Levitiku 17 - ICIGHAN BIBILO

¹ Shi TER ôr kwagh a Mose, kaa er:

² Ôr kwagh a Aron man Mbaiserael cii, kaa ve wer: Ka kwagh u TER A kaa ne ne, er:

³ Hanma or u hen ya u Iserael u nana wua bua shin waniyôngo shin ivo ken afo shin nana wua ken akôngoafogh kpaa,

⁴ nana kera va a mi hen hunda u tenti u kohol ker la, er nana va na TER nagh a mi sha ishigh ki tabernakel u TER ga yô, i̱ na or la ibo i awambe, nan haa awambe inya je; i̱ dugh or la ken nongo u nan kera;

⁵ sha er Mbaiserael ve̱ vaan a iniav vev mbi ve senge ken toho la, sha ishigh ki TER, hen hunda u tenti u kohol ker la, hen pristi yô; ve̱ sôngo mbi ve̱ naan TER iniav mbi bem.

⁶ Pristi a̱ mishi awambe la sha atse a TER hen hunda u tenti u kohol ker la, shi a̱ nande ahôm, i̱ lu TER ihuma i dedoo.

⁷ Ve̱ de kera senge iniav vev ve̱ naan ujijingi mba bov mba ve lu dondon ve, ve eren idya la ga. I̱ hingir ve tindi u gbem sha won sha ikov ikov.

⁸ Shi kaa a ve wer: Hanma or u hen ya u Iserael shin u hen ushirmbaiorov mba ve nyer a nyôr ve yô, u nan ne nagh ku nanden shin nagh ku sôngon

⁹ man nan ve a mi hen hunda u tenti u kohol ker la, sha u nan TER ga yô, or la i̱ dugh nan ken nongo u nan kera.

¹⁰ Hanma or u hen ya u Iserael shin u hen ushirmbaiorov mba ve nyer a nyôr ve yô, u nan ye ma awambe yô, Me kera saan ishigh a u nan ye awambe la ga, Me dugh nan ken nongo u nan kera.

¹¹ Gadia uma u inyam yô, ka ken awambe a lu ye, Mo M na ne a sha atse a nanden nagh sha mi, sha u nan iwom a mi sha ci u uuma enev; gadia awambe nga ne iwom sha uma u a la.

¹² Ka nahan man M kaa Mbaiserael, Mer: Ma or u ken ven nana̱ de ye awambe ga, shiror u nan nyer a nyôr ne kpaa nana̱ de ye a ga ye.

¹³ Man shi hanma or ken Mbaiserael shin u hen ushirmbaiorov mba ve nyer a nyôr ve la, u nan ker inyamtoho shin inyon i i ye yô, nana̱ haa awambe a i inya, nana̱ cir inya sha mi.

¹⁴ Gadia uma u hanma inyam yô, ka awambe a i a lu uma u i ye; ka nahan man M kaa Mbaiserael Mer: De ye nen awambe a ma inyam ga ye; gadia uma u hanma inyam ka awambe a i; hanmô u nana ya a yô, i̱ dugh nan kera.

¹⁵ Hanma or u nan ye kwagh u a kpe a kpe, shin kwagh u inyamikume i woo yô, shin a lu or u tar la jim, shin a lu shiror kpaa, nana̱ ôô akondo a nan, shi nana̱ ôô iyol sha mnger kpaa, nana kera lu wang ga, zan zan iyange ia kar been man nana hingir wang ye.

¹⁶ Kpa aluer nana ôô a ga, iyol i nan kpaa nana ôô ga yô, nana lu a ibo iyol.