Levitiku 20 - ICIGHAN BIBILO

¹ TER shi ôr kwagh a Mose, kaa er:

² Shi kaa Mbaiserael wer: Hanma or u ken Mbaiserael shi u ken ushirmbaiorov mba ve tse ken Iserael, u nana na Moleki wan u nan yô, i̱ wua nan kpee je; ior mba ken tar la je, ve̱ ta nan awen.

³ Me kera saan ishigh a or la ga, Me kar a nan ken nongo u nan kera, sha ci u nan ne Moleki wan u nan, nan hôngor a icighanjiir Wam shi nan hee icighanti Wam kpaa yô.

⁴ Man aluer ior mba hen tar la vea gba den or la tsô, zum u nan ne Moleki wan u nan vea kera wua nan ga yô,

⁵ Mo Me kera saan ishigh a or la ga, kua a ior mba ken ya u nan kpaa ga, or la kua mba ve er idya a nan imôngo sha u dondon Moleki la cii, Me dugh ve ken nongo ve kera.

⁶ Or u nan ze hen ujijingi mba mbakpenev man mbatsenganpasen akaa sha u nana er idya sha u dondon ve yô, Me kera saan ishigh a or la ga, Me dugh nan ken nongo u nan kera.

⁷ Nahan tsegha nen ayol a en, lu nen uicighanmbaiorov; gadia ka Mo TER M lu Aôndo wen ye.

⁸ Waan nen akaawan a Am iko, eren nen sha a; ka Mo TER M tsegh ne ye.

⁹ Gadia hanma or u nan toho ter u nan shin ngô u nan yô, i̱ wua nan kpee je, nan tuhwa ter u nan shin ngô u nan je; awambe a nan a̱ lu sha ityough ki nan.

¹⁰ Or u nan er idya a kwase u orgen, ka u nan er idya a kwase u or u nan we ndor a nan yô, idyaor la kua idyakwase la kpaa, i̱ wua ve kpee je.

¹¹ Or u nan yav a kwase u ter u nan yô, nan bugh idyelegh u ter u nan je ve; ve uhar cii, i̱ wua ve kpee je; awambe a ve a̱ lu sha ityouv vev.

¹² Man aluer or nana yav a kwase u wan u nan yô, ve uhar cii i̱ wua ve kpee, ve er kwagh u dang yum; awambe a ve a̱ lu sha ityouv vev.

¹³ Aluer or á yav a nomsoor er i yaven a kwase nahan yô, ve uhar cii ve er kwagh u ihôngorough i̱ wua ve kpee je; awambe a ve a̱ lu sha ityouv vev.

¹⁴ Aluer or á er kwase kua ngô u kwase la yô, ka ifer i ndôhôr ishima je, i̱ nande ve sha usu, un kua ve, sha er ifer i i ndôhôr ishima i̱ de luun hen ven ga yô.

¹⁵ Aluer or á yav a zendenya yô, i̱ wua nan kpee je; zendenya la kpaa, wua nen un.

¹⁶ Man aluer kwase nana mgbôghom a ma zendenya sha u a̱ unde nan yô, i̱ wua kwase la kua zendenya la; i̱ wua ve kpee je, awambe a ve a̱ lu sha ityouv vev.

¹⁷ Man aluer or nana er anngô u nan u kwase, ka wan u ter u nan u kwase, shin wan u ngô u nan u kwase je la, nana nenge idyelegh na, man un kpaa una nenge idyelegh u nan yô, ka kwagh u kunya je; nahan i̱ dugh ve sha ashe a ônov mba nongo ve kera gadia nan bugh idyelegh u anngô u nan u kwase je; nana lu a ibo iyol.

¹⁸ Aluer or nana yav a kwase zum u a dugh won, nana bugh idyelegh na yô, nan bugh idyelegh u imbor na je, kwase la kpaa bugh imbor i awambe na; ve uhar cii, i̱ dugh ve ken nongo ve kera.

¹⁹ De bughun idyelegh u anngô u ngôu u kwase ga, shin anngô u teru u kwase kpaa ga, gadia nahan á bugh idyelegh u anmgbian je; vea lu a ibo iyol.

²⁰ Man aluer or á yav a kwase u anngô u ter u nan yô, nan bugh idyelegh u anngô u ter u nan je; vea tôô isholibo ve, vea kpe atseen.

²¹ Man aluer or á tôô kwase u anngô u nan yô, ka kwagh u ihôngorough, nan bugh idyelegh u anngô u nan je, vea ver tse ga.

²² Waan nen akaawan a Am cii kua akaaôron Am a jirigh iko, eren nen sha a kpaa, sha er tar u M lu van a ven ker Mer, tema nen ker la, ua suwa ne kera ga yô.

²³ De dondon nen aeren a ikurior i M lu va zendan i sha ishigh yenegh kera ne ga; gadia akaa ne cii ve er a, nahan ve ndôhôr Mo ishima.

²⁴ Kpa ne yô, M kaa ne Mer, ka ne né ya dyako u tar ve ye, Mo Me na ne u, u̱ hingir kwagh wen jim, ka tar u atumbabua a dumbur ken u kua iyough kpaa; ka Mo TER M lu Aôndo wen u M ver ne kposo a akuraior yô.

²⁵ Nahan yô, pav nen zendenya u wang kposo a u a lu wang ga yô, man inyon i wang ga, a i lu wang yô; de hôngor nen a uuma enev sha uzendenya ga shin sha inyon shin hanma injakwagh i kper a kpela inya kpaa ga, mba M tswer ne ve Mer, ve mba wang ga yô.

²⁶ Lum nen uicighanmbaiorov, gadia Mo TER M ngu icighan je, M pav ne a akuraior, M ver ne kposo, sha u lu nen ior Av yô.

²⁷ Aluer nomsoor shin kwase nana lu a jijingi u orkpen shin tsenganpasen akaa yô, i̱ wua ve kpee, i̱ ta ve awen; awambe a ve a̱ lu sha ityouv vev.