Levitiku 15 - ICIGHAN BIBILO

¹ Tsô TER shi ôr kwagh a Mose man Aron kaa er:

² Ôr nen kwagh a Mbaiserael, kaa nen a ve ner: Aluer anti or ihyelegh kua due nan iyol yô, kwagh u a dugh nan ken iyol la, ngu wang ga.

³ Mwanger u nan wanger ga sha kwagh u a dugh ken a nan la yô, ka un ne: shin kwagh la una duen nan iyol her, shin kwagh la una himbir, una lu nan ken iyol kpaa; ka mlu u wang ga, u nan je la.

⁴ Hanma gambe u or u kwagh a dugh nan ken iyol la, nana yav sha mi yô, una kera lu wang ga; man hanma kwagh u nana tema sha mi cii kpaa, una kera lu wang ga.

⁵ Hanma or u nana bende a gambe u nan kpaa, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange la ia kar been.

⁶ Or u nana tema sha hanma kwagh u or u kwagh a dugh nan ken iyol la nan tem sha mi yô, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been.

⁷ Or u nana bende a iyol i or u kwagh a dugh nan ken iyol la kpaa, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been.

⁸ Aluer or u kwagh a dugh nan ken iyol la, nana haa ma or u wang ijer iyol yô, or la nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been.

⁹ Man hanma shidi u or u kwagh a dugh nan ken iyol la, nana tema sha mi yô, una kera lu wang ga.

¹⁰ Man shi hanma or u nana bende a ma kwagh u nan tem sha mi yô, nana kera lu wang ga zan zan iyange ia kar been; man u nana tôô kwagh la kpaa, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been.

¹¹ Aluer or u kwagh a dugh nan ken iyol la, nana ôô ave sha mnger ga yô, tsô nana̱ bende a ma or yô, or u i bende a nan la, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been.

¹² Ityegh ki inyaagh kpaa, ki or u kwagh a dugh nan ken iyol la nana bende ki yô, i̱ hembe ki, man hanma ikagh ki konough kpaa, i̱ kile ki sha mnger.

¹³ Zum u or u kwagh a dugh nan ken iyol la, kwagh la una bee nan kera yô, nana̱ ôr ayange ataankarahar sha ci u mwanger u á wanger nan la, nana̱ ôô akondo a nan man nana̱ ôô iyol sha mngerem ma senen, tsô nana hingir wang.

¹⁴ Sha iyange i anigheni la, nana̱ kôr mbaatii uhar, gayô, utulembamkunguv uhar, nana̱ va a mi sha ishigh ki TER, hen hunda u tenti u kohol ker la, nana̱ va na pristi;

¹⁵ pristi a̱ gema u môm, a̱ na nagh ku isholibo mi, ugen la, a̱ gema a̱ na nagh ku nanden mi; pristi a̱ na iwom sha ci u nan, sha ishigh ki TER, sha ci u kwagh u a dugh nan ken iyol la.

¹⁶ Aluer hanma or ityujer ia due nan yô, nana̱ ôô iyol i nan cii sha mnger, nana kera lu wang ga, zan zan iyange ia kar been.

¹⁷ Hanma ikondo man hanma ikôvough, aluer ityujer ia haa sha mi yô, i̱ ôô sha mnger kera, ka kwagh u wang ga, zan zan iyange ia kar been.

¹⁸ Man kwase kpaa u nom a yav a nan a vese nan yô, ve uhar cii, ve̱ ôô iyol sha mnger, vea kera lu wang ga zan zan iyange ia kar been.

¹⁹ Aluer kwagh a due kwase ken iyol man kwagh u a dugh nan ken iyol la, a lu awambe yô, nana̱ lu ken mlu u wang ga u nan la, ayange ataankarahar; hanma or u nana bende a nan, nana kera lu wang ga zan zan iyange ia kar been.

²⁰ Man hanma kwagh u nana yav sha mi er nan lu ken mlu u wang ga u nan la yô, una kera lu wang ga; hanma kwagh u nana tema sha mi kpaa, una kera lu wang ga.

²¹ Man hanma or u nana bende a gambe u nan, nana̱ ôô akondo a nan nana̱ ôô iyol sha mnger kpaa, nana kera lu wang ga, zan zan iyange ia kar been.

²² Man shi hanma or u nana bende a ma kwagh u nan tem sha mi yô, nana̱ ôô akondo a nan man nana̱ ôô iyol sha mnger kpaa, nana kera lu wang ga, zan zan iyange ia kar been.

²³ Aluer ka gambe shin hanma kwagh u nan tem sha mi man nana bende a mi yô, nana kera lu wang ga, zan zan iyange ia kar been.

²⁴ Aluer hanma or nana yav a nan yô, mlu u nan u wang ga, una per ken nan, nana kera lu wang ga ayange ataankarahar; hanma gambe u nana yav sha mi kpaa, una kera lu wang ga.

²⁵ Aluer awambe a gba duen kwase ayange kpishi, kpa a kera lu sha ayange a mlu u wang ga u nan la ga, shin aluer nana due awambe a gande ayange a ma nan lu ken mlu u wang ga u nan la yô, ayange a awambe la a lu duen nan la cii, nana kera lu wang ga, er sha ayange a mlu u wang ga u nan la nahan; nan kera ngu wang ga.

²⁶ Hanma gambe u kwase la nana yav sha mi, sha ayange a awambe a lu duen nan la cii, una hingir nan er ka gambe u nan u sha ayange a mlu u wang ga u nan la nahan; man hanma kwagh u nana tema sha mi una kera lu wang ga, vough er kwagh u a kera lu wang ga, sha ci u mlu u wang ga u nan la nahan.

²⁷ Man shi hanma or u nana bende a akaa la yô, nana kera lu wang ga, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga, zan zan iyange ia kar been.

²⁸ Kpa aluer kwase la, awambe a wanger nan yô, nana̱ ôr ayange ataankarahar, ken masetyô yô, nana hingir wang.

²⁹ Sha iyange i anigheni la, nana̱ kôr mbaatii uhar, shin utulembamkunguv uhar, nana̱ va a mi hen pristi hen hunda u tenti u kohol ker la.

³⁰ Pristi a̱ gema u môm a̱ na nagh ku isholibo mi, ugen la a̱ gema a̱ na nagh ku nanden mi; pristi a̱ na iwom sha ci u nan sha ishigh ki TER, sha ci u kwagh u wang ga u a dugh nan ken iyol la.

³¹ Kape wanger nen Mbaiserael sha er ve̱ de kpeen sha mlu ve u wang ga la ga, er ve gbe hôngor a tabernakel Wam u a lu ve her atô la yô.

³² Ka tindi u or u kwagh a dugh nan ken iyol man or u ityujer i dugh nan la, man nan hingir wang ga yô,

³³ man kwase u nan lu dedoo ga, sha ci u mlu u wang ga u nan la, man or u kwagh a dugh nan ken iyol, shin a lu nomsoor shin a lu kwase kpaa, kua or u nan yav a kwase u a lu wang ga kpaa.