Levitiku 14 - ICIGHAN BIBILO

¹ TER shi Ôr kwagh a Mose, kaa er:

² Ka tindi u sha orimande, sha iyange i mwanger u nan ne: I̱ va a nan hen pristi;

³ pristi a̱ za ken akôngoafogh, pristi a̱ nenge, aluer angev mbu imandev mbu bee orimande la yô,

⁴ pristi a̱ kaa, i̱ va a inyon i uma i̱ wang sha ci u or u á wanger nan la, man kon u sedar man mou u nyian dindee kua hisop.

⁵ Pristi a̱ kaa, i̱ sôngo inyon i môm shin ityegh ki inyaagh sha mngerem ma senen.

⁶ Inyon i uma la yô, a̱ kôr i, shi a̱ tôô kon u sedar man mou u nyian dindee man hisop a̱ mir a inyon i uma la imôngo shin awambe a inyon i i senge sha mngerem ma senen la,

⁷ a̱ mishi or u i lu wanger nan imande ave la iyol kwa taankaruhar, a̱ pase er nan ngu wang, nahan a̱ pase inyon i uma la, i̱ purugh i̱ yem ken ikôngo.

⁸ Man shi or u i lu wanger nan ave la, nana̱ ôô ikondo i nan, nana̱ hondo ice iyol kera ca ca, nana̱ ôô iyol sha mnger, tsô nana hingir wang, man nana mase nyôron ken afo ye; kpa nana̱ tsa ken kungur u tenti u nan ayange ataankarahar.

⁹ Tsô sha iyange i ataankarahar la, nana̱ torough ice i nan i sha ityou kua indyer i nan man ingurashee i nan, nana̱ hondo ice iyol cii, nana̱ ôô akondo a nan, shi nana̱ ôô iyol i nan shin mnger, tsô nana hingir wang.

¹⁰ Sha iyange i anigheni la nana̱ kôr agumaiyôngo ahar a a lu a ihogholough iyol ga yô, man tuleiyôngo môm u a kom inyom i môm u a lu a ihogholough iyol ga yô, shi nana̱ tôô mwem ma kengese ma ma kom uikaren utar-ken-upue, ma i nongo mkurem sha mi, sha ci u nagh ku sha samuyia, man logi u mkure môm

¹¹ Pristi u a lu wanger nan la, a̱ gema or u i lu wanger nan la, a kaa la cii, a̱ ver sha ishigh ki TER hen hunda u tenti u kohol ker la.

¹² Pristi a̱ kôr gumiyôngo u môm a̱ na nagh ku iboogh a mi, kua logi u mkure la kpaa, a̱ cia ve, i̱ lu nagh ku cian sha ishigh ki TER;

¹³ a̱ sôngo gumiyôngo la hen ijiir i i senge nagh ku isholibo man nagh ku nanden la, hen icighanjiir; gadia er nagh ku isholibo ku lu ku pristi nahan, kape nagh ku iboogh kpaa ku lu la; ka icighankwagh u hemban cii je;

¹⁴ nahan pristi a̱ er awambe a nagh ku iboogh, a̱ felegh sha kpe u togh ku yanegh ku or u i lu wanger nan la, man sha ihôwe u nan u tamen u ken uwegh ku yanegh, man sha ihônguhar u nan u tamen u ken iyan;

¹⁵ pristi a̱ kende logi u mkure la, sha ikevwe na i imese,

¹⁶ Pristi a̱ civ ihôwe na u ken iyan ken mkurem ma ma lu ken uwegh nagh ku imesegh la, a̱ mishi ma sha ihôwe na la kwa taankaruhar sha ishigh ki TER;

¹⁷ tsô mkurem ma ma shi sha uwegh nagh la, pristi a̱ er ma, a̱ felegh sha kpe u togh ku yanegh ku or u i lu wanger nan la, sha ihôwe u nan u tamen u ken uwegh ku yanegh man ihônguhar u nan u tamen u nguhar ku ken iyan la, sha awambe a nagh ku iboogh la;

¹⁸ man mkurem ma ma shi pristi sha ihôwe la, a̱ gema ma, a̱ shighe sha ityough ki or u i lu wanger nan la; pristi a̱ na iwom sha ci u nan sha ishigh ki TER.

