Levitiku 12 - ICIGHAN BIBILO

¹ Tsô TER shi ôr kwagh a Mose, kaa er:

² Ôr kwagh a Mbaiserael, kaa a ve wer: Aluer kwase nan wa iyav man nan mar wan u nomso yô, nana kera lu wang ga zan zan ayange ataankarahar, vough er ayange a ka nan due won i pav a nan la nahan, nana kera lu wang ga.

³ Sha iyange i anigheni la, i̱ tsôngo un.

⁴ Ayange ikundugber kar atar cii, nana lu ken awambe a mwanger la, nana̱ de benden ma icighankwagh ave ga, man nana̱ de nyer ken icighanjiir kpaa ga, zan zan ayange a mwanger u nan á bee ve.

⁵ Man aluer nana mar wan u kwase yô, nana kera lu wang ga zan zan ayange pue kar anyiin, vough er ayange a ka nan due won la nahan, ayange akunduatar kar ataratar nana lu ken awambe a mwanger la.

⁶ Zum u ayange a mwanger u nan aa bee sha kwagh u wan, shin a lu u nomso, shin u kwase kpaa yô, nana̱ va a gumiyôngo u a kom inyom i môm yô, sha ci u nagh ku nanden, man tuleikungu, shin atii, sha ci u nagh ku isholibo, hen hunda u tenti u kohol ker la, hen pristi;

⁷ pristi a̱ va a mi sha ishigh ki TER, a̱ va na iwom sha ci u nan, tsô nana hingir wang sha mhee u awambe a nan la. Ngun ka tindi sha ci u kwase u nan mar wan u nomso shin u kwase je ne.

⁸ Man aluer inyaregh ki nan kia kuma sha gumiyôngo ga yô, nana̱ va a mbaatii uhar shin utulembamkunguv uhar, umôm sha ci u nagh ku nanden, u môm yô, sha ci u nagh ku isholibo, pristi a̱ na iwom sha ci u nan, nahan nana hingir wang.