Levitiku 24 - ICIGHAN BIBILO

¹ TER ôr kwagh a Mose kaa er:

² Kaa Mbaiserael ve̱ va na u mkurem ma olev ma kumen ma wang sha ci u tsaren, sha er i̱ tsar imenger i̱ yeghen gbem yô.

³ Aron a̱ sôron i ken won u ikondo i yisan i Shiada ken tenti u kohol ker la, i̱ yeghen her aikighe zan zan sev mbu av, sha ishigh ki TER gbem; i̱ lu tindi u gbem sha ikov ikov.

⁴ A̱ sôron amenger a sha daarimenger u wang la, sha ishigh ki TER gbem.

⁵ Tôô mwem ma kengese, kaa umasa a mi pue kar uhar, masa môm a̱ kuma uikaren uhar-ken-upue.

⁶ Ver ve iniongo ihiar môôr, môôr, hanma nongo ve̱ lu ataratar, sha tebul u wang la, sha ishigh ki TER.

⁷ Shi ver libano u human doon u wang sha hanma nongo, a̱ lu nagh ku umbur ku bredi la, ka nagh ku usugh ku nan TER je la.

⁸ Hanma iyange i memen a̱ veren ve sha ishigh ki TER gbem, i̱ lu Mbaiserael ikuryan i tsôron je.

⁹ Ve̱ lu sha ci u Aron a ônov nav; ve̱ yaan ve ken icighanjiir, gadia ka un icighankwagh u hemban cii, ken iniav mbi usugh mbi nan TER, ka tindi u tsôron je.

¹⁰ Tsô orgen, ngô na lu wan Mbaiserael, ter na gema lu Origipiti, due nyôr Mbaiserael hen atô; nahan or u ngô na lu wan Mbaiserael la nongo num a or u Iserael hen afo.

¹¹ Tsô or u ngô na lu wan Mbaiserael la ter ITI la dang, gba tuhwan; nahan i va a na hen Mose. Iti i ngô na er Shelomiti wan u Diberi u ken kwe u Dan.

¹² Ve wa un ken gaadi sha u TER A̱ pase ve kwagh u á er yô.

¹³ Tsô TER ôr kwagh a Mose, kaa er:

¹⁴ Due a or u nan toho la ken akôngoafogh; mba ve ongo cii, ve̱ penda un ave sha ityou, mkohol u ior cii ve̱ ta un awen ve̱ wua.

¹⁵ Ôr kwagh a Mbaiserael, kaa a ve wer, hanmô u nana tuhwa Aôndo u nan yô, nana lu a ibo iyol.

¹⁶ Man shi u nan toho iti i TER kpaa, i̱ wua nan kpee je; mkohol u ior cii ve̱ ta nan awen, ve̱ ta nan awen ve̱ wua kpee je; shin a lu shiror shin a lu or u tar la jim kpaa, aluer nana ter ITI la dang yô, i̱ wua nan.

¹⁷ Man or u nan gbidi or nan woo yô, i̱ wua nan kpee je.

¹⁸ Or u nan gbidi zendenya nan woo yô, nana̱ kimbi un; uma sha uma.

¹⁹ Man aluer or nana vihi or u nan we ndor a nan iyol yô, er nan er la, kape nan di kpaa i̱ er a nan la;

²⁰ msombo sha msombo, ishe sha ishe, inyigh sha inyi; er nan vihi or iyol la, kape á er a nan di vough la.

²¹ Or u nan woo zendenya yô, nana̱ kimbi un; or u nan woo or yô, i̱ wua nan.

²² Lu nen a tindi môm sha ci u shiror man or u tar la jim; gadia ka Mo TER M lu Aôndo wen ye.

²³ Tsô Mose ôr kwagh a Mbaiserael, ve due a or u nan toho la ken akôngoafogh, ve ta un awen ve wua; Mbaiserael er, er TER kaa Mose nahan.