden, a̱ gema awambe a na a̱ haa hen ityô i atse a nanden nagh sha mi la.

²⁶ Ahôm a na cii, a̱ nande sha atse, er i eren a ahôm a nagh ku sôngon ku bem la nahan; pristi a̱ na iwom sha ci u nan, sha ci u isholibo i nan er la, nahan á de nan isholibo i nan.

²⁷ Man aluer hanma or u ken inya kpaa, nana er isholibo abu, nana er ma kwagh u TER A yange er i̱ de eren ga la, nana tôô ibo yô,

²⁸ aluer nana va kav isholibo i nan er la yô, nana̱ va a nagh sha tuleivo u a lu a ihogholough iyol ga yô, sha ci u isholibo i nan er la.

²⁹ Nana̱ penda uwegh sha ityough ki nagh ku isholibo kura, nana̱ sôngo ku hen ijiir i nagh ku nanden la.

³⁰ Pristi a̱ er awambe sha ihôwe, a̱ feregh sha akor a atse a nagh ku nanden, a̱ gema awambe la cii, a̱ haa hen ityôatsegh;

³¹ ahôm cii yô, a̱ kura a sha, er ka i kura ahôm a nagh ku sôngon ku bem la nahan; pristi a̱ na iwon sha ci u nan, nahan á de nan isholibo i nan.

³² Man aluer nana na waniyôngo sha ci u nagh ku nan ku isholibo yô, nana̱ va a tule u a lu a ihogholough iyol ga yô.

³³ Nana̱ penda uwegh sha ityough ki nagh ku isholibo kura, nana̱ sôngo un sha ci u nagh ku isholibo hen ijiir i i senge nagh ku nanden la.

³⁴ Pristi a̱ er awambe a nagh ku isholibo kura sha ihôwe na, a̱ feregh sha akor a atse a nagh ku nanden; a̱ gema awambe la cii, a̱ haa hen ityôatsegh;

³⁵ ahôm cii yô, a̱ kura a sha, er ka i kura ahôm a gumiyôngo u nagh ku sôngon ku bem la nahan; pristi a̱ nande a sha atse, sha iniav mbi usugh mbi TER; pristi a̱ na iwom sha ci u nan, sha ci u isholibo i nan er la, nahan á de nan isholibo i nan.