¹⁹ Pristi a̱ va a nagh ku isholibo, a̱ na iwom sha ci u or u i lu wanger nan la, sha ci u mlu u nan u wang ga la; ken masetyô yô, a̱ sôngo nagh ku nanden;

²⁰ nahan pristi a̱ na nagh ku nanden man nagh ku sha samuyia sha atse a nanden nagh sha mi; pristi a̱ na iwom sha ci u nan, tsô nana hingir wang je.

²¹ Kpa aluer nan lu icanor, nana fatyô u zuan a mi nahan ga yô, nana̱ kôr gumiyôngo môm sha ci u nagh ku iboogh, sha u cian a mi, sha er á na iwom sha ci u nan yô, man shi mwem ma kengese ma ma kom ikaren umôm-ken-upue, ma i nongo mkurem sha mi, sha ci u nagh ku sha samuyia, man logi u mkure môm,

²² kua mbaatii uhar, shin utulembamkunguv uhar, er nan fetyô yô; u môm a̱ lu nagh ku isholibo, ugen a̱ lu nagh ku nanden.

²³ Sha iyange i anigheni la, nana̱ va a mi hen pristi sha er á wanger nan, hen hunda u tenti u kohol ker la, sha ishigh ki TER yô.

²⁴ Pristi a̱ kôr gumiyôngo u nagh ku iboogh la man logi u mkure, pristi a̱ cia a mi, i̱ hingir nagh ku cian sha ishigh ki TER;

²⁵ a̱ sôngo gumiyôngo u nagh ku iboogh la, pristi a̱ er awambe a nagh ku iboogh la, a̱ felegh sha kpe u togh ku yanegh ku or u i lu wanger nan la, man sha ihôwe u nan u tamen u ken uwegh ku yanegh, man shi sha ihônguhar u nan u tamen u ken nguhar u ken iyan;

²⁶ pristi a̱ ker mkurem sha ikevwe na i ken imese;

²⁷ man pristi a̱ er mkurem ma ma lu sha ikevwe na i imese la, sha ihôwe na u ken iyan a̱ mishi kwa u taan kar uhar sha ishigh ki TER;

²⁸ shi pristi a̱ er mkurem ma ma lu sha ikevwe na la, a̱ felegh sha kpe u togh ku or u i lu wanger nan la, man sha ihôwe u nan u tamen ken uwegh ku yanegh man sha ihônguhar u nan u tamen u ken nguhar u ken iyan, sha ijiir i awambe a nagh ku iboogh a lu la;

²⁹ mkurem ma ma shi pristi sha ikevwe la, a̱ gema ma a̱ shighe sha ityough ki or u i lu wanger nan la, a̱ na iwom sha ci u nan, sha ishigh ki TER.

³⁰ A̱ na atii u môm la, shin tuleikungu u môm la, er nan fetyô yô;

³¹ inja na yô, ka kwagh u nan fetyô u zuan a mi je la, u môm sha ci u nagh ku isholibo, ugen sha ci u nagh ku nanden a nagh ku sha samuyia imôngo; pristi a̱ na iwom sha ci u or u i lu wanger nan la, sha ishigh ki TER.

³² Ka tindi u or u nan lu a angev mbu imandev, u nan lu a kwagh u a kom u á wanger nan a mi ga yô.

³³ TER shi ôr kwagh a Mose man Aron kaa er:

³⁴ Zum u né ar ken tar u Kanaan, u M lu nan ne Mer, u̱ lu u wen la yô, Mea haa angev mbu imandev ken ma iyou igen ken tar wen la,

³⁵ orya la nana̱ va kaa pristi er: Mnenge wam yô, angev mbu tsaren mbu ken iyou la.

