Levitiku 3 - ICIGHAN BIBILO

¹ Aluer nagh ku nan á lu nagh ku sôngon ku bem yô, man aluer nana na bua, á lu nom shin mgbian, nana̱ na, u a lu a ihogholough iyol ga yô, sha ishigh ki TER.

² Nana̱ penda uwegh sha nagh ku nan kura, nana̱ sôngo ku hen hunda u tenti u kohol ker la, upristi, ônov mba Aron, ve̱ haa awambe sha ambusuatsegh ve̱ ningir ve̱ tser.

³ Nana̱ pande nagh ku bem, nana̱ gema á na TER nagh ku usugh a mi; i̱ lu ahôm a a cir ikav mbi kimi, man ahôm a a lu sha ikav mbi kimi cii,

⁴ man ahi ahar man ahôm a a lu sha a, vegher u shin iwenge la, man ishwalegh ki mtema, nana̱ dugh ki a ahi imôngo.

⁵ Ônov mba Aron ve̱ gema cii, ve̱ nande sha atse, sha nagh ku nanden ku ku lu sha ikon i sha usu la; ka nagh ku usugh ku human doon ku nan TER.

⁶ Aluer nagh ku nan ku sôngon ku bem ku nan TER á lu iyôngo shin ivo, nom shin mgbian, nana̱ na, i i̱ lu a ihogholough iyol ga yô.

⁷ Aluer ka sha gumiyôngo nan lu nan nagh yô, nana̱ na un sha ishigh ki TER;

⁸ nana̱ penda uwegh sha nagh ku nan, nana̱ sôngo ku sha ishigh ki tenti u kohol ker la; ônov mba Aron ve̱ haa awambe a ku sha ambusuatsegh ve̱ ningir ve̱ tser.

⁹ Nana̱ pande nagh ku sôngon ku bem kura, nana̱ na TER nagh ku usugh a mi; i̱ lu ahôm a ku man tsa u ahômough jimin cii, nana̱ dugh u ikua ikua a lyemen, man ahôm a a cir ikav mbi kimi la, kua ahôm a a lu sha ikav mbi kimi cii,

¹⁰ man ahi ahar la, kua ahôm a a lu sha a, vegher u shin iwenge la, man ishwalegh ki mtema, nana̱ dugh ki a ahi imôngo.

¹¹ Pristi a̱ gema cii, a̱ nande sha atse; ka kwaghyan u nagh ku usugh ku nan TER.

¹² Man aluer nagh ku nan á lu sha ivo yô, nana̱ va na i sha ishigh ki TER;

¹³ nana̱ penda uwegh sha ityough ki i, nana̱ sôngo i sha ishigh ki tenti u kohol ker la; ônov mba Aron ve̱ haa awambe a i sha ambusuatsegh, ve̱ ningir ve̱ tser.

¹⁴ Nana̱ pande i, nana̱ na TER nagh ku nan ku usugh a mi; i̱ lu ahôm a a cir ikav mbi kimi la, kua ahôm a a lu sha ikav mbi kimi cii,

¹⁵ man ahi ahar la, kua ahôm a a lu sha a, vegher u shin iwenge la, man ishwalegh ki mtema, nana̱ dugh ki a ahi imôngo.

¹⁶ Pristi a̱ gema cii, a̱ nande a sha atse; ka kwaghyan u nagh ku usugh ku human doon je la; ahôm cii ka a TER.

¹⁷ Ka tindi u eren nahan gbem sha won sha ikov ikov ken uya enev cii: De ye nen ahôm man awambe mayange ga.