Levitiku 19 - ICIGHAN BIBILO

¹ TER shi ôr kwagh a Mose, kaa er:

² Ôr kwagh a mkohol u Mbaiserael cii, kaa a ve wer: Lu nen uicighanmbaiorov, gadia Mo TER, Aôndo wen, M ngu icighan je.

³ Hanmô wen nana̱ cian ngô u nan kua ter u nan; waan nen ayange a memen a Am ikô; ka Mo TER M lu Aôndo wen ye.

⁴ De gem nen hen mbaaôndo mba gbiliniv ga, shi de eren nen mbaaôndo mba i ker a ker ga; ka Mo TER M lu Aôndo wen ye.

⁵ Zum u nea naan TER nagh ku sôngon ku bem yô, naan nen ku er á rumun ne yô.

⁶ Iyange i á na ku la, ka iyange la je, á ya ku ye, kua kpernan kpaa; kpa ma kwagh u una tsa her, á kuma ayange atar yô, i̱ nande un sha usu.

⁷ Aluer nahan kpaa, á ya un sha iyange i atar la yô, ka kwagh u ihôngorough; á kera rumun un ga;

⁸ or u nana ya un yô, nana lu a ibo iyol, sha ci u nan hôngor a icighankwagh u TER yô; i̱ dugh or la ken nongo u nan kera.

⁹ Zum u nea sundan iyiav mbi ken ishule yen kpaa, de sondo ken ikpisule you been ga, de yaren twar hen akumbe ou kpaa ga.

¹⁰ De yaren twar hen sule wou u wain ga, shi de kor atam a sule wou u wain a a hee inya la kpaa ga, undu a her sha ci u icanor kua shiror; ka Mo TER M lu Aôndo wen ye.

¹¹ De iin nen ga, man de eren nen aie ga, man de tsughun nen ayol a en ga.

¹² De bumun iti Yam sha aie geman hôngor a iti i Aôndo wou ga; Ka Mo TER.

¹³ De imbishi or u nan we ndor a we ga, shi de ye nan kwagh sha apera kpaa ga; injar i ortom u sha tôndo i̱ de tse her a we zan zan sev mbu aven ga.

¹⁴ De toho orakondoato ga, shi de pende orapirashe kwagh u nôngon gbev a mi sha hemen ga, kpa cian Aôndo wou; ka Mo TER.

¹⁵ De eren ifer sha ijirôron ga; de gbe tan ken icanor tsô ga, de hembe wan shagbaor iko kpaa ga, kpa ôr or u nan we ndor a we ijir sha perapera je.

¹⁶ De zenden anger hen ior ou ga, de nenge u haan awambe a or u nan we ndor a we ga; ka Mo TER.

¹⁷ De ker anngôu ihom ken ishima you ga, venda kwagh a or u nan we ndor a we gbar gbar, de kera kper ibo sha iyol you sha ci u nan ga.

¹⁸ De oron iyev ga, shi de we ishima bough a ônov mba ior ou ga, kpa or u nan we ndor a we nana̱ doo u ishima er we iyol you nahan; ka Mo TER.

¹⁹ Waan nen akaawan a Am iko, de deen uzendenya ou anza ahar, ve̱ unden nungwa nungwa ga; de te ivor anza ahar ken sule wou ga; man de hee riga u i kor un sha akondo atô ahar iyol ga.

²⁰ Or u nana yav a kwase u a lu kpankwase u i vande tôndon zwa er á na orgen, kpa i lu a paa un ga, man i lu a dugh un ken kpan kpaa ga yô, i̱ tsaha ve a tsaha i̱ de woo ve ga, gadia ngu a due ken kpan ga.

²¹ Nana̱ va a nagh ku nan ku iboogh hen TER, hen hunda u tenti u kohol ker la, i̱ lu nomiyôngo sha ci u nagh ku iboogh.

²² Pristi a̱ na iwom sha ci u nan sha nomiyôngo u nagh ku iboogh la, sha ishigh ki TER, sha ci u isholibo i nan er yô; tsô á de nan isholibo i nan er la.

²³ Zum u né nyôr ken tar la, nea môôr hanma anza a ikon i i ye atam a i yô, atam a i la a̱ lu ne kwagh u tsweren; tswer nen a anyom atar je; i̱ de ye a ga.

²⁴ Kpa inyom i sha unyiin la, atam a i cii aa lu icighaniwua i wuese TER a mi.

²⁵ Inyom i sha utaan la yô, ya nen atam a i, sha er ia seer umen ne atam yô; ka Mo TER M lu Aôndo wen ye.

²⁶ De ye nen ma kwagh kua awambe a na ga; de kpehen nen ishor ga, shi de eren nen ahir kpaa ga.

²⁷ De hondon nen ityough gbilititi ga, shi de tende nen indyer yen ken akpe ga.

²⁸ De esen nen avav iyol sha ci u or u nan kpe ga; de gberen nen akaa iyol kpaa ga; ka Mo TER.

²⁹ De heen wan wou u kwase, veren un a̱ hingir idyakwase ga; sha er tar la u̱ de gbe ken idya u̱ mgboughon a ifer i ndôhôr ishima ga.

³⁰ Waan nen ayange a memen Am iko; civir nen icighanjiir Wam; ka Mo TER.

³¹ De ze nen hen ujijingi mba mbakpenev ga, shin mbatsenganpasen akaa kpaa ga, de keren nen ve sha er né hôngor ayol a en sha ve ga; ka Mo TER M lu Aôndo wen yen.

³² Mough tile sha, sha ishigh ki or u menden ivu, civir ishigh ki tamenor, cian Aôndo wou; ka Mo TER.

³³ Aluer shiror una lu her a we ken tar wen yô, de eren nen un ican ga.

³⁴ Shiror u a lu her a ven yô, a̱ lu ne er ka or u tar la jim yô, a̱ doo u ishima er iyol you nahan; gadia ne kpaa ngise ne lu ushirmbaiorov ken tar u Igipiti; ka Mo TER M lu Aôndo wen ye.

³⁵ De eren nen ifer sha ijirôron ga, shin sha ikaren i iniembe, shin sha myoho, shin sha ikagh ki karen kwagh a mi kpaa ga.

³⁶ Ka iyôgh ki karen ki vough man uikaren mba vough man efa u vough man hin u vough kpaa, luun nen a mi ye; ka Mo TER M lu Aôndo wen u M dugh a ven ken tar u Igipiti ye.

³⁷ Akaawan Am cii kua akaaôron Am a jirigh cii, waan nen a iko eren nen sha mi; ka Mo TER.