³⁶ Nahan pristi a̱ kaa, i̱ due a ikav i̱ undu iyou la, je er pristi a lu a va sha u va nengen angev mbula ga yô, sha er akaa cii a a lu ken iyou la, a̱ de hingir a wang ga ze; ken masetyô yô, pristi a̱ nyôr sha u nengen iyou la;

³⁷ a̱ nenge angev mbula, aluer una nenge angev mbula mbu ken kpekpe u iyou la, anjiirim kwel, shou shou, shin nyian fing nahan, man mbua lu er mbu saa sha kpekpe ga, mbu za kimi yô,

³⁸ pristi a̱ due ken iyou la, a̱ za hen hunda u iyou, a wuhe iyou la ayange ataankarahar je;

³⁹ pristi a̱ shi a̱ va sha iyange i ataankarahar la, a va nenge; aluer una nenge angev mbula mbua seer sha kpekpe u iyou la yô,

⁴⁰ pristi a̱ kaa, ve̱ dugh awen a angev mbula mbu lu sha mi la, ve̱ haa ken ijiir i uihôgh ken akôngo a gar;

⁴¹ shi ve̱ kember iyou la kimi cii, man inya i i kember la, i̱ za haa ken akôngo a gar hen ijiir i uihôgh;

⁴² man ve̱ tôô awen agen ve̱ wa sha ajiir a awen a i dugh kera la, shi ve̱ tôô inya igen ve̱ shighe iyou la.

⁴³ Man aluer angev mbula shi mbu due ken iyou la, er i vande dughun awen la kera man i kember iyou la man i shigh i kpaa yô,

⁴⁴ pristi a̱ nyôr a̱ nenge, aluer angev mbua samber ken iyou la yô, ka imande je i lu ken iyou la ye; ka kwagh u wang ga.

⁴⁵ A̱ hembe iyou la, kua awen a i, man ikon i i, man inya i i shigh iyou la a mi cii, a̱ kura a̱ yem a mi ken ijiir i uihôgh ken akôngo a gar.

⁴⁶ Man hanma or u nana nyôr ken iyou la sha ayange a i wuhe i la yô, nana lu wang ga, zan zan iyange ia kar been.

⁴⁷ Or u nana yav ken iyou la kpaa, nana̱ ôô akondo a nan, man shi or u nana ya kwagh ken iyou la kpaa, nana̱ ôô akondo a nan.

⁴⁸ Aluer pristi una nyôr una nenge angev mbu due ken iyou la ga, er i vande shighen iyou la kera yô, pristi a̱ pase er iyou la i lu wang yô, gadia angev mbula mbu bee.

⁴⁹ Nahan a̱ kôr inyon ihiar, shi a̱ tôô kon u sedar man mou u nyian dindee kua hisop sha u wanger iyou la a mi;

⁵⁰ a̱ sôngo inyon i môm shin ityegh ki inyaagh sha mngerem ma senen;

⁵¹ a̱ tôô kon u sedar man hisop man mou u nyian dindee kua inyon i uma la, a̱ mir shin awambe a inyon i i senge la man shin mngerem ma senen, a̱ mishi iyou la kwa taankaruhar;

⁵² a̱ wanger iyou la sha awambe a inyon man sha mngerem ma senen kua inyon i uma man kon u sedar man hisop man mou u nyian dindee la;

⁵³ nahan a̱ pase inyon i uma la, i̱ due ken won gar, i̱ purugh i̱ yem ken akôngo; kape una na iwom sha ci u iyou je la, nahan ia hingir wang.

⁵⁴ Ka tindi u sha hanma injauange i imande kua lagh,

⁵⁵ man imande i sha ikondo kua i ken iyou kpaa,

⁵⁶ man sha imor man iyolkuran kua ibeenegh,

⁵⁷ sha u tesen er á fa kwagh u a lu wang ga, man kwagh u a lu wang yô; ka tindi u imande je la.