Levitiku 18 - ICIGHAN BIBILO

¹ TER shi ôr kwagh a Mose, kaa er:

² Ôr kwagh a Mbaiserael, kaa a ve wer: Ka Mo TER M lu Aôndo wen ye.

³ Aeren a ken tar u Igipiti ape yan ne lu la, de kera eren nen a ga; man shi aeren a ken tar u Kanaan, ape Mo M lu van a ven ne kpaa, de eren nen a ga; shi de eren nen sha atindi a ve kpaa ga.

⁴ Ka akaaôron a Am a jirigh, eren nen sha mi ye; man shi ka akaawan a Am kpaa, waan nen a iko, zenden nen sha mi ye; ka Mo TER M lu Aôndo wen ye.

⁵ Yô, waan nen akaawan a Am man akaaôron a Am a jirigh iko, a or á er sha mi yô, nana lu uma sha a; ka Mo TER.

⁶ Mô wen môm nana̱ de mgbôghom a anngô u nan sha u bughun idyelegh ga; ka Mo TER.

⁷ Idyelegh u Teru ka idyelegh u ngôu je la, de bughun ga, ka ngôu; de bughun idyelegh na ga.

⁸ De bughun idyelegh u kwase u teru ga, ka idyelegh u teru je la.

⁹ Idyelegh u anngôu u kwase, wan u teru u kwase, shin wan u ngôu u kwase, shin i mar un hen ya, shin a lu pe gen kpaa, de bughun idyelegh na ga.

¹⁰ Idyelegh u wankwase u wan wou u nomso, shin idyelegh u wankwase u wan wou u kwase, de bughun ga, gadia idyelegh vev ka idyelegh wou je.

¹¹ Idyelegh u wankwase u kwase u teru, u teru a mar yô, ka anngôu u kwase je, de bughun idyelegh na ga.

¹² De bughun idyelegh u anngô u teru, u kwase ga, ka anngô u teru je.

¹³ De bughun idyelegh u anngô u ngôu u kwase ga, gadia ka anngô u ngôu je.

¹⁴ De bughun idyelegh u anngô u teru, u nomso ga, de mgbôghom a kwase na ga; un ka anngôu je.

¹⁵ De bughun idyelegh u kwase u wan wou ga, gadia ka kwase u wan wou je, de bughun idyelegh na ga.

¹⁶ De bughun idyelegh u kwase u anngôu ga, ka idyelegh u anngôu je la.

¹⁷ De bughun idyelegh u kwase kua wan u nan u kwase ga; de eren wankwase u wan na u nomso, shin wankwase u wan na u kwase sha u bughun idyelegh ve ga; ve ka anngôôv ou je; ka ifer i ndôhôr ishima je.

¹⁸ De eren wonu a̱ va hingir wuhe u anngô na sha u á bughun idyelegh na er ngula a lu uma her la ga.

¹⁹ De mgbôghom a kwase sha u bughun idyelegh u nan shighe u nan lu wang ga la ga.

²⁰ De yaven a kwase u or u nan we ndor a we, sha er ú hôngor iyol you a nan ga.

²¹ De ne mô wan wou sha u i̱ kar a nan ken usu sha ci u Moleki ga, de hôngor a iti i Aôndo wou ga; ka Mo TER.

²² De yaven a nomsoor er i yaven a kwase nahan ga; ka kwagh u ihôngorough je.

²³ De yaven a ma zendenya, sha er ú hôngor iyol you a mi ga; kwase kpaa, nana̱ de za til sha ishigh ki zendenya er a̱ unde nan ga; ka mnongo u ndôhôr ishima je.

²⁴ De hôngor nen ayol a en sha ambaakaa ne ga; gadia ka akaa ne cii, akuraior a M lu va zendan a sha ishigh yenegh kera ne, a hôngor ayol a a a mi ye.

²⁵ Tar la hôngor, ka nahan man M tsaha u sha ci u kwaghbo u u ye, tar gema suwa mba ve tem ken u la kera.

²⁶ Yô, waan nen akaawan a Am iko kua akaaôron Am a jirigh kpaa, de eren nen kwagh môm ken akaahôngorough ne ga; shin a lu or u tar la jim, shin a lu shiror u a nyer a nyôr ne kpaa.

²⁷ Gadia akaahôngorough ne cii ior mba ken tar la er a, ve mba ve vande teman a ven her la, nahan tar hôngor je;

²⁸ sha er tar u̱ de soo ne kera, zum u ne hôngor a u, er lu u suwa akuraior a a vande a ven la nahan ga.

²⁹ Gadia hanmô u nana er ma kwagh u ken akaahôngorough ne yô, ior mba ve er a la, i̱ dugh ve ken nongo ve kera.

³⁰ Nahan yô, waan nen kwagh u M we ne ne iko, sha u de eren nen ma kwagh u ken aeren a hôngorough ne ga, a i vande eren, er ne, ne lu a va ga la, sha er ne̱ de hôngor ayol a en sha mi ga yô; ka Mo TER M lu Aôndo wen ye.